Artıq 40-a yaxın ölkə vətəndaşlarını və diplomatlarını Ukraynanı tərk etməyə çağırıb. 
Sozcu.info Yenisabah.az-a istinadən xəbər verir ki, siyasi şərhçi Qabil Hüseynli səfirliklərin boşaldıması məsələsini çox təəccüblə qarşılayıb:
"Sanki XXI əsrdə yaşamırıq. Sivilizasiyalı, mədəni xalqlar, yenə də ötən əsrin əvvəllərində olduğu kimi, imperialist ədaları ilə xalqlara yuxarıdan aşağıya baxmaqla hərəkətə edirlər. Güclü bir dövlətin zəif bir ölkəyə hücumu açıqca elan edilib və dünya da bunu qəribə bir tərzdə müşahidə edir.
Üstəlik, beynəlxalq təşkilatların heç biri bununla bağlı bəyanat verib pisləmir. Özündən çıxmış Rusiya dünyanı təhdid edir, dünya isə yalnız buna Ukrayandan səfirliklərinə çıxarmaqla cavab verir”.
“Düzdür, Ukrayna ilə həmrəylik məqamları var, amma dünya bu məsələdə çox çəkingəndir və yeni bir Hitler qarşısında geriyə çəkilir və ciddi bir iradə ortaya qoymur.
İndiyənə qədər hələ bir beynəlxaq təşkilatdan bununla bağlı ciddi bir bəyanatın, pislənmənin görünməməsi, Qərbin özünü Rusiya qarşısında qorxaq aparması adamı dəhşətə salır. Rusiya Ukraynanın ərazilərinin bir qismini işğal edib və bu işğalı indi tamamilə başa çatdırmaq istəyir. Bəşəriyyət isə bu barbar hərəkətlərə elə də bir ciddi müqavimət ortaya qoymur.
Rusiyanın müttəfiqlərinə gəlincə, məsələn, Belarusa, o, yaltaqcasına Rusiyanın əlaltısı kimi çıxış edəcək”, - deyə mütəxəssis yekunlaşdırıb.