Ona ayrılan torpaq sahəsinin az olmasından narazı olan kənd sakini icra nümayəndəsi ilə mübahisə edib. Vətəndaş məmuru cəzalandırmaq üçün onun möhürünü götürüb. Buna görə də cinayət məsuliyyətinə cəlb edilib.
Sozcu.info xəbər verir ki, hadisə Ağdaş rayonu, Abad kəndində baş verib.
Kənd sakini Cəmil Quliyev kənd inzibati ərazi dairəsi üzrə nümayəndəliyinin inzibati binasında icra nümayəndəsi vəzifəsini müvəqqəti icra edən Asif Xəlilovla mübahisə edib.
Kənd təsərrüfatı ilə məşğul olan Cəmil Quliyev onlara ayrılmış pay torpağının az olmasına aydınlıq gətirmək üçün Asif Xəlilovun yanına gedib.
Ona bununla bağlı Yevlax rayon 17 saylı Kadastr Xidmətinə müraciət etməli olduğunu, həmin idarədən əməkdaşlar gəlməli və torpağı ölçməli olduğunu deyiblər.
Cəmil Quliyev buna görə onlardan rəsmi arayış vermələrini tələb edib. Asif Xəlilov isə ona arayış yox, məktub verə biləcəklərini deyib.
Bu sözlər Cəmil Quliyevin xoşuna gəlməyib. Stolun üstündə üzərində “Azərbaycan Respublikası Ağdaş rayon icra hakimiyyəti başçısının Abad kənd inzibati ərazi dairəsi üzrə nümayəndəsi” sözləri yazılan möhürü və ştampı götürən Cəmil Quliyev oradan uzaqlaşıb.
Cəmil Quliyev oradan uzaqlaşandan sonra Asif Xəlilov möhürün olmadığını başa düşüb və ondan şübhələnib. Cəmilə zəng edərək möhürü istəsələr də geri qaytarmayıb.
Sonradan əməlindən peşman olduğunu deyən Cəmil Quliyev bildirib ki, məqsədi icra nümayəndəliyinə öz etirazını bildirmək olub: “Asifin ailəsi və özü ilə hər hansı bir ədavətim yoxdur. Möhürü məhv etmək, zədələmək və ya istifadə etmək fikrim olmayıb. Məqsədim sadəcə etirazımı bildirmək idi”.
C.Quliyev möhürü götürdükdən sonra sahə polis rəisi Sirac Kərimovun da ona zəng etdiyini deyib. Amma polis əməkdaşına da möhürü təhvil verməyəcəyini deyib.
Asif Xəlilov isə ifadəsində göstərib ki, Cəmil Quliyevin istədiyi məktubu möhürləyib veriblər. Bundan sonra Cəmil Quliyev fürsətdən istifadə edərək möhürü götürüb. Asif Xəlilov bildirib ki, möhürü yenidən seyfə qoymaq istəyən zaman stolun üstündə olmadığını görüb və Cəmilin apardığını bilib.
“Cəmil velosipedlə gedəndə arxadan səslədik. Möhürü geri qaytarmasını xahiş etdik. Cəmil “sonra baxarıq” dedi və getdi. Sonra polis sahə rəisi Sirac Kərimov da Cəmilə möhürü geri qaytarmasını dedi. Amma qaytarmadı”,- deyə Asif Xəlilov bildirib.
Asif Xəlilov təqsirləndirilən şəxslə barışdığını, şikayət və tələbinin olmadığını deyib.
Məhkəmə Cəmil Quliyevin əməlindən peşman olmasını, zərərçəkmiş tərəfin barışdığını nəzərə alaraq onu Cinayət Məcəlləsinin 326.1-ci (rəsmi sənədləri, ştampları və ya möhürləri tamah məqsədi və ya digər şəxsi niyyətlə talama, məhv etmə, zədələmə və ya gizlətmə) maddəsi ilə təqsirli bilərək aylıq qazancından on beş faiz məbləğində dövlət nəfinə pul tutulmaqla bir il müddətə islah işləri cəzasına məhkum edib.