Külli miqdarda dələduzluqda ittiham edilən şəxsin məhkəməsi davam etdirilir. O, Rusiyada saxlanılaraq Azərbaycana gətirilib.
Sozcu.info xəbər verir ki, Bakı Ağır Cinayətlər Məhkəməsində 1963-cü il təvəllüdlü Zamanov Oqtay Sultan oğlunun cinayət işi üzrə məhkəmə araşdırması keçirilir.
Məhkəmə araşdırması hakim Faiq Qəniyevin sədrliyi ilə davam etdirilir.
Sonuncu məhkəmə iclasında dövlət ittihamçısı çıxış edib. Prokuror törətdiyi əməllərə görə Oqtay Namazovun 9 il müddətinə azadlıqdan məhrum edilməsini istəyib.
Prosesdə iştirak edən zərərçəkmişlər Oqtay Namazovun həbsini yox, dəymiş zərərin ödənilməsini istəyiblər.
Zərərçəkmiş Səbinə Kərimova 6500 manatlıq zərərin ödənildiyini deyir. Məmmədəli Quliyev isə 17 minlik zərərdən yalnız min manatının geri qaytarıldığını söyləyir.
İş üzrə zərərçəkmişlərdən biri Zinə Məmmədovadır. Zərərçəkmiş qadın deyir ki, Oqtay Namazov ondan aldığı 13 min manatın 6 minini geri qaytarıb.
"Mən küçələrdə qələm satıram. Qəpik-qəpik yığdığım pulu məndən alıb. Pulumu versin, həbs edilməsini istəmirəm. Cəhənnəmə, nə edibsə daha keçib"- deyə zərərçəkmiş söyləyib.
Oqtay Namazov Səbinə Kərimovanın 6500 manatlıq iddiası ilə razılaşmır, deyir ki, Səbinə Kərimova pulu ona yox, arvadına verib. Digər zərərçəkmişlərin pulunu isə azadlığa çıxdıqdan 3 sonra ödəyəcəyini söyləyir.
"Yarımçıq qalan işim var. Söz verirəm ki, bunları həll edəndən sonra ödəyəcəm. Amma azadlığa çıxmasam, bunu edə bilməyəcəm"- deyə O.Namazov zərərçəkənlərə və məhkəməyə bildirib.
O.Namazovun vəkili deyib ki, elan olunan ittihamlardan yalnız Zinə Məmmədovanın zərərini qəbul edirlər.
Oqtay Zamanov bir neçə nəfərə qarşı külli miqdarda dələduzluq etməkdə ittiham edilir. O, mənzil fırıldağında suçlanır.
Barəsində çoxsaylı şikayətlər edildikdən sonra O.Zamanov Rusiyaya qaçıb.
Azərbaycan Baş Prokurorluğu tərəfindən Rusiya Baş Prokurorluğu ilə ikitərəfli münasibətlər çərçivəsində Azərbaycan ərazisində cinayət törətmiş şəxslərin cinayət məsuliyyətinə cəlb edilməsindən ötrü ekstradisiya edilməsi barədə sorğular edilib.
Sorğuya müsbət cavab verilib və O.Zamanovun Azərbaycana ekstradisiyası həyata keçirilib.