• "Onlarla insan Norveçin “Mühafizəkarlar partiyası”nın Gürcüstanın məhkum olunmuş eks-prezidenti Mixail Saakaşvilini demokratiya və insan haqları uğrunda mübarizə sahəsində mükafatla təltif etməsinə etiraz olaraq toplaşıb".

Aksiya Tbilisinin mərkəzində yerləşən Norveçin Gürcüstandakı səfirliyinin yaxınlığında keçirilir. Aksiyanın təşkilatçısı Gürcüstanın Nəzarət Palatasının keçmiş rəhbəri, Saakaşvilinin prezidentliyi dövründə həbs edilmiş Sulxan Molaşvilinin qardaşı Tornikedir.

Aksiya iştirakçıları Norveçin Gürcüstandakı səfiri ilə görüş və mövqe bildirilməsini tələb edirlər. Norveç hökumətinin Mixail Saakaşviliyə mükafat verən “Mühafizəkarlar partiyası” ilə razı olub-olmamasını bilmək istəyirlər.

Aksiya iştirakçılarının sözlərinə görə, Saakaşvilinin prezidentliyi dövründə ölkədə insan haqları pozulub və bundan sonra “Mixail Saakaşvili demokratiyanın çırağıdır” demək yolverilməzdir.

Polis Norveç səfirliyi qarşısında səfərbər edilib. Mükafatlandırma mərasimində eks-prezidentin anası Giuli Alasaniya və kiçik oğlu Nikoloz Saakaşvili iştirak ediblər.

Gürcüstanın baş naziri İrakli Qaribaşvili Saakaşvilinin mükafatlandırılmasını gürcü xalqına qarşı təhqir adlandırıb.