Biz - Azərbaycan qadınları, tarixən, azad düşüncəli, təmiz qəlbli, nikbin ruhlu olmuş, mənsub olduğumuz ailənin, gəlin düşdüyümüz ocağın, elin-obanın yükünü kişilərlə bərabər paylaşmaqla cəmiyyətin inkişafına önəmli töhfələr vermişik. “Kitabi Dədə Qorqud” dastanındakı Burla Xatun, Banu Çiçək, Selcan Xatun kimi qəhrəman qadın obrazları, onların mübariz həyat tərzi, cəsur davranışları Türk cəmiyyətində qadınların hələ yüz illər bundan öncə kişilərlə bərabər hüquqlara, hətta daha mötəbər statusa malik olduqlarının əyani təzahürüdür.

Tariximizin həssas məqamlarında Azərbaycan xanımlarının göstərdiyi sarsılmaz iradə, əvəzsiz fədakarlıq, sonsuz vətənpərvərlik əsrlər ərzində ənənəyə çevrilmiş və milli dəyərimiz səviyyəsinə yüksəlmişdir. Azərbaycan qadını bu milli dəyərimizə sadiqliyini bu gün də nümayiş etdirməkdədir. Təsadüfi deyildir ki, haqlı olaraq “Azərbaycanın Böyük Vətən müharibəsi” adlandırılan savaşın getdiyi bu günlərdə Azərbaycan anaları qürur hissi ilə oğullarını uğurlayıb cəbhəyə yola salırlar. Çünki 30 ildir ki davam edən düşmən işğalı bizim üçün həqarət idi. Onsuz da bu ötən 30 ilin demək olar hər günü atəşkəs pozulur, cəbhənin düşmənlə təmas xəttində Azərbaycan əsgəri ya öldürülür, ya da yaralanırdı. Belə gərginlik, hərbi xidmətdə olan oğlunun müharibə etmədən, “atəşkəs dövrü” adlandırılan şəraitdə qanının töküləcəyi əndişəsi anaları tükətmişdi, üzmüşdü.

Budur, artıq o gün yetişib, torpaqlarımızı işğaldan qurtarmaq üçün tarixi şərait yaranıb. Mənfur düşmənin yapışdığı ətəklər də cırılıb. Boğulmaqda olan Ermənistan hər saman çöpündən yapışır, üçüncü tərəfləri münaqişəyə cəlb etmək üçün canfəşanlıq edir. Azərbaycan əhalisi arasında təşviş yaratmaq üçün dinc sakinləri, qadınları, uşaqları hədəfə almaqla vəhşi xislətini göstərir.

Rəşadətli Azərbaycan Ordusunun sentyabrın 27-sində düşmənin törətdiyi təxribata cavab olaraq başladığı uğurlu əks-hücum əməliyyatlarının elə ilk günündə bir neçə yaşayış məntəqəsinin işğalçılardan azad edilməsi, bir neçə strateji yüksəkliklərin Azərbaycanın nəzarətinə keçməsi və Ali Baş Komandanımız cənab İlham Əliyevin bu münasibətlə bütün Azərbaycan xalqını təbrik etməsi hamımızın qəlbini riqqətə gətirdi. Bu xəbəri ilk dəfə efirdə paylaşan teleaparıcı qızımızın sevinc göz yaşları gündəm oldu və Azərbaycan Qadınının qələbə istəyini, qeyrətinin gücünü bütün dünyaya göstərdi.
Hadisələrin sonrakı gedişi göstərir ki, bizim oğullarımız, - bizim yox, Vətən - Ananın oğulları - bu minvalla axıradək döyüşüb nəhayət ki işğala son qoyacaq, ölkəmizin ərazi bütövlüyünü təmin edəcəkdir.

Möhtərəm Prezidentimiz cənab İlham Əliyevin dediyi kimi, “Bizim mübarizəmiz haqq mübarizəsidir və bu gün Azərbaycan vətəndaşları dövlətə tam dəstək göstərirlər, bu dəstəyi biz daim hiss edirik”. Bizim bütün hərbi hissələrimizdə, hərbi birləşmələrimizdə ruh yüksəkliyi var. Eyni zamanda, ordumuza könüllü yazılanların sayı on minlərlədir. Qismən səfərbərliyə cəlb edilmiş Azərbaycan vətəndaşları ölkəmizin ərazi bütövlüyü uğrunda döyüşlərdə iştirak etmək üçün böyük ruh yüksəkliyi və coşqu ilə Səfərbərlik Xidmətinin qeydiyyatda olduqları idarə, şöbə və bölmələrinə gəlirlər. Bu gün hər bir çağırışçının dilində əsas şüar bunlardır: “Biz birlikdə güclüyük!”, “Biz zəfər çalacağıq!” Hərbi vəzifəlilərin, onları yola salan valideyn və yaxınlarının ruh yüksəkliyi bir daha onu göstərir ki, xalqımız işğal olunmuş ərazilərimizi düşməndən azad etmək üçün ordumuzun həyata keçirdiyi uğurlu hərbi əməliyyatlarla qürur duyur və ümumi qələbəmiz naminə nəbzi Vətən ilə vuran Prezidentimiz, Ali Baş Komandanımız cənab İlham Əliyevin Sərəncamını təntənə ilə qarşılayır. Hər kəs Vətənin müdafiəsini qanunla müəyyən edilmiş vəzifədən əlavə özünə mənəvi borc bilir.

Bizim çox müdrik xalqımız var, bu gün hər bir Azərbaycan vətəndaşı öz prezidentinin, öz əsgərinin yanındadır! Əminliklə deyirik ki, - Ali Baş Komandanın rəhbərliyi altında Şanlı ordumuz üçrəngli bayrağımızı işğaldan azad etdiyi bütün rayonlarda dalğalandıracaq, “Qarabağ Azərbaycandır!”- deyib nida işarəsini qoyacaq!

Biz inanırıq ki, Azərbaycan bu ədalətli mücadiləsində sözün tam mənasında qələbə qazanacaq və bu zəfəri Ali Baş Komandanımız cənab İlham Əliyev üçün, Azərbaycan hərbçiləri üçün dualarını əsirgəməyən Azərbaycan anaları da haqqıdır.

Aqiyə Naxçıvanlı,
millət vəkili, professor.