Həbsdə olan Gürcüstanın keçmiş prezidenti Mixail Saakaşviliyə qarşı həbsxanada işgəncə videoları yayılıb. Gürcüstan Ədliyyə Nazirliyinin Xüsusi Penitensiar Xidməti Saakaşviliyə qarşı fiziki güc tətbiq edilərək həbsxana xəstəxanasına zorla aparılmasının görüntülərini paylaşıb.
Aclıq aksiyası keçirən Mişaya qarşı, ehtimal edilir ki, onun zorla yedizdirilməsi üçün belə zor tətbiq edilib. Ona qarşı bu cür zorakı davranış ciddi müzakirələrə səbəb olub. Bu, düşünülmüş, planlaşdırılmış işə bənzəyir. Məqsəd nə ola bilər? Saakaşvilinin əzabkeş obrazını yaratmaq, onu xalqa daha çox sevdirmək, yoxsa?
Siyasətdə belədir: hakimiyyət tərəfindən təzyiqə məruz qalan siyasətçi avtomatik ictimai rəğbət qazanır. Yəni o səhnələr teatrallaşdırılmışa bənzəyir. Bu videolar Saakaşviliyə beynəlxalq aləmdə nə kimi immunitet qazandıra biləcək? Keçmiş prezident yayılan videolardan sonra azadlığa çıxa, ölkəsində sərbəst siyasi fəaliyyətlə məşğul ola biləcəkmi?
“Ukrayna Gürcüstandan öz vətəndaşı olan Mixail Saakaşviliyə qarşı ləyaqətlə davranmasını tələb edir və ona qarşı fiziki güc tətbiqini qəbuledilməz hesab edir”.
Ukrayna xarici işlər nazirinin müavini Nikolay Toçitski Gürcüstanın bu ölkədəki səfiri Giorgi Zakaraşvili ilə görüşü zamanı belə deyib. Bildirib ki, görüş zamanı nazir müavini Gürcüstan tərəfini Ukraynanın mövqeyi ilə bağlı məlumatlandırıb. Toçitski vurğulayıb ki, Ukrayna Gürcüstanın beynəlxalq hüquqa uyğun olaraq təminat verməyə borclu olduğu M. Saakaşvilinin hüquqlarına riayət olunmasına bundan sonra da xüsusi diqqət yetirəcək.

Aygün Muradxanlı: “Proses daha sürətli olacaq”
Siyasət yazarı Aygün Muradxanlı Mişaya hərtərəfli dəstəyin verildiyini qeyd etdi: “Saakaşvili həbs edilən ilk gündən bəlli idi ki, onu həbsxanada çox saxlamaq mümkün olmayacaq. Birincisi ona görə ki, o, Ukrayna vətəndaşıdır, yüksək rütbəli məmurdur və Zelenski onu bütün olanlara baxmayaraq vəzifədən azad etməyib. Saakaşviliyə ilk gündən dəstəyini ifadə edən Zelenski bu gün rəsmi Tiflisə zorakılığı dayandırmaq çağırışı edib. Gürcüstan müxalifətinin də mövqeyi qətidir - ilk gündən Mixail Saakaşvilinin azadlığa çıxma tələbləri irəli sürülür, neçə dəfə həm Tiflisdə, həm Rustavidə aksiya keçirilib. Bundan başqa gürcü ictimaiyyəti eks-prezidentə dəstək verir. Ölkənin ən tanınan simalarından biri, hər zaman konkret mövqeyi və Rusiya əleyhinə çıxışları ilə fərqlənən Vaxtanq Kikabidze məsələ ilə bağlı noyabrın 11-də dərhal Kiyevə yola düşüb. Bu qədər etiraz və dirənişə Gürcüstanda marağı olan güclər səssiz qala bilməz, təbii. Artıq ”Gürcü Arzusu"nun xaç atası Bidzina İvanişvilinin sürətli vizadan istifadə edərək Vaşinqtona getdiyi deyilir. Bu, Ağ Evin rəsmi Tiflisdən hesabat istəməsi deməkdir. Bu görüntülərin yayılmasına fərqli baxanlar da var. Bəzən iddia olunur ki, bu, əzabkeş Saakaşvili obrazı yaratmaq üçündür. Ya da onun döyülməsi ilə gücsüz, zəif Saakaşvili obrazı yaradıldığı iddia olunur. Baxışlar müxtəlifdir, amma mənzərə onu deyir ki, Saakaşvili bu qədər basqıya baxmayaraq bütün mənalarda dirəniş göstərir, üstəlik rəsmi Tiflisin qanunsuz əməlləri ilə bağlı görüntüləri dərhal dünya ilə bir etmək gücündədir. Gözlənilir ki, beynəlxalq insan haqları qurumları da kəskin bəyanatlar verəcək. Yəni həbsdə olmasına baxmayaraq Saakaşvili artıq Gürcüstan siyasətində qarşısıalınmaz faktordur və hakimiyyət bundan sonrakı bütün addımlarında bu reallığı nəzərə almaq zorundadır. Son söz isə gürcü xalqınındır. Bu ağır təhqir həm də onu dəstəkləyənlərədir. Əgər xalq təhqirə geniş, ölkə miqyaslı etiraz aksiyaları ilə cavab versə, sözsüz ki, proses daha sürətli olacaq".

Azər Hüseynov: “Qarşısında dayananlar bu məsələdə ona uduzur”
AĞ Partiya başqanının müşaviri, siyasi şərhçi Azər Hüseynov isə məsələyə belə münasibət bildirdi: “Keçən müsahibələrimin birində Saakaşviliyə olan münasibətim bir az fərqli qarşılanmışdı. Saakaşvilini şəxsiyyət və siyasətçi olaraq təhlil etsək, onun əsas gücünü kəşf edə bilərik: qeyri-standart olması. Qarşısında dayananlar bu məsələdə ona uduzur. İkincisi, dirəncli biri olmasıdır. Əsas məqsədi situasiyanı gündəm etməkdir. Gürcüstana gəldi. Mitinq oldu. Amma lazımi mərhələyə çatmadı. İndi yola davam edir. Aclıq və işgəncə iddiası, yayılan kadrların mövcudluğu və Saakaşvili gündəmi yenə tutur. Amma maraqlı odur ki, seçkilərdə sandıqdan çıxa bilmir o və tərəfdarları. Gürcüstanda seçki saxta olmur. Bəs niyə sandıqdan çıxmır? Ola bilər ki, gürcülər demokratiyadan daha çox İvanaşvili klanının iqtisadi avantajlarını üstün sayır. Bizim üçün maraqlarımızı müdafiə edəcəksə Saakaşvili gəlsin. Ara-sıra biz də rusları onunla təhdid edərik. Amma ümumən Saakaşvili məsələsinin gündəmləşməsi sadəlövh məsələ deyil. Bölgədə geosiyasi mübarizənin göstəricisidir. Amerikanın dostudur. Amerika bizim və qardaş Türkiyənin nə dərəcədə dostudur, bilmirəm. Biz ölkə olaraq Böyük Britaniya-Türkiyə cinahında Avrasiyaçılıq strategiyasına yeni rəng qatmışıq. Saakaşvilinin xətti isə Amerika-Avropa İttifaqı xəttidir. Saakaşvili şəxs olaraq bizim millətin dostu olub. Amma indiki cinahı yenə onu bu xətdə saxlayacaqmı? Bu suala gələcək cavab verəcək”.