Aidə Sadıqova: “Hazırda təhdid altında yaşayırıq, ailəm qorxu içərisindədir”
Cəlilabad rayonu, Kirovka qəsəbə, Mustafa Nuriyev küçəsinin sakini Sadıqova Aidə Baləsər qızı "Hürriyyət"ə müraciət edərək bildirir ki, rayon sakini Rafael Şükürov adlı şəxs onların yaşayış yerinin yaxınlığındakı otlaq ərazisini qanunsuz zəbt edib. Bu azmış kimi, ərazini çəpərə alaraq, şəxsi istifadəsi üçün istifadə edir. Şikayətçinin sözlərinə görə, Rafael Şükürov ərazi üzrə bələdiyyə sədrinin rəhbər şəxsləri ilə yaxınlığından sui-istifadə edərək, ərazini mənimsəmişdir. Hazırda mal-qarasını otlağa çıxara bilməyən Aidə Sadıqova bildirir ki, Rafael Şükürov adlı şəxs onu və ailəsini ölümlə də təhdid edir. Hətta Aidə Şükürovanın üstünə yabayla da hücum edib. Hazırda ölümlə təhdid edilən Sadıqovlar ailəsi ölkə rəhbərliyindən və Daxili İşlər naziri, cənab Vilayət Eyvazovdan təhlüksəzliklərinin təminatı üçün köməklik göstərilməsini xahiş edir:
"Mənim şikayətim Cəlilabad rayon bələdiyyəsinin sədri Mehdi Kərimov, onun müavini Mehman Kərimov və Rafael Şükürovdandır. Kənddə Rafael Şükürovu hamı Kamal adı ilə tanıyır. Mən kənddə yaşamağıma baxmayaraq, mal-qaramın altını tökməyə yer tapmıram. Rafael adlı şəxs qanunsuz olaraq, evimin qarşısını tutaraq tikilişlər edir, mal-qarasının altını tökür və ərazidə mal-qarasının otlaması üçün yonca əkir. Eyni zamanda həmin ərazi hasara da alınıb. 2021-ci ilin ortalarında bu şəxsə bildirdim ki, evimin qarşısındakı çəpəri açsın. Lakin o, açmayacağını dedi. Mən də məcbur qalıb, mal-qaranının peyinini onun zəbt etdiyi çəpərin dibinə atıram. Rafael adlı şəxs mənim üstümə yabayla hücum edərək, öldürəcəyi ilə hədələyir. Yoldaşımı da ölümlə təhdid edir. Hər danışığında qan tökəcəyini deyir. Mənim 4 azyaşlı övladım var. Hazırda təhdid altında yaşayırıq, ailəm qorxu içərisindədir. Bununla bağlı Cəlilabad rayonunun polis rəisi Polad Qarayevə də məktubla müraciət etmişəm. Ondan xahiş etmişəm ki, ailəmin təhlükəsizliyi qorunsun. Məktubumuza 13 gündən sonra cavab verildi və bizi bölməyə dəvət etdilər. Polis rəisi Polad Qarayev Rafaelə müraciət edərək ərazinin sənədini istədi. Lakin heç bir sənəd göstərmədi. Sonra Rafaelə dedilər ki, ərazidəki çəpəri açsın, əks təqdirdə cərimə olunacaq. Amma bu şəxs bu günə qədər çəpəri açmayıb. Bununla bağlı polis idarəsindən bələdiyəyə də xəbərdarlıq edilib. Bələdiyyədən də əraziyə gəlib baxıblar. Hətta Rafaeldən sənəd də istəyiblər. Həqiqətən də ərazinin zəbt edilməsi təsdiqlənib. Rafael deyir ki, mən hakim partiyanın üzvüyəm, mənə heç kim heç nə edə bilməz. O, eyni zamanda bələdiyyə rəhbərliyi ilə yaxınlığının olduğunu da deyir. Həqiqətən də elədir. Dörd azyaşlı uşaq anası kimi ölkə rəhbərliyindən xahiş edirəm ki, bizə kömək etsinlər. Azərbaycan Respublikasının Prezidenti cənab İlham Əliyevdən, Birinci xanım Mehriban Əliyevadan, Ombudsman Səbinə Əliyevadan, Daxili İşlər naziri cənab Vilayət Eyvazovdan, Cəlilabad rayon icra başçısı cənab Rafiq Əliyevdən xahiş edirəm ki, bizi eşitsinlər. Əks təqdirdə bu şəxs qanunsuz olaraq torpağı zəbt etməkdə davam edəcək və bizi də öldürərək ailə qətliamı törədək".Məsələ ilə bağlı Daxili İşlər Nazirliyi ilə əlaqə saxladıq. DİN-in Mətbuat Xidmətinin Lənkəran regional qrupunun baş inspektoru, polis baş leytenantı Məhəmməd Rzayev "Hürriyyət"ə bildirdi ki, sözügedən yer qəbristanlıq ərazisi və bələdiyyənin mülkiyyətində olan torpaq sahəsidir:

“Məsələ ilə bağlı bildiririk ki, sözügedən əraziyə ətrafda yaşayan şəxslər məişət tullantılarını atdığı üçün antisanitar vəziyyət yarandığından, ora təmizlənərək Cəlilabad şəhər bələdiyyəsi tərəfindən dəmir torlarla çəpərlənib. Bundan narazı qalan Cəlilabad şəhər sakini Aidə Sadıqova Rayon Polis Şöbəsinə müraciət edib. Ona izah edilib ki, sözügedən yer qəbristanlıq ərazisidir və bələdiyyənin mülkiyyətində olan torpaq sahəsidir. Digər iddialar isə araşdırılır".
Cəlilabad rayon bələdiyyəsinin sədri Mehdi Kərimov isə "Hürriyyət"ə bildirdi ki, sabah (bu gün – red.) əraziyə baxış keçiriləcək və qərar qəbul ediləcək:

"Mən iki-üç aydır ki, vəzifəyə təyin olunmuşam. Həmin Rafael adlı şəxs 30 ildir ki, onlarla qonşudur. Köhnə bələdiyyə də nəzarət etməyib. Qəbristanlıq bələdiyyənin ərazisidir. Aida xanım da həmin əraziyə malın peyinini töküb. Onlara xəbərdarlıq etmişəm ki, ora mal peyini atmasınlar. Daşları da sındırırlar. Rafael uzun illərdən bəri orda tövlə tikib. Əgər qanunsuz tikibsə müraciət edəcəyik ki, ərazi onun adına sənədləşdirilsin. İki aydır gəlmişəm deyə məlumatım yoxdur. Qəbristanlıq ərazisini də vətəndaşların istifadəsinə verə bilmərəm. Ərazini də hasara aldırmışam. Sabaha baxış keçiriləcək əraziyə, qərar veriləcək".
PS. Hörmətli Daxili İşlər naziri cənab Vilayət Eyvazovdan xahiş edirik ki, bu məsələ ciddi şəkildə araşdırılsın. Əgər sabah hansısa xoşagəlməz hadisə baş verərsə, bu daxili işlər orqanlarının da imicinə ləkə gətirəcək. Ölümlə təhdid edilən çarəsiz ailə üzvləri polisi son ümid yeri hesab edir. Xahiş edirik ki, sizin göstərişinizlə ailənin təhlükəsizliyi rayon polisi tərəfindən təmin edilsin. Qarşı tərəflə də proflaktik söhbətlərin aparılmasının vacib olduğunu düşünürük. Digər tərəfdən, sözügedən ərazi də qanunsuz zəbt edilərək çəpərlənib. Ümid edirik ki, aidiyyatı qurumlar məsələni araşdıracaq və qanunsuz əməlləri törədənlər ağır şəkildə cəzalandırılacaq.  
Qeyd: Mövzunu davam etdirəcəyik.