Bu gün, İyulun 25-i Vətən müharibəsinin Şəhidi Baş leytenant Hüseynov Orxan Bəhmən oğlunun 31 yaşı tamam olur.

Sozcu.info xəbər verir ki,Rayon İcra Hakimiyyəti başçısının birinci müavini Rəşad Hacıyev, müavin Fuad Cəbrayılov, YAP Suraxanı Rayon Təşkilatının sədri Vüqar Seyidov, RİHBA-nın şöbə müdirləri, Əmircan qəsəbəsi Bələdiyyəsinin sədri Şəhidin əziz xatirəsini ehtiramla anaraq ailə üzvlərini ziyarət etmişlər.

Qeyd edək ki, 2008-ci ildə Cavanşir Rəhimov adına 146 saylı tam orta məktəbi bitirən Hüseynov Orxan Bəhman oğlu 2009-cu ildə Heydər Əliyev adına Azərbaycan Ali Hərbi Məktəbinə qəbul olmuş və 2013-cü ildə hərbi məktəbi fərqlənmə diplomu ilə bitirmişdir. 2013-2014-cü illərdə Müdafiə Nazirliyinin Təlim və Tədris Mərkəzində təkmilləşdirmə kursu keçərək, ixtisasını daha da mükəmməl səviyyəyə çatdırmış və Qusar şəhərində yerləşən N saylı hərbi hissədə tağım komandiri olaraq hərbi xidmətə başlamış, düşmənlə ən yaxın məsafədə olan postlarda qulluq etmişdir. Son dərəcə istiqanlı və savadlı zabit, öz nümunəvi xidməti ilə hər zaman xüsusi rəğbət qazanan Orxan yüksək nailiyyətlərinə görə fəxri fərmanlarla təltif olunmuşdur. 

Orxan Vətən müharibəsində döyüş zamanı Suqovuşanın azad olunmasında 12 düşmən postunu ələ keçirərək və yaralı əsgərlərini minalı sahələrdən çıxararaq böyük şücaət göstərmişdir. Düşmənin minatanlarının atəşi nəticisində çoxlu sayda qəlpə yarası alan Orxan oktyabrın 5-də Şəhidlik zirvəsinə ucalmışdır.

Sozcu.info