7 oktyabr 2025-ci il tarixində Qəbələdə keçirilmiş Türk Dövlətləri Təşkilatının (TDT) Dövlət Başçıları Şurasının 12-ci Zirvə Görüşü Azərbaycan Respublikasının regional və beynəlxalq siyasətdəki mövqeyini bir daha təsdiqlədi. Prezident cənab İlham Əliyevin çıxışı bu Zirvə Görüşünün mərkəzində dayanaraq, həm ölkəmizin uğurlarını, həm də Türk dünyasının birgə inkişaf strategiyasını əks etdirən mühüm mesajlarla yadda qaldı.

      Azərbaycanın TDT-yə sədrlik etdiyi dövrdə təşkilatın beynəlxalq nüfuzu artmış, onun geosiyasi əhəmiyyəti daha da güclənmişdir. Prezident cənab İlham Əliyev çıxışında qeyd etdi ki, TDT artıq sadəcə əməkdaşlıq platforması deyil, ciddi geosiyasi mərkəz kimi formalaşmışdır. Azərbaycanın təşəbbüsü ilə Katibliyə 2 milyon ABŞ dolları məbləğində ianə köçürülməsi, təşkilatın fəaliyyətini gücləndirən vacib addımlardan biridir. Bu addım həm də Azərbaycanın Türk dünyasında lider mövqeyini möhkəmləndirir və qardaş ölkələr arasında əməkdaşlığı artırır.

      Daxili siyasi və iqtisadi sabitlik, gənc və dinamik əhali, strateji mövqe, təbii resurslar, nəqliyyat-logistika və hərbi imkanlar Azərbaycanı Türk dünyasında vacib aktora çevirir. Prezident cənab İlham Əliyev çıxışında qeyd etdi ki, yalnız bu amillər deyil, həm də ölkəmizin milli iradəsi və uğurlu rəhbərliyi Azərbaycanı regional və qlobal arenada nüfuzlu oyunçuya çevirir. Bu uğurlu siyasət, Ulu Öndər Heydər Əliyev tərəfindən qoyulmuş strateji  təməllər üzərində qurulmuşdur. Onun yaratdığı möhkəm dövlət institutu və diplomatik ənənələr Prezident cənab İlham Əliyev tərəfindən uğurla inkişaf etdirilmişdir.

       44 günlük Vətən müharibəsi və 2023-cü il antiterror tədbirləri nəticəsində Azərbaycanın ərazi bütövlüyünün bərpası Prezident cənab İlham Əliyevin siyasətinin bariz göstəricisidir. Bu tarixi nailiyyət yalnız milli iradənin təntənəsi deyil, həm də bölgədə ədalətin, sabitliyin və sülhün bərqərar olmasına mühüm töhfədir. Eyni zamanda, Vaşinqton Zirvəsi çərçivəsində Azərbaycan və Ermənistan arasında sülh sazişinin paraflanması, Cənubi Qafqazın sülh məkanına çevrilməsinə imkan yaratmışdır.

       Təhsil, mədəniyyət və dini sahələrdə görülən işlər də TDT üzvləri arasında qardaşlığın inkişafını göstərir. İşğaldan azad olunmuş torpaqlarda TDT üzvləri tərəfindən həyata keçirilmiş layihələr, həm də xalqlarımız arasında dostluq və həmrəyliyin təzahürüdür. Füzulidə Mirzə Uluqbəy adına məktəb, Ağdamda Manas adına məktəb, Kurmanqazı adına Uşaq Yaradıcılıq Mərkəzi, Cəbrayılda Macar qardaşlarımızın hədiyyəsi ilə tikilən məktəb, Füzulidə Türkmən qardaşlarımızın dəstəyi ilə tikilən məscid kimi layihələr göstərir ki, TDT üzvləri Azərbaycanla həmrəylik nümayiş etdirir və bölgənin dayanıqlı inkişafına töhfə verirlər. Bu təşəbbüslər həm də Prezident cənab İlham Əliyevin təşəbbüsü ilə aparılan regional inteqrasiya siyasətinin bir hissəsidir.

       Azərbaycanın nəqliyyat-logistika imkanları da Prezident cənab İlham Əliyevin uzaqgörən siyasətinin nəticəsidir. Ölkəmiz Şərq-Qərb və Şimal-Cənub nəqliyyat dəhlizlərinin fəal iştirakçısıdır. Bakı-Tbilisi-Qars dəmir yolu, Ələt Beynəlxalq Ticarət Limanı və 9 beynəlxalq hava limanı Azərbaycanın beynəlxalq nəqliyyat mərkəzlərindən birinə çevrilməsini təmin edir. Zəngəzur dəhlizinin açılması həm Orta Dəhliz, həm də Şimal-Cənub dəhlizi çərçivəsində yeni nəqliyyat arteriyası kimi strateji əhəmiyyət kəsb edir. Bu dəhlizlər həm iqtisadi inteqrasiyanı, həm də regionda sülh və sabitliyi gücləndirir.

       Enerji sahəsində Azərbaycan həm neft və qaz, həm də bərpaolunan enerji mənbələri üzrə strateji rol oynayır. Prezident cənab İlham Əliyev çıxışında vurğuladı ki, 2030-cu ilə qədər enerji istehsalının 40%-i bərpaolunan mənbələr hesabına təmin ediləcək. Azərbaycan 14 ölkəyə təbii qaz ixrac edir və regionun enerji təhlükəsizliyinə mühüm töhfə verir. Bu uğurlar Ulu Öndər Heydər Əliyev tərəfindən qoyulmuş iqtisadi təməllər üzərində qurulmuşdur.

       Prezident cənab İlham Əliyev həmçinin Birinci vitse-prezident Mehriban xanım Əliyevanın humanitar, sosial və mədəni sahələrdəki xidmətlərini qeyd etdi. Onun təşəbbüsü ilə həyata keçirilən layihələr, xüsusilə azad edilmiş torpaqlarda məktəb, mədəni və dini obyektlərin tikilməsi, xalqlarımız arasında dostluğun möhkəmlənməsinə xidmət edir.

        Prezident cənab İlham Əliyev çıxışının yekununda Türk Dövlətləri Təşkilatının gələcək perspektivlərini də vurğuladı. 1926-cı ildə Bakıda keçirilmiş birinci Türkoloji Qurultayın 100 illik yubileyinin qeyd olunması təklifi, Türk dünyasının mədəni və tarixi irsinin qorunması baxımından böyük əhəmiyyət kəsb edir.

       Beləliklə, Prezident cənab İlham Əliyevin rəhbərliyi altında Azərbaycan, həm ölkə daxilində, həm də TDT çərçivəsində uğurlu siyasətini davam etdirir. İşğaldan azad olunmuş torpaqlarda həyata keçirilən layihələr, Türk dünyasının birliyi, regional sabitlik və xalqlarımızın rifahına xidmət edir. Bu uğurlar Ulu Öndər Heydər Əliyev irsi üzərində inşa edilmiş, Prezident cənab İlham Əliyev tərəfindən uğurla davam etdirilmiş siyasətin təntənəsidir.

Fərəh Hüseynova

Suraxanı rayonu, 141 nömrəli tam orta məktəbin direktoru

Sozcu.info