1978-ci ildə «Sintetik naften turşuları əsasında antistatik aşqarların sintezi və sınaqları» mövzusunda dissertasiya işini müvəffəqiyyətlə müdafiə edib kimya elmləri namizədi elmi dərəcəsi alanda Vaqif Abbasovun cəmi 26 yaşı vardı. Elm ictimaiyyəti gənc alimin uğurlarını öncədən görə bilmiş, buna görə “Korroziya inhibitorları və konservasiya mayeləri” laboratoriyasına rəhbərlik ona həvalə edilmişdir. Bütün ömrünü Neft-Kimya Prosesləri İnstitutu ilə bağlayan Vaqif Abbasov “Çoxfunksiyalı reagentlərin kimyası və texnologiyası” şöbəsinin müdiri, elmi işlər üzrə direktor müavini olmuşdur. Artıq 11 ildir ki, Vaqif Abbasov Neft-Kimya Prosesləri İnstitutunun direktorudur. 

Elmi fəaliyyəti ilə  yanaşı Vaqif Abbasov neft və kimya sənayesinin inkişafına böyük tövhələr vermişdir. 70 illik ömrünün 50 ilini Neft-Kimya Prosesləri İnstitututuna  bağlayan Vaqif Abbasov kosmosu fəth edən ilk kosmik raketin yanacağının məhz çalışdığı İnstitut tərəfindən hazırlandığından fəxrlə danışır. 

Elmi fəaliyyət ilə yanaşı Vaqif Abbasov ölkənin ictimai həyatında da fəal iştirak edən ziyalıdır. Azərbaycanın işğal altındakı torpaqları azad etməsinin sevincini hər imkanda bölüşməkdən yorulmayan Vaqif Abbasov vətənpərvər ziyalıdır. İşğaldan azad edilən vətən torpaqlarında həyata keçirilən nəhəng abadlıq və quruculuq işlərindən qürurlanan Vaqif Abbasov dövlət başçısı İlham Əliyevin bu istiqamətdə həyata keçirdiyi işlərin dəstəkçisi və təbliğatçısıdır. 

Azərbaycanın bu gün dünyada söz sahibi, Avropanın enerji təhülükəsizliyin təminatında aparıcı dövlətlərdən olmasının əsasını Ulu Öndər Heydər Əliyev tərəfindən qoyulmuş doğru-düzgün siyasət, həmin siyasəti prezident İlham Əliyev tərəfindən uğurla davam etdirilməsində görən Vaqif Abbasov bu siyasətin fəal dəstəkçisidir. Prezident İlham Əliyev kimi şəxsiyyətlərin tarixdə çox  nadir hallarda rast gəlindiyini bildirən Vaqif Abbasov bu mənada Azərbaycan xalqını şanslı xalq hesab edir.

Yusif Məmmədəliyev adına Neft-Kimya Prosesləri İnstitutunun Baş direktoru, akademik Vaqif Abbasovun 70 yaşı tamam olması münasibəti ilə təbrik edir, uzun ömür və yeni elmi nailiyyətlər arzu edirik.

Arzuman Loğmanoğlu