Ondan ayrılan sevgilisinin tanışlarını vintaçanla vuran şəxs hakim qarşısına çıxarılıb. Onun vurduğu şəxslərdən biri qızın yeni sevgilisi olub.
Sozcu.info xəbər verir ki, Bakı Ağır Cinayətlər Məhkəməsinda Cinayət Məcəlləsinin 126.2.4 (Xuliqanlıq niyyəti ilə qəsdən sağlamlığa ağır zərər vurma) və 221.3 (Xuliqanlıq) maddələri ilə təqsirli bilinən Səttar Rüstəmovun cinayət işi üzrə məhkəmə araşdırması başa çatıb.
Məhkəmə istintaqı zamanı məlum olub ki, Səttar kafedə tanış olduğu Lalənin (ad şərtidir) başqa şəxslə münasibət qurmasına görə qısqanıb. Hadisə Binədəki “Şeş qoşa” restoranındakı tanışlıqdan başlayıb.
“Lalə həmin kafedə ofisiant işləyirdi. Bir müddət sevgi münasibətimiz oldu. Bir gün gecə vaxtı maşınla onu işdən evlərinə apardım. Onu düşürəndən sonra gördüm ki, evə girmədi. Dedi ki, siqaret almağa gedir. Onu maşınla mağazaya apardım. Qayıdanda Lalə özünü şübhəli apardı. Yolda kafedən tanıdığım Elmirin bir oğlanla dayandığını gördüm. Lalə dedi ki, Elmirə qarşı yalandan sevgili rolu oynayıb pul almaq istəyir. Mən razılaşmadım. Elmirə yaxınlaşıb maşına oturmasını dedim. Lalə yalandan hay-küy qopardı ki, guya mən onu maşına zorla mindirmişəm. Bu zaman əsəbləşib maşının baqajındakı baltanı götürdüm”- deyən Səttar bildirib ki, məqsədi Laləni qorxutmaq olub.
Lalənin müştəri kimi tanıdığı Elmir Vəzirov və Həmid Babayev onu qorumağa çalışıb və baltanı Səttarın əlindən alıblar.
Səttar daha sonra maşından vintaçan götürüb və Həmidlə Elmiri vuraraq oradan qaçıb.
Məhkəmədə ifadə verən Lalə isə Səttarın dediklərindən fərqli danışıb.
O bildirib ki, Səttar sərt və aqressiv olduğu üçün iki il əvvəl ondan ayrılıb. Lakin Səttar kafeyə gələrək onunla barışmaq istəyib.
“Buna razılıq vermədim. Hadisədən bir gün əvvəl Elmir mənə görüşmək istədiyini dedi. Razılaşıb görüşə gedəndə Səttar məni yolda görüb maşına minməyimi istədi. Hay-küy salacağından qorxub maşına mindim. Yolda Səttar Elmiri gördü. Sonra aralarında mübahisə yarandı. Səttar mənə və Elmirə hücum çəkdi. Elmiri yaraladı. Tanışım Arifə zəng vurdum o, bizi xəstəxanaya apardı”.
Məhkəmənin hökmü ilə Səttar 7 il 6 ay cəza alıb.