ABŞ Azərbaycanla danışıqlara "qırğınları" qoşur-Vaşinqton Bakıdan nə istəyir?
Sentyarın 21-də ABŞ dövlət katibinin müavini Viktoriya Nuland Qarabağ münaqişəsini və digər mövzuları müzakirə etmək üçün Nyu-Yorkda olan Azərbaycanın xarici işlər naziri Ceyhun Bayramovla görüşüb. "Biz tərəqqini, o cümlədən Minsk Qrupu həmsədrlərinin mexanizmi vasitəsilə regionda sülhə və sabitliyə yardım etmək, saxlanılan şəxslərin azad edilməsi, minalardan təmizlənmə və siyasi barışıq üçün tərəqqini səbirsizliklə gözləyirik" - Nuland görüşün yekunları ilə bağlı Tvitterdə yazıb.
Dövlət Departamentinin yüksək vəzifəli məmuru jurnalistlərin qarşısında çıxış edərək bildirib ki, ABŞ Bakı ilə İrəvan arasında sülh və barış danışıqlarına dəstək vermək üçün "yardım etməyə hazırdır" və Vaşinqton hər iki tərəfiə "eyni təklifi" etməyi planlaşdırır.
ABŞ-ın regionda fəallaşması nə vəd edir, Rusiyanın reaksiyası necə ola bilər? ABŞ rəsmiləri açıqlamalarının pərdəarxasında nələr var? Bakı birmənalı olaraq "status" barədə hər hansı danışıqların əleyhinədir. Bu halda Vaşinqtonun təzyiqləri nədən ibarət ola bilər?
Paşinyan yenə əvvəlki ağlında-“iki dövlət”, “qələbə” xəyalları...
Ermənistanın müstəqilliyinin 30-cu ildönümü ilə bağlı İrəvanın Respublika meydanında keçirilən tədbirdə baş nazir Nikol Paşinyanın çıxışı diqqət çəkib. Belə ki, Paşinyan yeni də ənənəvi erməni işğalçı siyasətindən imtina etmədiyini nümayiş etdirib.
O deyib ki, ermənilər bu illərdə uğur və uğursuzluq, göz yaşları və sevinc, ümid və ümidsizlik, müharibə, qələbə və məğlubiyyət görüb: “İndi sual budur ki, necə yaşamalıyıq və ölənlərin atasının, anasının, övladlarının gözünə necə baxmalıyıq; nə etməliyik ki, onların ölümü mənasız olmasın. Bizim başlıca vəzifəmiz gələcək üçün düzgün orientasiyanı müəyyən etməkdir”. Paşinyanın sözlərinə görə, tarix bəzən qələbənin heç də həmişə qələbə, məğlubiyyətin isə heç də həmişə məğlubiyyət olmadığını sübut edib: “Biz öz məğlubiyyətimizi qələbəyə çevirməliyik. Qəhrəmanlar Ermənistan və “artsax” üçün öldülər. Hələlik, iki erməni “dövləti” varsa, ölən qəhrəmanlar sağdırlar. İki “respublika” çiçəklənirsə, onların ölümü mənasız deyil”. Paşinyanın zaman-zaman sarsaqladığı faktdır. O, bir tərəfdən sülh danışıqları, Türkiyə ilə masa arxasına oturmaqdan danışır, digər tərəfdən yenə ermənilərin işğalçı instinktinə güc verir. Aydındır ki, bunlar daxili auditoriyaya hesablanmış açıqlamalardır, amma ermənilər indi o haldadır ki, kimsəyə inamları da qalmayıb. Paşinyan Qarabağ bir kənara, Ermənistanın özünün batdığı halda hansısa "çiçəklənmədən" danışır ki, bu da qeyri-ciddi görünür. Belə görünür ki, Paşinyan bəzi hallarda gerçəkliyi qəbul etsə də, daha çox ermənilərin psixoloji vəziyyətinin girovudur.
Putin erməniləri KTMT-yə yığır-Lavrovun “kirvəsinə” yeni vəzifə...
Rusiya Prezidenti Vladimir Putin Xarici İşlər Nazirliyinin xüsusi tapşırıqlar üzrə səfiri Mikael Ağasandyanı ölkəsinin Kollektiv Təhlükəsizlik Müqaviləsi Təşkilatında (KTMT) daimi və səlahiyyətli nümayəndəsi təyin edib. Başqa bir sərəncamla Putin Xarici İşlər Nazirliyinin xüsusi tapşırıqlar üzrə səfiri Andrey Şvedovu bu vəzifədən azad edib.
Bəzi təhlilçilər ehtimal edirlər ki, bu müddətdə İrəvan Bakıya qarşı provokativ həmlələrini artıra bilər. Hətta hansısa qərarların və addımların atılması gözdən keçirilər, KTMT-nin iclaslarında tez-tez müzakirə masasına gətirilə bilər. Sirr deyil ki, Ermənistan həm Tovuz hadisələri zamanı, həm 44 günlük müharibə dövründə, həm də ondan sonra KTMT-ni özünün düşmənçilik siyasətinə alət etməyə açıq cəhdlər edib. Ermənistan hər zaman bu qurumu Azərbaycana qarşı yönəltməyə çalışıb, ancaq səyləri fayda verməyib. Sözsüz ki, 2 illik sədrlik müddətinin onlara verdiyi fürsətdən Azərbaycana qarşı maksimum yararlanmağa çalışacaqlar.
Putinin Rusiyanın qurumda səlahiyyətli nümayəndəsinin ermənini təyin etməsi diqqət çəkir.
Lavrovun XİN-dəki “kirvələrindən” birinin qurumda Rusiya təmsilçiliyinə gətirilməsi sadəcə təyinata bənzəmir. Çünki bu təşkilatda əsas söz sahibi Rusiyadır və onun mövqeyi bir çox hallarda həlledicidir. İndi Rusiya XİN-dəki erməni lobbiçisinin nümayəndəsi Kremli təmsil edəcək və Ermənistanla birgə işləyəcəklər. Aydındır ki, bu təyinat istənilən halda Azərbaycanın xeyrinə deyil. Kremlin belə həssas məqamda KTMT-yə erməniləri toplamasının arxasında hansısa məkrli planların olduğunu ehtimal etmək mümkündür.
İran özü-özünə “quyu qazır”-Şeyxin cavabı və azərbaycanlıların ultimatumu...
İranın Ermənistanla “əl-ələ” verərək apardığı anti-Azərbaycan siyasətinə və radikal dindarların hədələrinə cavab gecikməyib. Qafqaz Müsəlmanları İdarəsinin (QMİ) sədri Şeyxülislam Allahşükür Paşazadə Ərdəbil vilayətinin imamı Amulininin səsləndirdiyi fikirlərə münasibət bildirib: “Bildiririk ki, Ağayi Amulininin məlum çıxışı, əlbəttə ki, İran-Azərbaycan əlaqələrinin möhkəmlənməsinə, xalqlarımız arasında dostluq və qardaşlıq münasibətlərinin dərinləşməsinə xidmət etmir. Biz dindarlar, möminlər yəqin ki şirdən, onun quyruğundan, müharibədən deyil, Allahın buyurduğu, Peyğəmbərimizin tövsiyə etdiyi kimi sülh, barış, dinclik niyyətindən, onun rəmzi olan göyərçindən danışmalıyıq” deyə, Şeyxin bəyanatında bildirilib.
Məlumatlara görə, sosial şəbəkələr üzərindən etirazını ifadə edən güney azərbaycanlılar da İrana sentyabrın 27-nə – Vətən müharibəsinin başlanmasının birinci ildönümünə qədər vaxt veriblər. Soydaşlarımız rəsmi Tehrandan Azərbaycana qarşı qərəzli münasibətdən əl çəkməyi tələb edirlər. Azərbaycana münasibətdə müsbət dəyişiklik baş verməyəcəyi təqdirdə İran əhalisi arasında çoxluq təşkil edən azərbaycanlıların ayağa qalxacağı, kütləvi aksiyalarla ölkə rəhbərliyinə etiraz edəcəyi bildirilir. İranda yaşayan azərbaycanlı fəallar istənilən vaxt etiraz aksiyalarına hazır olduqlarını deyirlər.
Beləliklə də, İran Ermənistana xoş gəlmək üçün yürütdüyü siyasət ölkədə onu ciddi problemlə üzləşdirə bilər. Azərbaycanlılar ayağa qalxsa, nə şir qalacaq, nə quyruğu...
Seyxin cəmiyyətin təzyiqlərindən və ittihamlarından sonra dilə gəlməsi yəqin ki, həm də hakimiyyətin razılığı ilə baş verib. Çünki İran mövzusunda əvvəllər Şeyxin “kənarda saxlamaq” məntiqi ilə hərəkət edilirdi. Amma görünür ki, indi ipləri qoparan İrana Şeyxin özünün də cavab verməsi gərək olub.
Bu və gündəmdəki digər mövzuları millət vəkili Fazil Mustafa ilə sabiq baş nazir, AXP sədri Pənah Hüseynlə müzakirə edirik. Müzakirədə tamaşaçılarımız da rəyləri, sualları ilə iştirak edə, verilişimizi bir dəfə bəyənib, bir dəfə paylaşmaqla dəstək verə bilərlər.