"Milli Qvardiyanın rəhbəri Viktor Zolotov istisna olmaqla, güc strukturlarının rəhbərlərinin hamısı Ramazan Kadırovun vəzifəsindən kənarlaşdırılmasını və məsuliyyətə cəlb olunmasını istəyir" 
"Çeçenistanın rəhbəri Ramazan Kadırovun Moskvaya qəfil səfəri və dərhal da prezident Vladimir Putinlə görüşü ilə bağlı Rusiya prezidentinin köməkçisi Dmitri Peskov medianın suallarını cavablandırarkən çox maraqlı məqamlar yaşanıb. Dünyanın ən böyük xəbər agentliklərindən biri olan Bloomberg-in əməkdaşı Peskova belə bir sualla müraciət edib: Putin Kadırovdan qorxurmu? Sual nə qədər maraqlı olsa da, cavab daha maraqlıdır. Peskov belə cavab verib: Sualınızı başa düşmürəm. Putin Rusiya regionunun rəhbərindən niyə qorxmalıdır? Daha sonra Bloomberg-in əməkdaşı sualı izah etmyə çalıb və yenə də Peskovdan birmənalı cavab ala bilməyib". Hurriyyet.azxəbər verir ki, bu fikirlər politoloq Xaqani Cəfərliyə məxsusdur.
Politoloqun sözlərinə görə, Peskovun Putini müdafiə etməyə cəhd göstərməməsi, Kadırovdan qorxması təəssüratını dağıtmağa çalışmaması Rusiya hakim dairələrinin böyük əksəriyyətinin Ramazan Kadırova mənfi münasibətinin nümayişi kimi şərh olunur: "Belə iddialar var ki, Milli Qvardiyanın rəhbəri Viktor Zolotov istisna olmaqla, güc strukturlarının rəhbərlərinin hamısı Ramazan Kadırovun vəzifəsindən kənarlaşdırılmasını və məsuliyyətə cəlb olunmasını istəyir. Lakin Putin Ramazan Kadırovu müdafiə edir və hüquq-mühafizə orqanlarına Çeçenistan rəhbərinə qarşı əməliyyat keçirməyə imkan vermir. Bu hal Çeçenistan rəhbərinin ancaq özünə bağlı 25 minlik, bəzi məlumatlara görə isə 50 minlik orduya malik olması ilə izah olunur". 
Xaqani Cəfərli qeyd edib ki, rusiyalı sosioloqlar isə Putindən sonra başlayacaq mərkəzdənqaçma dövrü haqqında düşünən Şimali Qafqaz xalqlarının Çeçenistanla ziddiyətə görə gələcəkləri ilə bağlı narahat olduqlarını qeyd edirlər: "Seçim qarşısında qalacaq Şimali Qafqaz xalqları üçün Azərbaycandakı yumşaq avtoritarizm Çeçenistandakı radikal dini-siyasi rejimlə müqayisədə cənnət kimi görünür. Azərbaycan Şimali Qafqazda baş verəcək mərkəzdənqaçma dövrünə hazır olmalıdır. Çünki bu çox da uzaq gələcək deyil".
Vazeh BƏHRAMOĞLU