"2020-ci ilin may ayından başlayan müraciətlərim bu günə kimi nəticəsiz qaldı. Ali Məhkəmənin sədrinə ünvanladığım ərizəyə cavab olaraq bildirilib ki, ilkin olaraq prokurorluq orqanlarına müraciət etməliyəm. Bu müraciəti etmədiyimə görə ərizəmin baxılmamış saxlanılması barədə qərar qəbul edilib".
Bunu hazırda açlıq aksiyası keçirən hüquqşünas Əlabbas Rüstəmov Prezident İlham Əliyev media vasitəsi ilə ünvanladığı müraciətində bildirib. O, 5. 4 il həbs cəzası çəkib, 31.10.2019-cu il tarixdə azadlığa buraxılıb.
Hüquqşünas ittiham olunduğu cinayət ittihamları üzrə bəraət verilməsini tələb edir.
Ə. Rüstəmov deyir ki, Baş Prokurora ünvanladığı müraciətlərlə verilən cavabda qeyd olunub ki, iş üzrə yeni açılmış hal kimi, Ali Məhkəməyə müraciət etməlidir. Sonrakı müraciətlərinə isə cavab ala bilməyib.
"14.03.2021-ci il tarixdən etibarən müddətsiz aclıq aksiyasına başladım və 4 gün aksiya keçirdim ki, bəlkə tədbir görməyə başlayarlar. 5-ci günü, Baş Prokurorluğun dəftərxanasına telefon açaraq müraciətimin aqibəti ilə maraqlandım. Bildirdilər ki, bu müaciətim Ali Məhkəmənin səlahiyyətlərinə aid olduğundan ora göndərilib",-deyə vəkil yazır.
Müraciətlərinin ölkə başçısına çatdırılmadığını iddia edən hüqüqşünas bildirir ki, nəyin bahasına olursa-olsun onu susdurmağa çalışırlar: "Buna səbəb, Ramiz Mehdiyevin kürəkəninin qanunsuz hərəkətlərini, sabiq Vergilər naziru Fazil Məmmədovun təşkilatçılığı ilə 15 gün ərzində 312 milyon manat məbləğində büdcə vəsaitinin mənimsənilməsini və bu kimi digər faktları ictimailəşdirməyim olub".
Ə. Rüstəmov ölkə rəhbərliyinə müraiətində bu işdə adları keçən şəxslərin məsuliyyətə cəlb edilməsinə və barəsində bəraət hökmünün çıxarılmasına yardım etməyi xahiş edir.
Qeyd edək ki, hüqüşünas tələblərinin yerinə yetirilməsi ilə bağlı iyunun 7-dən müddətsiz aclıq aksiyası keçiririr. O, "AzPolitika.info"-ya bildirib ki, sona qədər aksiyanı davam etdirmək niyyətindədir.