Arvadını bıçaqlamaqda ittiham edilən şəxs hakim qarşısına çıxarılıb. Arvadı onu bağışlayıb, prokuror isə 5 il müddətinə azadlıqdan məhrum etmə cəzası istəyib.
Sozcu.info xəbər verir ki, Bakı Ağır Cinayətlər Məhkəməsində qəsdən sağlamlığa ağır zərər vurmaqda ittiham edilən Mirqasımov Mirhəbib Mirzə Ağa oğlunun cinayət işi üzrə məhkəmə araşdırması davam etdirilir.
Hakim Eldar İsmayılovun sədrliyi ilə keçirilən sonuncu məhkəmə iclasında dövlət ittihamçısı çıxış edib.
Prokuror Mirhəbib Mirqasımovun 5 il müddətinə azadlıqdan məhrum edilməsini istəyib.
İttihama görə M.Mirqasımov həyat yoldaşı Lalə Nadirovanı bıçaqlayıb.
Törətdiyi əmələ görə özünü təqsirli bilən M.Mirqasımov əməlindən peşman olub. M.Mirqasımov ifadəsində göstərib ki, taksi fəaliyyəti ilə məşğul olaraq ailəsinin dolanışığını təmin edib. Onun həyat yoldaşı bir müddət dayə, daha sonra isə gözəllik salonunda işləyib.
“Dayə işləyən zaman bir neçə gün evə gəlmədi. Dedi ki, orada qalmalıdır. Sonra gözəllik salonunda işlədi. Karantindən sonra yenə də dayəlik edəcəyini, bəzən evə gəlməyəcəyini dedi. Mən onu çox qısqanırdım. Onun gözəllik salonunda işlədiyini, məndən gizlətdiyini düşünürdüm. Bir neçə dəfə işlədiyi yeri soruşsam da demədi. Sonuncu dəfə yenə bu məsələdə mübahisə elədik. Mən ona bir sillə vurdum. Zəng edib qızımız İradəni çağırdı. İradə onu öz evinə aparmaq istəyəndə mən razılaşmadım və mübahisə böyüdü”,- deyə M.Mirqasımov ifadəsində göstərib.
Onun ifadəsindən məlum olub ki, əvvəlcə masanın üstündə olan bıçağı götürərək həyat yoldaşı Laləni vurmaq istəyib. Amma qızı müdaxilə edib və bıçağı onun əlindən alıb. M.Mirqasımov həyat yoldaşının qızının evinə getməsinə etiraz edib və mətbəxdən başqa bir bıçaq götürərək arvadına 3 bıçaq zərbəsi endirib.
Əməlindən peşman olan M.Mirqasımov bildirib ki, arvadını öldürmək niyyəti olmayıb.
Lalə Nadirova da eyni məzmunlu ifadə verib. Bildirib ki, əri sadəcə ondan qisas almaq niyyəti ilə vurub və öldürmək istəsəydi, öldürərdi.
Prokurorun istədiyi 5 il azadlıqdan məhrum etmə cəzasının çox olduğunu deyən Lalə Nadirova daha yüngül cəza təyin edilməsini, M.Mirqasımov şərti cəza ilə azadlığa buraxılmasını istəyib.
Məhkəmə araşdırması davam etdirilir.