9 aprel 2022-ci il tarixində Dünya Ahıska Türkləri Birliyi (DATÜB) İdarə Heyətinin Özbəkistanda növbəti toplantısı keçirilib. 
Sozcu.info DATÜB-ün Mərkəzi Qərargahına istinadən xəbər verir ki, Özbəkistanın paytaxtı Daşkənddə baş tutan toplantı DATÜB Başqanı Ziyəddin Kassanovun sədrliyi ilə keçirilib.
İclasda DATÜB Başqanı Ziyəddin Kassanov, birinci müavini İsmayıl Əhmədov, müavini İsmail Mamet, Qırğızıstan nümayəndəsi Atamşa Dursunov, Türkiyə nümayəndəsi İbrahim Ağara, Amerika nümayəndəsi Şuhrat Temirov, Rusiya nümayəndəsi Mizam Bədəlov, Özbəkistan təmsilçisi Rüstəm İbrahimov, Azərbaycan nümayəndəsi Xalid Xəlilov, DATÜB İdarə Heyətinin üzvü Mövlud İşık, Qazaxıstan nümayəndəsi və Gənclər Təşkilatının rəhbəri İsmixan Kassanov, DATÜB-ün baş katibi Fuat Uçar, DATÜB Ağsaqqallar Şurasının sədri Ömər Salman, DATÜB Məclisinin sədri Sadır Eibov və müavini İbrahim Məmmədov, DATÜB Qadınlar Təşkilatının sədri Refika Muhammedgil, “Ahıska” qəzetinin və “Türk Birliyi” jurnalının baş redaktoru Rövşən Məmmədoğlu, Gənclər Təşkilatı İdman Komissiyasının sədri Əziz Ajiyev iştirak ediblər.
İdarə Heyətinin toplantısında əsas müzakirə mövzusu Rusiya-Ukrayna müharibəsi zamanı çətin vəziyyətdə qalan Axısxa Türklərinin təxliyyəsi ilə bağlı görülən işlər, gələcək planlar və tarixi vətənləri olan Axısxaya dönüşü ilə bağlı həyata keçirilən fəaliyyət, DATÜB ölkə nümayəndələrinin fəaliyyət proqramları, Ramazan ayı ərzində keçiriləcək iftar proqramları, təqdim edilən istefa ərizələrinin təsdiqi, DATÜB Azərbaycan nümayəndəsinin təyin edilməsi qərarı, ölkə nümayəndəliklərinin rəsmi açılışı, komissiyaların yaradılması, sosial media və Başqan sözçüsünün təyini məsələsi, Avropa Şurasının işi ilə bağlı məsləhətləşmələr olub.
“Ukraynada çətin vəziyyətdə olan Axısxa Türklərinin Türkiyəyə təxliyyəsi, yaşayış yeri və digər problemlərinin həlli ilə bağlı millətimizə dəstək olan prezidentimiz Rəcəb Tayyib Ərdoğana, xarici işlər naziri Mövlud Çavuşoğluna, daxili işlər naziri Süleyman Soyluya, Miqrasiya İdarəsinin rəhbəri Savaş Ünlüyə və Türkiyə dövlətimizin digər qurum və təşkilatlarına təşəkkür edildi.
DATÜB-ün Azərbaycan nümayəndəsi vəzifəsinə təyin olunan Xalid Xəlilovu və DATÜB-ün Qazaxıstan nümayəndəsi İsmixan Kassanovu təbrik edir, onlara yeni vəzifələrində uğurlar arzulayırıq”, - deyə DATÜB Mərkəzi Qərargahının açıqlamasında vurğulanır.