Bakı Ağır Cinayətlər Məhkəməsi məlumat yayıb.
Sozcu.info-nun xəbərinə görə, məlumatda deyilir:
“Kütləvi informasiya vasitələrində yerləşdirilmiş “Əfqan Hacıyevin həbsə göndərdiyi vətəndaşın təqsirsizliyi üzə çıxdı - bilə-bilə qanunsuz hökm çixaran hakim cəzalanacaqmı?” başlıqlı məqalədə qeyd olunub ki, “Azərbaycanın ən amansız hakimlərindən biri kimi tanınan Bakı Ağır Cinayətlər Məhkəməsinin sədr müavini Əfqan Hacıyevin bilə-bilə qanunsuz hökm çıxararaq 7 il 6 ay azadlıqdan məhrumetmə cəzasına məhkum etdiyi vətəndaşın təqsirsizliyi üzə çıxıb. Ağazadə haqqında 7 il 6 aylıq azadlıqdan məhrumetmə hökmünü Bakı Ağır Cinayətlər Məhkəməsinin sədr müavini Əfqan Hacıyev çıxarıb. Onun adı bir sıra qalmaqallı işlərdə hallanıb.
Eyni zamanda son illərdə həbs olunan yüksək vəzifəli məmurların işləri də Hacıyevə həvalə olunur. Hüquq müdafiəçisi Leyla Yunus, keçmiş Baş prokuror Eldar Həsənov, Beynəlxalq Bankın sabiq rəhbəri Cahangir Hacıyev və Gəncənin keçmiş icra başçısı Elmar Vəliyevə qarşı sui-qəsddə suçlanan Yunis Səfərova da ömürlük cəzanı o təyin edib. Azərbaycanın cinayət qanunvericiliyində hakimin bilə-bilə qanunsuz hökm qətnamə, qərardad çıxarması həmin hakim haqqında cinayət məsuliyyəti müəyyən edib.
Qanunvericiliyə görə, əgər bu hökm şəxsin azadlığının məhdudlaşdırılması ilə nəticələnibsə, həmin hakimi 8 ilədək həbs gözləyir.
Bəs görəsən, Azərbaycanın Məhkəmə-Hüquq Şurası Əfqan Hacıyev barəsində intizam icraatı başlayacaqmı?”
Bakı Ağır Cinayətlər Məhkəməsi bu məqalə və “Facebook” sosial şəbəkəsində yerləşdirilmiş eyni məzmunlu paylaşımla bağlı bildirir ki, Ağazadə Nurlan Bəylər oğlunun Cinayət Məcəlləsinin 263-1.3 və 264-cü maddələri ilə təqsirləndirilməsinə dair cinayət işinə Bakı Ağır Cinayətlər Məhkəməsinə baxılıb, iş üzrə təklif olunan bütün sübutlarla yanaşı məhkəmə öz təşəbbüsü ilə də mobil telefon operatorlarına sorğular verərək iş üçün əhəmiyyətli olan halları araşdırıb.
Həmin sübutlar əsasında Bakı Ağır Cinayətlər Məhkəməsinin 10 fevral 2021-ci ildə ittiham hökmü çıxarılaraq Nurlan Ağazadəyə 4 il nəqliyyat vasitəsi hüququndan məhrum etmə və 7 il 6 ay azadlıqdan məhrum etmə cəzası təyin edilib.
Digər birinci instansiya (rayon-şəhər) məhkəmələrindən fərqli olaraq Bakı Ağır Cinayətlər Məhkəməsində işlərə kollegial qaydada üç hakim tərəfindən baxılaraq qərar qəbul edilir.
Qeyd etmək istəyirik ki, Azərbaycan Respublikasında üç pilləli məhkəmə sistemi mövcuddur. Bu sistemə daxil olan apellyasiya məhkəməsi tam hüquqlu məhkəmə olaraq birinci instansiya məhkəməsinin hökm və qərarlarını ləğv etmək səlahiyyətinə malikdir.
Bu mənada apellyasiya instansiya məhkəmənin birinci instansiya məhkəməsinin qərarını ləğv etməsi hakimin və ya hakimlərin cinayət məsuliyyətinə səbəb olması barədə çıxışlar ədalət mühakiməsinin həyata keçirilməsinə, hakimlərin müstəqilliyi və toxulmazlığına müdaxilə olunması ilə yanaşı məhkəmə hakimiyyətinin nüfuzuna kölgə salır.
Bu kimi hallarda xüsusilə həssas olmağa və cəmiyyətə spekulyativ çıxışlara yol verilməməsi xahiş olunur".