Son 20 il ərzində (2001-2020-ci illərdə) Azərbaycanda əhaliyə göstərilən ödənişli xidmətlərdən əldə olunan gəlirlər 93,582 mlrd. manat təşkil edib.
"APA-Economics"in Dövlət Statistika Komitəsinin məlumatları əsasında apardığı hesablamalarına görə, hesabat dövründə ödənişli xidmətlərin pik həcmi 2019-cu ildə (9,607 mlrd. manat), ən aşağı səviyyəsi isə 2001-ci ildə (0,498 mlrd. manat) qeydə alınıb.
İllik dinamikaya gəldikdə, göstərilən ödənişli xidmətlərdə ən kəskin artımlar 2006-cı (45,8%) və 2007-ci illərdə (67,7%) qeydə alınıb. Ən kəskin və son 20 ildə qeydə alınan yeganə azalma isə 2020-ci ildə olub – 27,2%. Sözügedən azalma COVID-19 pandemiyası səbəbindən vətəndaşların səfərlərinə, həmçinin bir sıra xidmət sahələrinin fəaliyyətinə qoyulmuş məhdudiyyətlərə görə baş verib.
Qeyd edək ki, sonuncu məlumatlara görə, bu ilin yanvar-iyun aylarında Azərbaycanda əhaliyə göstərilən ödənişli xidmətlərdən əldə olunan gəlirlər 2020-ci ilin müvafiq dövrü ilə müqayisədə 2,3% artaraq 3,535 mlrd. manat təşkil edib.