Cinayət Məcəlləsi borclular ƏMDK, Nizami RİH rəhbərliyinin cəzalandırılmasını doğrulayır
Kərəm Həsənov, Rafiq Cəlilov, Tahir Budaqov, Arif Qasımov, Həsən Sadıxovu  5 il həbs gözləyir
Konstitusiyanın 129-cu maddəsi məhkəmə qərarlarının dövlətin adından çıxarıldığını və məcburi olduğunu, məhkəmə qərarlarının icra olunmamasının qanunla müəyyən edilmiş məsuliyyətə səbəb olduğunu doğrulayır. Qanunla müəyyən edilmiş cinayət  məsuliyyəti isə Cinayət Məcəlləsinin 306-cı (“Məhkəmənin  hökmünü, qərarını  yaxud digər aktını icra etməmə”) maddəsində nəzərdə tutulur . Sözügedən maddənin tələbinə görə qanuni qüvvəyə minmiş məhkəmə qətnaməsini, hökmünü, qərarını, qərardadını və ya əmrini qərəzlə icra etməmə və ya həmin məhkəmə aktlarının icrasına mane olma vəzifəli şəxs tərəfindən törədildikdə 3 ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə və ya edilməməklə 5 min manatdan 7 min manatadək miqdarda cərimə və ya iki ilədək müddətə islah işləri və ya 3 ildən 5 ilədək müddətə azadlığın məhdudlaşdırılması və ya 3 ildən 5 ilədək müddətə azadlıqdan məhrumetmə ilə cəzalandırılır. Di gəl, dövlətin adından çıxarılan məhkəmə qərarlarını icra etməyən vəzifəli şəxslər nəinki cəzalandırılır, əksinə, daha yüksək görəvə irəli çəkilirlər.
Xətai məhkəməsinin 26.05.2009-cu il tarixli , 2 (011)-451/09 saylı qətnaməsinin borclular ƏMDK  (hazırda İqtisadiyyat Nazirliyi yanında Əmlak Məsələləri Dövlət Xidməti ) və Nizami RİH (MKTB) tərəfindən qərəzlə icra olunmamasına polis və prokurorluq orqanlarının hüquq qiyməti verməkdən imtinası tələbkar Qarabağ qazisinin həmin məhkəmədə “icraya mane olan borcluların və icra şöbələrinin barəsində məsuliyyətin müəyyən edilməsi və Nizami rayonu, Bəhruz Nuriyev -10-dakı otaqların istifadəsinə verilməsi” tələbi ilə iddia qaldırmasına nədən olub. Məhkəmə  (hakim İlqar Əliyev) 21.06.2011 tarixli 2 (011)-855/11 saylı qətnamə ilə məsuliyyətin müəyyən edilməsi üçün xüsusi qərardadla prokurora xəbər verilməsindən imtina edib, amma icranın Bəhruz Nuriyev -10-da davam etdirilməsi barədə 22.07.2011 tarixli icra vərəqəsi verib. Bu qətnamə və icra vərəqəsi nəinki icra edilib, əksinə, 3 il tələbkardan gizlədilib . (?) Özbaşınalığı, Konstitusiyaya, Məcəlləyə hörmətsizliyi göz önünə gətirin, məhkəmə qətnaməsinin icrasına mane olunmasına görə çıxarılan qətnamə, icra və məhkəmə , icra şöbələri, borclular tərəfindən mütəşəkkil qaydada  it-bata salınıb! (?) Çoxillik şikayətlər sonuc vermədiyindən, prokurorluq görəvini yerinə yetirmədiyindən, xeyrinə çıxarılan ikinci məhkəmə qətnaməsindən xəbərsiz olan tələbkar  Qarabağ qazisi Bakı şəhəri Nizami rayon məhkəməsinə “ qanuni qüvvəyə minmiş qətnaməni icra etməkdən imtina edən borclu Nizami RİH  (MKTB) və ƏMDK -nın vəzifəli şəxsləri barəsində Cinayət Məcəlləsinin 306-cı maddəsi ilə cinayət işinin başlanılması üçün  xüsusi qərardadla prokurora xəbər verilməsi”nə ərizə verib. Nizami məhkəməsinin hakimi Ziya Əliyev borcluların adını belə çəkmədən 17.05.2013 tarixli qərardadla ərizəni geri qaytarıb. Bakı Apellyasiya Məhkəməsi  (sədrlik edən hakim Məmməd Məmmədov, Natiq Abbasov və Mədinə Bağırova) 11.07.2013 tarixli qərardadla aşağı instansiyanın qərardadını ləğv edib və işi baxılması üçün məhkəməyə qaytarıb. 9 ildir Nizami məhkəməsi Bakı Apellyasiya Məhkəməsinin ləğv etdiyi işə baxmaqdan imtina edir! 9 ildir hər həftə, hər ay verilən şikayətlər də sonuc vermir. Belə məhkəmə hüquq sistemi olar? Qanuni qüvvəsini almış 2 məhkəmə qətnaməsinin icra olunmaması cinayət məsuliyyətinə nədən olsa da , nə prokurorluq, nə də məhkəmə , qanunu, Konstitusiyanı  Məcəlləni tətbiq etməyi düşünür . Korrupsiyaya qarşı mübarizə baş idarəsi də 11-13 ildir nəinki  cinayət işi qaldırır, heç qəbul et(mə)diyi qərarı da vermir. Hüquq mühafizə,  məhkəmə,  ədliyyə orqanlarının mühafizəsi ilə borclular məhbəs kameraları əvəzinə,  vəzifə kürsüləri ilə ödüllənirlər . ƏMDK sədri prezidentin yanında dövlət nəzarətinə  köməkçi,  icra başçısı baş nazirin yanında Dövlət Statistika Komitəsinin sədri postuna yüksəlib ;  Kərəm Həsənov müavini Rafiq Cəlilovu Cəlilabada başçı, Tahir Budaqov bacanağı Həsən Sadıxovu “JEK” müdirliyindən 1 saylı icra nümayəndəliyinə başçı təyin etdirib. T. Budaqovun ictimai – siyasi şöbənin müdiri görəvinə gətirdiyi, tənqidə görə Qarabağ qazisini təqib edən Əli Axundovu isə Arif Qasımovun başçılığı da yerindən tərpətmədi. Yeri gəlmişkən, Nizami məhkəməsi son 5 ildə Əli Axundovun xüsusi ittiham qaydasında cinayət məsuliyyətinə cəlb edilməsi haqqında şikayəti it-bata salıb. Prokuror prokuror olsa, məhkəmə məhkəmə olsa, qanun qanun olsa, qanuni qüvvəyə minmiş məhkəmə qətnaməsini 13 ildir qərəzlə icra etməyən, məhkəmənin qaziyə verdiyi otaqları saxta şəhadətnamə ilə ələ keçirib,  məhkəmə qərarından 2 il sonra 14 yaşlı uşağın adına özəlləşdirib satan borclular Kərəm Həsənov , Rafiq Cəlilov, Tahir Budaqov, Arif Qasımov, Həsən Sadıxov , Ədliyyə Nazirliyinin Xətai və Nizami icra şöbələrinin məsul şəxsləri , təkcə icradan imtinaya görə 5 il cəza alardılar. Onlarsa cəza əvəzinə, prezidentin yanında kef çəkirlər. İnşallah, keflərinə “soğan doğrayan”  tapılar. ..
Məğrur BƏDƏLSOY