İş üzrə 30 sahibkar zərərçəkəndir, onlardan 15 milyon qoparılıb

10 gün sonra, oktyabrın 11-də Baki Hərbi Məhkəməsində ləğv olunmuş Milli Təhlükəsizlik Nazirliyinin İstintaq Baş İdarəsinin rəisi Mövlam Şıxəliyevin və İstintaq Baş İdarəsinin tərkibindəki şöbənin rəisi olmuş Vüsal Ələkbərov, İbtidai İstintaq İdarəsinin sabiq rəis müavini Yasin Məmmədov, şöbə rəisinin keçmiş müavini Sahib Ələkbərovun cinayət işi üzrə hazırlıq iclası keçiriləcək. İş üzrə Eldar Mahmudovun şəxsi işverəni “Akula” ləqəbli Akif İsmayıl oğlu Mustafayev, Elçin Ağa Mamed oğlu Həsənov, Kazım Askari və digər bir neçə şəxs axtarışdadır. İstintaq MTN-in İstintaq Baş İdarəsinin rəis müavini Təhsin Ağayevə “səhhətinə görə” ittiham elan etməmək qərarı verib!
Azərbaycanda Eldar Mahmudovun “Koza Nostra”sı necə bərqərar olub?
Cinayət dosyesində yer alan sənədlər, faktlar, sübutlarla tanış olanda Mövlam Şıxəliyev və onunla hakim qarşısına çıxarılacaq sabiq MTN-çilərin faktiki olaraq dövlətin içində yuva qurmuş mütəşəkkil cinayətkar quldur dəstəsi şəklində fəaliyyətləri göz önündə canlanır. İtalyan mənşəli amerikalı yazıçı Mario Pyuzo “Xaç atası” romanını qələmə alanda heç ağlına belə gəlməzdi ki, 19 əsrdə Siciliyada yaranan “Koza Nostra” (Azərbaycanca “Bizim işimiz”- E.M.) mafioz qruplaşmasının oxşarı 2000-ci ilin əvvəllərində milli təhlükəsizlik naziri postuna təyinat alan Eldar Mahmudovun rəhbərliyi altında Azərbaycanda formalaşdırılacaq. İş bölgüsü də fərqli olmayacaq.
Sahə müvəkkili Mövlam Şıxəliyev “baş briqadir” postuna gətirilir...
Özünü “Koza Nostra”dakı “Xaç Atası”na çevirən Eldar Mahmudov qısa zamanda bandanın işini təşkil edib. “Baş briqadir” postuna keçmiş sahə müvəkkili Mövlam Şıxəliyevi gətirib. Ondan aşağıda briqadirlər - idarə rəisləri, iş icraçıları - müstəntiqlər, məhkəmə tibb ekspertləri, işverənlər, növbətçi prokuror və hakimləri yığıb. Banda beləcə əl-ələ verib genişlənib, illərlə dövlətin gücündən istifadə etməklə iş adamlarını maddi, mənəvi terrorla üz-üzə qoyub. Beləcə iş adamlarından milyonlarla manat zor gücünə qoparılıb “obşak”a yönəldilib. “Obşak”a daha çox pul daşıyan, pulun alınması üçün canfəşanlıq edən banda üzvləri Xaç Atasının gözündə daha çox hörmətə sahib olub, vaxtından əvvəl rütbələr alıb, daha çox qazanc əldə ediblər.
30 iş adamı zərərçəkəndir, onlardan 15 milyon qoparılıb
 "Baş briqadir"in cinayət dosyesində 30 iş adamı zərərçəkən qismində keçir. Banda üzvləri onlardan üst-üstə 15 milyon manatdan artıq vəsait alıblar.
Saxta ittihamlar bir qayda olaraq həmin dövrdə baş prokurorun 1-ci müavini postunu tutan Rüstəm Usubovun imzası ilə təsdiqlənib. MTN-dən Bakı Ağır Cinayətlər Məhkəməsinə göndərilən belə saxta-qondarma işlərə bir qayda olaraq  vaxtilə MTN-də müstəntiq vəzifəsində çalışmış Novruz Kərimov, Faiq Qəniyev və digər hakimlərin “yüngül əli” ilə ittihamedici hökmlər alınıb. Cəzası 5 il 6 ay, 10 il 6 ay. 11 il 6 ay və belə 6 ay “quyruğu” olan müddətlərdə cəza alan iş adamlarını sonrakı məhkəmə instansiyaları da azad etməkdən çəkinib. Belə hökmlərdən sonra azadlığa çıxmaq  müşkül olub. “Quyruqlu” - yəni 6 ay əlavə cəza müddətli hökmləri alanlar “zəngdən zəngə” qədər cəzaçəkmə yerlərində cəzalarını tam şəkildə başa vurmalı olublar.

Barmaqlarını yuxarı qaldırıb deyirdilər ki, nazir tapşırıb, 100 mindən aşağı almayın!
“Koza Nostra”nın istintaq-məhkəmə labirintindən çıxmaq istəyən, istintaq və ya məhkəmə dövründə “ağıllanan” iş adamlarını bandadakı məhkəmə tibb ekspertlərinin rəyini əsas tutmaqla azad ediblər. Cinayət dosyesində adı  zərərçəkən kimi keçən iş adamlarının hər birinə belə rəy alınıb.
Cinayət dosyesini vərəqləyərkən çox maraqlı bir detal diqqətimizi çəkdi. Alınan məbləğlər 100 mindən üzü yuxarı idi. Heç bir günahı olmayan biri 3-5 min “şirinlik”lə canını bandadan qurtarmaq istəməyib yəni? Maraqlandıq, cavab da qısa oldu:  20-30 min verib oradan çıxmaq mümkün deyildi. Barmaqlarını yuxarı qaldırıb deyirdilər ki, nazir tapşırıb, 100 mindən aşağı almayın! İş materiallarında zərərçəkənlərdən ən az məbləğlə - 100 min dollarla “Koza Nostra”dan yaxasını qurtaran Zaur Əliyevdir. Ən böyük məbləğ isə  “Texnikabank” Etibar Əliyevən alınıb - 3 milyon manat.
2015-ci ildə “Koza Nostra” ifşa olunur, Təhsin Ağayev sanitar qovşaqda özünü asır
Zərərçəkənlər dəstənin ən aktiv iştirakçısı kimi “torpedo” adlandırdıqları Mövlam Şıxəliyevin müavini Təhsin Ağayevin adını çəkirlər. Deyirlər ki, o, “Xaç Atası”nın, “baş briqadir”in göstərdiyi etimadı doğrultmaq üçün Mahmudovun cinayətkar yuvasına çevrilən MTN-ə gətirilən iş adamlarına xüsusi qəddarlıq göstərib. Yuxarı vəzifəyə getmək, rütbəsini artırmaq istəyini də heç vaxt gizlətməyib.
Təhsin Ağayev bu gün azadlıqdadır. “Koza Nostra”nın əlinə keçən iş adamlarına - Azərbaycan vətəndaşlarına xüsusi qəddarlığına rəğmən, günahsız insanların əli qandallı cəzəçəkmə yerlərinə göndərilməsinə yol açsa da, ortalıqda gəzir. Zərərçəkənlər deyirlər ki, onun bu gün azadlıqda olmasının maraqlı tarixçəsi var. Təhsin Ağayev 2015-ci ilin oktyabrında “Koza Nostra” ifşa olunub “Xaç Atası” - Eldar Mahmudov ev dustağına çevrildikdən bir az sonra ona da növbə çatacağının fərqində olub. Cəzaçəkmə yerlərində ora yolladığı onlarla günahsız insanlarla qarşılaşacağı qorxusu onu intihar cəhdinə sürükləyib. Elə MTN-in binasındaca sanitar qovşağa girən idarə rəisinin müavini orada qalstukunun bir ucunu pəncərənin məhəccərinə bərkidib və özünü asıb. Lakin onu xilas ediblər, ölümün pəncəsindən alıblar. Üst-başı su içində sanitar qovşaqdan çıxarıb MTN binasından uzaqlaşdırıblar. Həmin gündən sonra ona binanın həndəvərinə yaxın gəlmək belə yasaqlanıb. 

Mövlam Şıxəliyev Akif Çovdarov kimi azad edilə bilərmi?
Bu gün yalnız “baş briqadir” - Mövlam Şıxəliyev həbsdədir. Bu baxımdan aparılan istintaq suallar doğurur. Qalanları - “torpedo”lar isə azadlıqdadır. Bu cinayət dosyesinin taleyinin Akif Çovdarovun cinayət dosyesindən fərqlənəcəyinə ümidlər çox azdır. Mövlam Şıxəliyevi bu gedişlə 10-12 il müddətinə “mükafatlandırıb” təmtəraqla cəzaçəkmə yerinə “istirahətə” yollayacaqlar. O da növbəti 3-4 ili oralarda keçirib azadlığa çıxacaqmı?
Gedişat onu deməyə əsas verir ki, adamlar tezliklə yaxalarını Azərbaycan dövlətinin əlindən ala biləcəklərinə arxayındırlar. Üstəlik, zərərçəkmişlərdən alınan pullar qaytarılmadan ortada it-bata salınır.
Çingiz Əsədullayevin “AG Bank”ı “Koza Nostra”nın “obşak”ı olub!
Zərərçəkənlərdən alınan pulların geri istənilməsi proseduru isə faktiki olaraq işlək deyil. Kimsə qanunla “Koza Nostra” üzvlərindən pulunu ala bilməyəcək.
Mövlam Şıxəliyevin oğlundan pullarını geri istəyənlərə o, pulları “yuxarı” verdiklərini gizlətmir, yaxasını kənara çəkir. Banda fəaliyyətdə olduğu dövrdə “obşak”ın pulları eks deputat, Eldar Mahmudovun yaxın dostu Çingiz Əsədullayevin bankı - “AG Bank”a toplanıb və oradan xaricdəki hesablara ötürülməklə izləri itirilib. Cinayət dosyesində isə “AG Bank”ın rəhbəri Çingiz Əsədullayevin şahid qismində belə dindirilməsi əksini tapmır!

Məsələn, cinayət dosyesi üzrə zərərçəkmiş, “Santexmax” MMC-nin sahibi olan iş adamı Əhməd Mirzəyevi Təhsin Ağayev və digər banda üzvləri şərləyiblər. Qaçaqmalçılıq yolu ilə ölkəyə əntiq əşyalar gətirməsi bəhanəsi ilə həbs ediblər.  Təhsin Ağayev Əhməd Mirzəyevdən ilkin olaraq 500 min manat istəyib. Əhməd Mirzəyev isə tələb olunan məbləğə sahib olmadığını deyib.
Cinayət dosyesindən belə aydın olur ki, Mövlam Şıxəliyevin müavini Təhsin Ağayev əli qandallı, təcridxanada olan dustaq Əhməd Mirzəyevi razı salmaq üçün günlərlə dilə tutub. 1 aya yaxın girovluqda saxlanılan Əhməd Mirzəyevdən məbləği bu şəkildə ala bilməyəcəklərini dəqiqləşdirəndə taktikanı dəyişiblər. Əhməd Mirzəyevə deyiblər ki, 500 min manat əvəzinə 500 min dollar versə, yəni o dövrün məzənnəsi ilə 375 min manat ödəsə, azadlığa çıxa bilər. Lakin Əhməd Mirzəyev deyib ki, tələb olunan məbləğdə vəsaiti yoxdur. Bir müddət sonra Təhsin Ağayev Əhməd Mirzəyevə xəbər verib ki, onu azad etmək üçün yol tapıblar.
İş adamına məxsus, Bakıda yerləşən “Kormçi” restoranı “Koza Nostra”nın “obşak”ı sayılan “AG Bank”a girov qoyub 275 min manat kredit alıblar. Çatışmayan 100 min manatı da Əhməd Mirzəyevin yaxınlarını ödəməyə razı salıblar. Beləcə  Əhməd Mirzəyev 27 gün MTN təcridxanasında saxlanılandan sonra bandadakı məhkəmə tibb eksperti “səhhəti həbsdə saxlanılmağa imkan vermir” rəyini verib və o, istintaq dövründə azad edilib.
Amma banda üzvləri ittihamı da geri çəkməyiblər. Qaçaqmalçılıq ittihamı ilə barəsindəki qondarma cinayət işini Bakı Ağır Cinayətlər Məhkəməsinə, oradakı öz hakimlərindən olan Əfqan Hacıyevə ötürüblər.
Əhməd Mirzəyev istintaqa ifadəsində bildirib ki, Əfqan Hacıyev ondan 100 min dollar tələb edib, əvəzində şərti cəza veriləcəyini bildirib.
Hakim iş adamına deyib ki, “sənə bəraət verə bilməyəcəyəm, ancaq səni şərti məhkum etmək üçün bu qədər pul lazımdır”. İş adamı iddia edir ki, aralarındakı razılaşmaya əsasən 70 min manatı alandan sonra Əhməd Mirzəyevə 5 il şərti cəza təyin edib.
Lakin “baş briqadir” Mövlam Şıxəliyev bundan sonra da Əhməd Mirzəyevdən əl çəkməyib. Sürücüsünü ara-sıra onun “Santexmax” mağazasına göndərməklə kafel-metlax alıb, pulunu isə ödəməyib. Həbsindən sonrakı 5 il ərzində Əhməd Mirzəyevin mağazasından Mövlam Şıxəliyevin imarətlərinə 26 min manatlıq kafel-metlax daşınıb. İş adamı pulu ödənməyən həmin kafel-metlaxın qaimələrini də istintaqçılara təqdim edib.
Üzərinə həbs qoyulan əmlaklarının ümumi dəyəri 20 milyon manatı aşır!
Cinayət dosyesinin içində "baş briqadir"in barəsində maraqlı bir sənəd - əmrdən çıxarış var. Məlum olur ki, MTN-dəki vəzifəsinə təyinat alana qədər sahə müvəkkili olmuş Mövlam Şıxəliyevin adında cəmi 1 ev olub. Baş briqadir olduğu dönəmdə isə o, böyük bir siyahılıq əmlaka sahiblənib. İşin içindəki əmlak siyahısından belə aydın olur ki, təkcə müəyyən edilərək üzərinə həbs qoyulan əmlaklarının ümumi dəyəri 20 milyon manatı aşır.