Ötən il Gürcüstanda azərbaycanlıların yığcam yaşadıqları Kvemo Kartli (Borçalı) bölgəsində mənfi təbii artım qeydə alınıb.
Sozcu.info-nun yerli bürosu xəbər verir ki, bu barədə Gürcüstanın Milli Statistika İdarəsinin illik hesabatında bildirilib.
Sənədə əsasən, region üzrə doğulanların sayı 5 398, ölənlərin sayı isə 5 565 nəfər təşkil edib. Təbii artım -167-yə bərabər olub. Göründüyü kimi, bölgə əhalisi arasında ölənlərin sayı doğulanların sayından çox olub.
Hesabat ilində Kvemo Kartlidə 3 030 nikah, 1 003 boşanma halı qeydiyyata alınıb. İllik müqayisədə nikahların sayı 1 290, boşanmaların sayı isə 298 hal artıb.
Gürcüstan üzrə mənfi təbii artım isə 13 960 nəfər təşkil edib. Neqativ təbii artım Acarıstan Muxtar Respublikası istisna olmaqla bütün bölgələrdə qeydə alınıb.