Azərbaycan Milli Elmlər Akademiyasının (AMEA) aprel ayının 27-də keçiriləcək Ümumi yığıncağında quruma prezidentlik məsələsi müzakirə olunmayacaq.
Sozcu.info xəbər verir ki, bu barədə Cebhe.info-ya AMEA Rəyasət Heyətinin mətbuat xidmətindən məlumat verilib.
Məlumatda bildirilib ki, Rəyasət Heyəti aprel ayının 27-də keçiriləcək Ümumi yığıncağın gündəliyini təsdiqləyib:
“Ümumi yığıncaqda Milli Elmlər Akademiyasının elmi bölmələrinin hesabatları dinləniləcək. Akademiyaya prezident seçilməsi məsələsinin hansı tarixdə müzakirəyə çıxarılması məlum deyil. Hələlik prezidentin vəzifələrini Arif Həşimov icra edir”.
Qeyd edək ki, aprel ayının 22-də keçirilməsi nəzərdə tutulan Ümumi yığıncağın vaxtı aprelin 27-nə dəyişdirilib.
Məlumat üçün bildirək ki, fevralın 14-də AMEA-nın prezidenti Ramiz Mehdiyev istefasını elan edib. Azərbaycan Milli Elmlər Akademiyasının (AMEA) prezidenti vəzifəsini müvəqqəti olaraq qurumun birinci vitse-prezidenti Arif Həşimov icra edir.