Azərbaycanın enerji sektorunda baş verən mühüm hadisələrdən biri 2024-cü ildə istifadəyə verilmiş “8 Noyabr” Elektrik Stansiyasıdır. Bu stansiyanın açılışı ölkəmizin iqtisadi və strateji inkişafında yeni bir mərhələnin başlanğıcı hesab olunur. Hazırda stansiya 1880 meqavat gücü ilə fəaliyyət göstərir və Azərbaycanın elektrik enerjisinə olan tələbatını ödəməkdə mühüm rol oynayır. Bu, həm də Mingəçevirin ölkəmizin enerji xəritəsindəki önəmli yerini daha da möhkəmləndirir.
Prezident cənab İlham Əliyev açılış mərasimində çıxış edərək bildirmişdir ki, bu stansiyanın inşası rekord müddətdə tamamlanıb. Cəmi iki il ərzində təxminən 2 min meqavat enerji əldə edilib. Bu, həm texniki imkanların, həm də peşəkar kadr potensialının nəticəsidir. Keçmişə nəzər saldıqda görürük ki, sovet dövründə “Azərbaycan” İstilik Elektrik Stansiyasının yalnız bir bloku 7 ilə istismara verilmişdi. Bu isə o dövrün texniki və təşkilati çətinliklərini aydın şəkildə göstərir. Yeni stansiya müasir texnologiyalarla təchiz edilmiş, yüksək səmərəlilik və ekoloji təmizlik prinsipləri əsas götürülmüşdür.
Ötən illərdə Mingəçevirdə baş verən enerji qıtlıqları, yanacaq çatışmazlıqları və köhnəlmiş infrastruktur ölkənin enerji təhlükəsizliyini ciddi şəkildə sarsıtmışdı. Həmin dövrdə vətəndaşlar tez-tez elektrik enerjisi kəsintiləri ilə qarşılaşırdı, müəssisələrin fəaliyyəti dayanırdı. Lakin son 20 ildə aparılan islahatlar və yeni layihələrin icrası nəticəsində bu problemlər geridə qaldı. “8 Noyabr” stansiyası da məhz bu uğurların davamıdır. Bu gün Mingəçevirdə istehsal edilən elektrik enerjisi ümumi generasiya gücümüzün 40 faizindən çoxunu təşkil edir ki, bu da regionun enerji təhlükəsizliyində əvəzsiz rola malikdir.
Azərbaycan gələcəkdə də enerji sektorunun inkişafını prioritet sahə kimi görəcək. Prezident cənab İlham Əliyev qeyd etmişdir ki, 2030-cu ilə qədər ölkəmizdə 6500 meqavat yaşıl enerji istehsalı planlaşdırılır. Bu, həm daxili ehtiyacların ödənilməsinə, həm də ixrac potensialının artırılmasına şərait yaradacaq. İtaliya və Çin kimi beynəlxalq tərəfdaşlarla əməkdaşlıq da gələcək layihələrin uğurla həyata keçirilməsinə kömək edəcək. Bu əməkdaşlıq nəticəsində Azərbaycanda günəş və külək enerjisi stansiyalarının sayı artacaq, yeni texnologiyalar ölkəmizə gətiriləcək.
Gələcəkdə bu stansiya sayəsində təbii qazdan daha az istifadə ediləcək və beləliklə, ixrac imkanlarımız genişlənəcək. Azərbaycanın qazı hazırda 12 ölkəyə ixrac olunur və bu rəqəm artmağa davam edəcək. Yeni layihələrin istismara verilməsi ilə həm iqtisadi gücümüz, həm də geosiyasi əhəmiyyətimiz daha da artacaq. Azərbaycanın enerji təhlükəsizliyi və enerji diplomatiyası regionda sabitliyin və inkişafın təmin olunmasında mühüm rol oynayacaq. Artıq ölkəmiz yalnız istehsal edən deyil, həm də ixrac edən və texnologiya tətbiq edən aparıcı enerji gücünə çevrilməkdədir.
Məlumdur ki, enerji sahəsində irəliləyiş yalnız iqtisadi yox, həm də sosial inkişaf üçün vacib şərtdir. Yeni elektrik stansiyalarının tikintisi nəticəsində minlərlə yeni iş yeri yaradılır, regionların inkişafı sürətlənir, əhalinin rifahı yüksəlir. “8 Noyabr” stansiyası da bu baxımdan xüsusi əhəmiyyət daşıyır. Burada çalışan yüzlərlə mütəxəssis ölkənin enerji təhlükəsizliyinin qorunmasına xidmət edir. Onların əməyi sayəsində Azərbaycan bu gün Avropanın enerji xəritəsində önəmli yer tutur.
Sonda qeyd etmək lazımdır ki, “8 Noyabr” stansiyasının adı təsadüfi seçilməyib. Bu tarix xalqımızın Qələbə günüdür və bu qələbə yalnız hərbi yox, həm də siyasi, iqtisadi və sosial sahələrdə əldə olunan uğurların simvoludur. Bu stansiya keçmişin zəhməti, bu günün qüruru və gələcəyin enerjisi olacaq. Əminliklə söyləyə bilərik ki, “8 Noyabr” stansiyası Azərbaycanın enerji tarixində yeni bir səhifə açacaq və gələcək nəsillərə daha güclü bir miras buraxacaq. Bu möhtəşəm layihə həm tarixə hörmət, həm də gələcəyə inamın bariz nümunəsidir.
Ülviyyə Kərimov

Suraxanı rayonu, 141 nömrəli tam orta məktəbin tarix müəllimi
Sozcu.info