“İndi baş verən hadisələrin çoxu pandemiyanın fəsadıdır. Qapalılıq və nəzarətsizlik bu gün özünü göstərir".
Sozcu.info xəbər verir ki, bunu Yenisabah.az-a “Təmiz Dünya” Qadınlara Yardım İctimai Birliyinin sədri Mehriban Zeynalova deyib.
O, Gəncədə 2020-ci ildə ailə həyatı quran qızın 16 yaşında ana olmasına münasibət bildirib.
Xatırladaq ki, bu hadisəyə qədər İmişli rayonunda 2010-cu il təvəllüdlü bir qız uşaq dünyaya gətirmişdi.
Mehriban Zeynalova mövzu ilə bağlı deyib:
“İndi baş verən hadisələrin çoxu pandemiyanın fəsadıdır. Qapalılıq və nəzarətsizlik bu gün özünü göstərir. Ümumən götürəndə hər biri ayrı-ayrı hadisədir. Bəzilərində günahkar ailə olduğu halda, digərlərində qarşı tərəfin sui-istifadə faktı var. Bu, birmənalı şəkildə qəbul edilməlidir ki, əgər qarşı tərəf ondan sui-istifadə edirsə, bu zorakılıqdır.
Valideyn nəzarətsizliyi, uşağın həyatında iştirakının yoxluğu isə ayrı söhbətdir. Bəzən ata-ananı da ittiham etmək olmur, çünki əhalinin əksəriyyəti işlə, gəlir axtarmaqla məşğuldur. Bu halda uşaq nəzarətsiz qalır”.
Təbliğat işlərinin zəifliyindən və yox səviyyəsində olduğundan gileylənən M. Zeynalova nəzarət mexanizminin gücləndirilməsi yönündə ciddi işlər aparılmalı olduğunu bildirib:
“Belə hallara uyğun mərkəzlər olmalı, uşaqlar o mərkəzlərə verilməli və nəzarət mexanizmi yaradılmalıdır. Əmək və Sosial Müdafiə Nazirliyinin belə mərkəzləri var, amma onlar mütəmadi işləmir. Pərakəndəlik nəzarət mexanizminin sistemli olmasına imkan vermir.
Belə ailələrə dəstək proqramı olmalıdır. Mən sığınacağımdan çıxan şəxslərlə bağlı soruşuram ki, nəzarət necə olacaq, uşaq harada və kimin nəzarətində olacaq? Bu suallarla bağlı yerli icra qurumları məşğul olmalıdır. Axı istənilən halda hər bir gənc qız aldana, sui-istifadə oluna, yaxud zorlana bilər”.
Birlik sədri əlavə edib ki, bu sayaq məsələlərdə cinayət tərkibinin olması halları xüsusi araşdırılmalıdır.
“Uşağın olduğu mühit öyrənilməlidir. Çoxları deyəcək ki, qız özü istəyib. Qız özü istəsə belə, yaşı az olan şəxslərlə cinsi münasibətdə olma cinayət məsuliyyəti doğurur. Ana olmuş qızın indi 16 yaşı varsa, deməli, hadisə o, 15 yaşında olarkən baş verib.
İnsanlar dərk etməli və bunu başa düşməlidirlər ki, azyaşlı ilə cinsi münasibət zorakılıqdır, zorlanmadır, cinayətdir, vəssalam. Kimisə nəzarətsiz və ya xəstə görürlər və başlayırlar öz çirkim əməllərini törətməyə. Çoxlarının övladı var, eynilə mənim də. Kim istəyər ki, övladı zorlansın, qızı hamilə qalsın?!” – deyə M. Zeynalova fikirlərini tamamlayıb.