Terror və Təhlükəsizlik Mütəxəssisi Abdullah Ağar "Habertürk"ün efirində İsrail-HƏMAS qarşıdurması ilə bağlı mühüm qiymətləndirmə edib.

Sozcu.info xəbər verir ki, A.Ağar hadisənin arxasında İran İnqilab Keşikçiləri Qvardiyasının (SEPAH) olduğuna diqqət çəkib və müharibənin hədəfinin Türkiyə olduğunu deyib.

"Bu müharibənin konkret hədəfi Türkiyədir. Çox ağıllı olmaq lazımdır" - ekspert xəbərdarlıq edib.

Ağar son aylarda Türkiyənin İsraillə inkişaf edən münasibətlərin əhəmiyyətinə və bunun bəzi ölkələrdə yaratdığı narahatlığa toxunub. O, Ukrayna-Rusiya müharibəsində Ankaranın həyata keçirdiyi “aktiv neytrallıq” prinsipini təqdir etdiyini bildirib və bu siyasətin İsrail-HƏMAS qarşıdurmasında da tətbiq edilməsi lazım olduğunu əlavə edib.

"Ancaq burada teoloji həssaslıq, geosiyasi hiylə və tələlər işə girir. Bu səbəblərə görə Türkiyə strateji ağlından istifadə edərək sakit hərəkət etməlidir. Bu, İsrail və HƏMAS arasında müharibə kimi görünsə də, bunun belə olmadığını vurğulayım. Bu müharibə İsraillə HƏMAS-dan silah kimi istifadə edən qüvvələr arasındadır" - ekspert deyib. 

Abdullah Ağar bildirib ki, həmin qüvvələr Türkiyə-İsrail münasibətlərinə təsir etməyə çalışırlar:

"Türkiyə bu nöqtədə son dərəcə sakit hərəkət etməlidir. Mən çox açıq şəkildə deyirəm ki, gördüklərimin arxasında Qüds Briqadaları və İsmayıl Qaani, yəni İran İnqilabı Keşikçiləri dayanır. Bir daha vurğulamaq istərdim; Bu müharibənin konkret hədəfi Türkiyədir. Biz Ukrayna-Rusiya müharibəsində balans siyasəti və strategiyası hazırlamışıq. Bunun nə qədər çətin olduğunu sınadıq. Amma biz düzgün iş gördük. Çünki hər iki tərəfin hesablamaları, hiylələri, əsaslandırmaları, haqsızlıqları var idi. Türkiyə nə etdi? Türkiyə NATO-nun üzvü olsa da, aktiv neytrallığı, balans siyasətini və strategiyasını ortaya qoydu və bununla da özünü qəbul etdirdi. İndi Türkiyənin daha mürəkkəb parametrlərin meydana çıxdığı, geosiyasi hiylə və tələlərin olduğu bir nöqtədə son dərəcə soyuqqanlı və ağıllı olması lazımdır".

Musavat.com