Silahlı Qüvvələrin Baş Qərargahının keçmiş rəisi, general-polkovnik Nəcməddin Sadıkovun qəzaya düşmə xəbəri dünən gündəmin ən çox müzakirə edilən mövzusu oldu.
Sosial şəbəkələrdəki müzakirələrdə diqqət çəkən əsas məqamlardan biri hadisənin 1 ay öncə baş verməsi barədə idi.
Bakı Şəhər Baş Polis İdarəsinin Dövlət Yol Polisi İdarəsinin baş inspektoru Araz Əsgərli bildirib ki, qəza 7 yanvar 2022-ci il tarixində baş verib:
“Fotolar isə saytlarda fevralın 16-da yayılıb. Hadisəyə gəldikdə isə bu, sıradan bir yol-nəqliyyat olayıdır. Qeyri-adi heç nə baş verməyib. Maşının qabağı digər avtomobilin buferinə dəyib. Yəni böyüdülüəcək şəkildə dəhşətli qəza deyil. Olması da arzulanan deyil, sadəcə, qəzaya düşən şəxs özü cəmiyyət üçün maraqlı olduğu üçün belə şok effekti yaradıb”.
“Toyota Land Cruiser" markalı, 90 AS 020 seriyalı avtomobili idarə edən Nəcməddin Hüseyn oğlu Sadıkov barəsində yol-nəqliyyat hadisəsinə uyğun olaraq İnzibati Xətalar Məcəlləsinin 327.1-ci maddəsinə əsasən protokol tərtib olunub.
Qanunvericiliyin tələblərinə uyğun olaraq, hadisə sənədləşdirilib. N.Sadıkov "Toyota Prius" markalı nəqliyyat vasitəsinə dəymiş ziyanı və özü barəsində tərtib olunmuş protokola uyğun cəriməni ödəyib.
Maraqlıdır ki, 1 ay öncə baş vermiş hadisənin indi gündəmə gətirilməsi bunun məqsədli şəkildə həyata keçirildiyinə dəlalət edir. Sosial şəbəkələrdə də bununla bağlı iddialar irəli sürülüb.
Xatırladaq ki, iki gün öncə Müdafiə Nazirinin sabiq müavini, Hərbi Hava Qüvvələri və Hava Hücumundan Müdafiə Qoşunlarının keçmiş komandanı, ehtiyatda olan general-mayor Altay Mehdiyev Nəcməddin Sadıkovla bağlı sensasion iddialar irəli sürmüşdü.
Sosial şəbəkə hesabında bu barədə geniş açıqlama yayan Altay Mehdiyev 2000-ci illərin əvvəllərində Naxçıvan Muxtar Respublikasında Yuxarı Buzqov yaşayış məntəqəsi yaxınlığındakı Buzqov yüksəkliyi də daxil olmaqla geniş ərazinin işğaldan azad edilməsi əməliyyatı barədə bəzi faktları açıqlayıb.
General məlum qeydində Nəcməddin Sadıkovu ittiham edərək yazıb ki, onun rəhbərliyi altında keçirilən uğurlu əməliyyatdan xəbər tutan Baş Qərargahın keçmiş rəisi dərhal geri çəkilməyi əmr edib.
Azərbaycan Müdafiə Nazirliyi 2021-ci il yanvarın 28-də yaydığı məlumata görə, general-polkovnik Nəcməddin Sadıkov müdafiə nazirinin birinci müavini - Silahlı Qüvvələrin Baş Qərargah rəisi vəzifəsindən uzaqlaşdırılaraq, ordu sıralarından ehtiyata buraxılıb.
N.Sadıkov 2 noyabr 1993-cü ildə müdafiə nazirinin birinci müavini - Azərbaycan Respublikası Silahlı Qüvvələrinin Baş Qərargahının rəisi vəzifəsinə təyin edilmişdi.
Modern.az