Azərbaycan xalqının Ümummilli Lideri Heydər Əliyev! Azərbaycanın xalq olaraq yaşaması üçün çalışan fədai! Hər zaman insanlığa, insanlararsı xoş münasibətə, dostluğa böyük dəyər verən uzaqgörən siyasətçi dünyaya 100 ildə bir dəfə gələn insanlardan idi. Azərbaycanın payına düşmüşdü Ulu Öndər. Tanrının Azərbaycana hədiyyəsi idi O! 
İnsanlara düzgün yol göstərən mayak idi O! Yolunu azanları düz yola gətirən ağsaqqal idi O! Böyük idi! Dahi idi O! Dahiliyi hər addımında, hər kəlməsində, hər öyüdündə, hər nəsihətində idi. Dahiliyi Azərbaycanın bütövlüyünü qoruya bilməsində idi! Sülh göyərçini kimi qanadları altına aldı Azərbaycanı! Qorudu, yaşatdı, dünyaya sülh ilə tanıtdı Vətənini! İnsanların bir birinə olan laqeyd münasibəti yandırdı onu. Şam kimi yandı, Ölkəsinin yaşaması üçün əritdi özünü şam kimi. Lakin qoymadı vətəndaş qarşıdurması baş versin. Qoymadı qardaş qırğını ilə yaddaşlarda qalsın Azərbaycan! Çünki, sülh göyərçini idi! 
Ölkə daxilində vətəndaş qarşıdurmasına səbəb ola biləcək hadisənin qarşısını aldı, ölkədə davam edən hakimiyyət böhranına, anarxiya və özbaşınalığa son qoydu Ulu Öndər! 1993-cü ilin may-iyun aylarında ölkədə vətəndaş müharibəsi və müstəqilliyin itirilməsi təhlükəsi yarandığı zaman, Azərbaycan xalqının tələbi ilə Heydər Əliyev hakimiyyətə gətirildi. 
“Dövlətlər mövcud olduqca müharibə qaçılmazdır. Əgər müharibə varsa, iki tərəfdən biri uduzmalı, ya da qalib gəlməlidir” kəlamı Albert Enşteynin müharibə haqqında dedikləridir.  
 Heydər Əliyev hər zaman qalib gəlməyə adət edən sərkərdə kimi “məğlubiyyət” sözünu özündən çox uzaq tuturdu. O vətən daxilində vətəndaşların bir-biriylə müharibəsini özünə bağışlaya bilməzdi! O sadəcə buna yol verməzdi. Anadan olduğu, böyüyüb boya başa çatdığı Azərbaycanın daxildən parçalanmasına yol verə bilməzdi! 
Ulu Öndər! Müharibələrə Yox deyən vətən eşqli, sülh məramlı, tarix yazan, özündən sonra izini qoyan, izi ilə addımlayanlara sanki gözünü qoyan Ulu Öndər! 
Tarixlərdə yaşayacaq tarixi şəxsiyyət! Onun sayəsində bu gün bütöv olan dövlət düşmən qarşısına dəmir yumruq kimi çıxdı! Heydər Əliyevin davamçısı olan Ali Baş Komandanımız İlham Əliyevin Komandanlığı ilə yumruq kimi birləşdi Xalq! 
Xalqı xalq edən onun dəyərləridir! Özümüzə dəyər verək. Xalqımıza dəyər verək. Azərbaycan üçün can qoyan insanlara dəyər verək. Dəyər verək fədailərə! Dəyərlərimizi yaşatdıqca biz xalq olaraq yaşayacağıq! Bunu Ondan öyrəndik-Ulu Öndərdən! Öyrənirik! Öyrənəcəyik!
Səfufə Rəhimova,
Bünyadəli Qulamoğlu adına 285 nömrəli tam orta məktəbin direktoru