Martın 5-də keçirilmiş Yeni Azərbaycan Partiyasının VII qurultayı ölkəmizin tarixində mühüm hadisə kimi qeyd edilməlidir. Qurultayın böyük əhəmiyyət kəsb etdiyini Azərbaycan Prezidenti, Yeni Azərbaycan Partiyasının sədri İlham Əliyevin tədbirdəki videoformatda çıxışı zamanı da gördük. Dövlət başçısı rəhbərlik etdiyi partiyanın ümummilli lider Heydər Əliyevin şəxsiyyəti ətrafında yarandığını, ölkəmizin inkişafı üçün böyük işlər gördüyünü qeyd etdi. Eyni zamanda, qurultayda Azərbaycanın Vətən müharibəsində şanlı qələbə qazandığı, bölgədə yeni vəziyyət yarandığı və bu reallığa uyğun addımlar atılmasının vacibliyi vurğulandı. Prezident xatırladıb ki, son 3 il ərzində ölkədə prezident və parlament seçkiləri keçirilib: "…Bu gün Azərbaycan genişmiqyaslı islahatlar aparan ölkədir və biz görürük, gündəlik həyatda, ölkəmizin iqtisadi göstəricilərində, sosial sahədə əldə edilmiş nailiyyətlərdə görürük ki, bu islahatların çox böyük əhəmiyyəti var. Eyni zamanda, ictimai-siyasi iqlimin sağlamlaşdırılmasında da bizim təşəbbüslərimizin, islahatlarımızın böyük rolu var". Prezident çıxışında qeyd etmişdir ki, qarşıda duran bəzi vəzifələrlə öz fikirlərimi həm partiya üzvləri ilə, həm Azərbaycan xalqı ilə bölüşməklə əlbəttə ki, bütün siyasi qüvvələri, bütün ictimaiyyəti geniş diskussiyaya çağırıram. Buna ehtiyyac var. Ona görə də bütün addımlarımızı düzgün atmalıyıq ki, daima biz qələbə qazanaq. Daima Azərbaycan bayrağı yüksəklərdə olsun.
Təbii ki, Yeni Azərbaycan Partiyası ölkəmizin tarixində danılmaz xidmətlər göstərib. Regionun ən monolit təşkilatı olan YAP-ın adı ulu öndər Heydər Əliyevlə bağlıdır. Partiya Heydər Əliyevin ətrafında yaradılıb, onun siyasi təcrübəsi, biliyi, xidmətləri, vətənpərvərliyi və öz xalqına sadiqliyi Azərbaycanın mütərəqqi insanlarını onun ətrafında birləşdirib. Qurultaydakı nitqində bu barədə danışan Prezident qeyd etdi ki, Heydər Əliyevin siyasi fəaliyyətinin Naxçıvan dövrü də xüsusi önəm daşıyır. Çünki o vaxt ermənilər nə qədər çalışsalar da, Naxçıvanda öz istəklərinə nail ola bilmədilər. Halbuki Qarabağdan sonra onların növbəti hücum hədəfi Naxçıvan idi. Heydər Əliyev və onun ətrafında birləşmiş insanlar Naxçıvanı qoruya bildilər, düşməni yerində oturtdular.
Dövlət başçısı partiyanın VI qurultayından keçən otən illər ölkəmiz və bölgəmiz üçün həlledici olduğunu bildirdi. Bu illər ərzində ölkə həyatında bir sıra mühüm hadisələr baş verib. Ən önəmlisi isə ərazi bütövlüyümüzün bərpa edilməsi, Vətən müharibəsində parlaq Qələbənin qazanılmasıdır. Prezident İlham Əliyev qeyd etmişdir ki, Azərbaycan öz ərazi bütövlüyünü bərpa etdi, tarixi ədaləti bərpa etdi, işğalçıları əzəli torpaqlarımızdan qovdu və beləliklə, tarixi ədalət bərpa olundu. Bizim şanlı Qələbəmiz qürur mənbəyimizdir. Bu gün bizim Qələbəmiz dünyanın aparıcı ölkələrinin aparıcı ali məktəblərində öyrənilir. Azərbaycan xalqı birlik, həmrəylik göstərdi. Azərbaycan Ordusu rəşadət, qəhrəmanlıq, peşəkarlıq göstərdi. Bütün xalqımız bir yumruq kimi birləşib, düşmənə sarsıdıcı zərbələr vurub öz tarixi torpaqlarını işğalçılardan azad etmişdir. Biz bu tarixi missiyanı yerinə yetirdik… Bizə tam, mütləq qələbə lazım idi və bu mütləq qələbəni qazandıq, düşməni darmadağın etdik, düşmən ordusunu məhv etdik və istədiyimizə nail olduq.
1992-ci ildə yaradılan Yeni Azərbaycan Partiyası cəmiyyətimizdə böyük nüfuza sahib olan partiyadır. Ulu öndərimiz Heydər Əliyevin yaratdığı Yeni Azərbaycan Partiyası, xalqımızın və ölkəmizin həyatını kökündən dəyişdirib, eyni zamanda, siyasi mübarizələrlə dolu şərəfli bir yol keçib. İqtidar partiyası olaraq, Yeni Azərbaycan Partiyası Heydər Əliyev siyasətinin avanqard qüvvəsi kimi, xalqımızın qarşısında dayanan vəzifələrin həll edilməsinə layiqli töhfəsini verib və bundan sonra da verəcək. Öz sıralarında ictimaiyyətin bütün təbəqələrini birləşdirən Yeni Azərbaycan Partiyası Ümummilli lider Heydər Əliyevin parlaq ideyalarının daşıyıcısı kimi cəmiyyətdə aparıcı rolunu gündən-günə daha da möhkəmləndirməkdədir. Yeni
Azərbaycan Partiyası xalqın partiyasıdır. Bu gün bu partiya ölkəmizdə həyata keçirilən hüquqi dövlət, vətəndaş cəmiyyəti quruculuğu, demokratik inkişaf prosesində yaxından iştirak edir, müstəqil Azərbaycan dövlətinin yüksəlişinə, tərəqqisinə öz töhfələrini əsirgəmir.
Bu isə, təbii ki, istər-istəməz həmin ölkələr arasında, hətta əvvəlki dövrlərdə bir-biri ilə o qədər isti münasibətləri olmayan ölkələr arasında da əməkdaşlığı labüd edir. Ona görə son vaxtlar bizim siyasətimizlə bağlı dünyada gedən düzgün təhlillər və bizim fəaliyyətimizə verilən yüksək qiymət həqiqəti tam əks etdirir. İkinci Qarabağ müharibəsinin nəticələri də bölgə üçün yeni reallıqlar yaradıb. Artıq bütün bölgədə yeni əməkdaşlıq imkanları yaranıb. Eyni zamanda, uzunmüddətli sülhün təmin edilməsi və ölkəmizin yeni dövrə qədəm qoyması üçün çox önəmli şərtlər, imkanlar yaranıb.
İnanırıq ki, bu imkanlar da ölkəmizin ən monolit siyasi təşkilatı olan YAP-ın rəhbərliyi ilə uğurla reallaşdırılacaq. Biz çalışacağıq ki, YAP sədrinin qarşıya qoyduğu vəzifələri şərəflə yerinə yetirək.
Zəkiyə Hacıyeva,
Suraxanı Rayon Heydər Əliyev Mərkəzinin məsul əməkdaşı