Vüqar Gülməmmədov oliqarxlarla mübarizədən çəkinir

Bir zamanlar prinsipial mövqeyi ilə dövlət qurumları arasında seçilən Hesablama Palatası Heydər Əsədovdan sonra öz mövqelərindən geri çəkilmiş kimi görünür. Əgər Heydər Əsədovun rəhbərliyi zamanı Hesablama Palatası həyata keçirdiyi auditlərin nəticələri, auditi aparan şəxslər haqqında ictimaiyyətə geniş məlumat verirdisə, Vüqar Gülməmmədovun rəhbərliyi dövründə bu mütərəqqi ənənəyə son qoyulub. Bu Hesablama Palatasının yaydığı məlumatlardan aydın görünür və bunu oxucular Hesablama Palatasının http://www.sai.gov.az-saytına daxil olaraq özləri də araşdıra bilərlər.

Məsələn, Hesablama Palatasının 2017-ci ilin 6 ayı ərzində həyata keçirdiyi nəzarət tədbirlərinin nəticələri ilə bağlı məlumatda deyilir: "Hesablama Palatasının 2017-ci il İş planına əsasən cari ilin 6 ayı ərzində 31 nəzarət tədbirinin başlanılması və 14 tədbirin nəticələri ilə bağlı Kollegiya qərarları qəbul olunmuşdur. Nəticələrinə baxılmış nəzarət tədbirlərinin 13-ü audit, 1-i isə analitik təhlil işi olmuşdur. 2017-ci ilin İş planına əsasən nəticələri ilə bağlı qərar qəbul olunmuş nəzarət tədbirləri dövlət büdcəsindən ayrılmış xərclərlə yanaşı, büdcədənkənar dövlət fondunun xərclərini və fəaliyyətdən əldə edilmiş vəsaitlər üzrə xərcləri əhatə etmişdir. Belə ki, 2-i nəzarət tədbiri ilə dövlət büdcəsindən ayrılmış xərclər və Azərbaycan Respublikasının Dövlət Sosial Müdafiə Fondunun vəsaitləri, 4  tədbir ilə isə eyni zamanda fəaliyyətdən əldə edilmiş gəlirlər hesabına maliyyələşdirilmiş xərclər audit olunmuşdur. Nəticələri ilə bağlı qərar qəbul edilmiş nəzarət tədbirləri ilə ümumilikdə 605,5 mln. manat vəsait əhatə olunmuşdur ki, bunun 402,6 mln. manatı və ya 66,5%-i dövlət büdcəsinin xərcləri, 88,3 mln. manatı və ya 14,6%-i büdcədənkənar dövlət fondlarının vəsaitləri, 114,6 mln. manatı və ya 18,9%-i isə fəaliyyətdən əldə edilmiş vəsaitlər üzrədir. Nəzarət tədbirləri əhatə edilən dövlət büdcəsi vəsaitinin 0,4%-i 2014-cü ildə, 48,1%-i  2015-ci ildə və 51,5%-i 2016-cı ildə icra edilmiş xərclər üzrə olmuşdur. Əvvəlki illərdən fərqli olaraq 2017-ci ilin birinci yarısında nəzarət fəaliyyəti ilə əhatə olunmuş vəsaitin dövlət büdcəsinin funksional bölmələri üzrə strukturu daha çox vəsaitin "İqtisadi fəaliyyət” bölməsi üzrə (24,8%)  əhatə olunduğunu göstərir. Hesabat dövründə əhatə edilmiş vəsaitin 85,1%-i dövlət büdcəsinin mərkəzləşdirilmiş, 14,9%-i isə büdcənin yerli xərcləri üzrə olmuşdur. Nəzarət tədbirlərinin əhatə etdiyi dövlət büdcəsi vəsaitlərinin 36,2%-i mərkəzi icra hakimiyyəti orqanları və onların tabeli qurumları, 16,0%-i ali təhsil və elm müəssisələri, 47,8%-i isə digər  dövlət qurumları tərəfindən icra edilmişdir. Hesabat dövründə nəticələri ilə bağlı qərar qəbul edilmiş tədbirlər üzrə müvafiq zəruri addımların atılması məqsədilə 24 quruma Kollegiya Qərarının surəti, 5 quruma isə Təqdimat göndərilmişdir. Hesablama Palatası tərəfindən əvvəlki illərdə başa çatdırılmış auditlərin və 2017-ci ilin altı ayı ərzində nəticələri ilə bağlı qərar qəbul edilmiş tədbirlərin nəticəsi olaraq ümumilikdə 4762,8 min manat, 13,4 min ABŞ dolları məbləğində vəsaitin dövlət büdcəsinə, 122,6 min manat məbləğində vəsaitin isə büdcədənkənar dövlət fondunun büdcəsinə bərpası təmin edilmişdir.Nəzarət tədbirlərinin nəticəsi olaraq 39 vəzifəli şəxslə bağlı intizam-tənbeh tədbirinin tətbiq edildiyi barədə məlumatlar Hesablama Palatasına daxil olmuşdur”.

Hesbala Palatasının bu məlumatı o qədər məhduddur ki, qurumun dövlət büdcəsinə və büdcədənkənar dövlət fondunun büdcəsinə müfaviq olaraq bərpa edilən 4762,8 min manat, 13,4 min ABŞ və 122,6 min manat məbləğin hansı təşkilatlarla bağlı olduğu məlum olmur.

Hesablama Palatasının Dövlət Gömrük Komitəsinin Sumqayıt Baş Gömrük İdarəsində gömrük qanunvericiliyinə riayət edilməsi vəziyyətinə  dair nəzarət tədbiri ilə bağlı məlumatı o qədər məhdud və qısadır ki, Palatanın gömrük idarəsi ilə bağlı tədbirinin nədən ibarət olduğu məlum olmur.

Belə görünür ki, Hesablama Palatasının sədri Vüqar Gülmmədov oliqarxlarla qarşı-qarşıya gəlməkdən çəkinir. Çünki, dövlət strukturlarının və icra orqanlarının əhəmiyyətli hissəsinin oliqarxların himayəsində olduğu məlumdur. Hesablama Palatası isə auditin nəticələrini ictimailəşdirməklə oliqarxların maraqlarına toxunur, onların himayəsində olan məmurların büdcə vəsaitlərini necə mənimsəməsi, talan və israf etməsi ilə bağlı cəmiyyətdə rəy yaradırdı. Bu isə həmin oliqarxların mövqelərini sarsıdırdı. İndi isə Hesablama Palatası audit və nəzarət tədbirləri ilə bağlı məlumatı məhdudlaşdırmaqla oliqarxların maraqlarını təmin etmiş olur. Ümid edirik ki, Hesablama Palatası Heydər Əsədovun rəhbərliyi zamanı göstərdiyi prinsipial və şəffaf fəaliyyətini bərpa edəcək, audit və nəzarət tədbirləri ilə bağlı ictimaiyyətə daha geniş məlumat verəcəkdir.

A.Nəbiyev,

"Yeni Sözçü” qəzeti