“Vüqar Səfərlini kim himayə edib?” başlıqlı, “Ramiz Mehdiyev və Əli Həsənov istintaqa cəlb oluna bilər” yarımbaşlıqlı yazı “Yeni Sözçü” qəzetinin saytında 18 yanvar, 2021-ci ildə yayılıb. Həmin yazı “Yeni Sözçü” qəzetinin saytındadır və arzu edən bu linkdən (https://sozcu.info/aradrma/16134-vuqar-sfrlini-kim-himay-edib-ramiz-mehdiyev-v-li-hsnov-istintaqa-clb-oluna-bilr.html) oxuya bilər. Qeyd edilən yazının mahiyyəti isə bundan ibarətdir ki, ləğv edilmiş Kütləvi İnformasiya Vasitələrinin İnkişafına Dövlət Dəstəyi Fondunun keçmiş icraçı direktoru Vüqar Səfərlinin bu vəzifəsi 8 il müddətində toxunmaz olması səbəbsiz deyil. Belə ki, 8 il ərzində Vüqar Səfərli Prezident Adminstrasiyasının sabiq rəhbəri Ramiz Mehdiyev və Adminstrasiyanın sabiq şöbə müdiri Əli Həsənov tərəfindən himayə olunub. Buna görə Vüqar Səfərlinin işi ilə bağlı Ramiz Mehdiyev  və Əli Həsənovun da istintaqa cəlb olunacağını gözlənildiyini də qeyd etmişdik. Təəssüf ki, ictimaiyyətin bu gözləntisi özünü doğrultmadı. 
Bir qrup şəxslə qabaqcadan əlbir olub vəzifə səlahiyyətlərindən sui-istifadə edərək dövlətə məxsus ümumilikdə 18 milyon 500 min manat məbləğində pul vəsaitinin mənimsəmə və israf etmə yolu ilə talayan Vüqar Səfərli 10 il 6 ay müddətinə azadlıqdan məhrum olunsa da, Əli Həsənov və Ramiz Mehdiyev məsuliyyətdən kənarda qaldı. Əgər o zaman Əli Həsənov və Ramiz Mehdiyev məsuliyyətə cəlb olunsaydı Azərbaycan Milli Elmlər Akademiyasında indiki vəziyyət yaranmazdı. AMEA-da yaranmış ağır vəziyyəti akademik Y.H.Məmmədəliyev adına Neft-Kimya Prosesləri İnstitutunun direktoru, akademik Vaqif Abbasov çox dəqiq ifadə edib: “Bu qədər hökmdar qaydaları ilə idarə olunan dövr elm tarixində olmayıb”. 
Nüfuzlu akademik hesab edir ki, AMEA-nın ən ağır günlərini yaşaması Nizamnaməyə zidd qaydalarlarla idarə olunması və bunun nəticəsi olaraq idarə olunmaz vəziyyətə çatdırılmasıdır. Akademikin açıqlamasından aydın olur ki, elm tariximizdə ilk dəfədir ki, Rəyasət Heyətində illik hesabatların müzakirəsinə müvafiq institutların direktorları çağırılmır. “Acınacaqlı vəziyyət bütün institutların fəaliyyəti iflic olub”. Yarnmış vəziyyətdən çıxış yolu kimi akademik Vaqif Abbasov Ramiz Mehdiyev AMEA-nın prezidenti vəzifəsindən istefa verməsində görür. Əks halda Ulu öndər Heydər Əliyevin “Azərbaycan xalqının milli sərvəti” kimi dəyərləndirdiyi AMEA-nın məhv olacağı haqqında xəbərdarlıq edən nüfuzlu akademiklə razılaşmamaq mümkün deyil. 
Lakin Azərbaycan Milli Elmlər Akademiyasının işlər idarəsinin sabiq müdiri Elton Məmmədovun açıqlaması belə qəanət yaradır ki, Ramiz Mehdiyevin istefası yetərli olmayacaq, bu şəxs məsuliyyətə də cəlb olunmalıdır. Çünki, Elton Məmmədov Ramiz Mehdiyevi pasport və qeydiyyat şöbəsində işləyən qaynı Qurskaya Levan Yuryeviçlə birləşib ermənilərin Azərbaycan və rus adı ilə pasport almasına şərait yaradıb. Çox maraqlıdır ki, polis polkovniki olan Qurskaya Levan Yuryeviç 2018-ci ildə “Vətən uğrunda” medalı ilə təltif olunub. Bu hadisənin Ramiz Mehdiyevin Prezident Adminstrasiyasının rəhbəri olduğu vaxt baş verdiyini nəzərə alsaq, bu mükafatlandırmanın məhz onun iradəsi ilə gerçəkləşdiyi qənaəti yaranır. Bütün bunlar araşdırılmalıdır. Redaksiyamıza daxil olan məlumata görə vətəndaşların bir qrupu Baş Prokurorluğa müraciət edərək Ramiz Mehdiyevin Vüqar Səfərli və Qurskaya Levan Yuryeviç ilə işbirliyinin yoxlanılmasını tələb edirlər. Bu məlumatı redaksiyamıza verən mənbənin sözlərinə görə, Ramiz Mehdiyev məsuliyyətə cəlb olunmasa Azərbaycanda hüququn üstünlüyü şübhə altına düşəcək. Bu isə dövlətin imicinə ciddi zərbə vuracaq.
Sozcu.info