"Pandemiya ilə əlaqədar olaraq çox azsaylı ölkələrdə istər insan itkisinin sayının, istərsə də iqtisadiyyatda inflyasiya faizinin aşağı həddə olması müşahidə edilir. Belə ölkələrdən biri də Azərbaycandır. Ölkə rəhbərliyi tərəfindən həm tibb sahəsində, həm iqtisadi platformada vaxtında görülən qabaqlayıcı tədbirlər nəticəsində Azərbaycanda vəziyyət müsbətə doğru sürətlə irəliləyir".

Bunu Pravda.az-a açıqlamasında Milli Məclisin Səhiyyə Komitəsinin üzvü Kamilə Əliyeva deyib.

Deputat bildirib ki, Cənab İlham Əliyevin birbaşa səyi, şəxsi nüfuzu sayəsində Azərbaycan “Sinovac” peyvəndini alan, bu işə ilk başlayan dövlətlərdən olub: "Artıq il yarımdır ki, koronavirus bütün dünyanı öz əsarətində saxlamaqda davam edir. Bu virus səbəbindən dünyada milyondan çox insan həyatını itirib, ölkələrin iqtisadiyyatı iflic vəziyyətə düşüb, dünya iqtisadiyyatında hədsiz geriləmələr olub. Çox azsaylı ölkələrdə isə istər insan itkisinin sayının, istərsə də iqtisadiyyatda inflyasiya faizinin aşağı həddə olması müşahidə edilir. Belə ölkələrdən biri də Azərbaycandır. Ölkə rəhbərliyi tərəfindən həm tibb sahəsində, həm iqtisadi platformada vaxtında görülən qabaqlayıcı tədbirlər nəticəsində Azərbaycanda vəziyyət müsbətə doğru sürətlə irəliləməkdədir. Bildiyimiz kimi, dünyada pandemiya elan edildikdən dərhal sonra ən böyük və ən nüfuzlu laboratoriyalarda koronavirusa qarşı vaksin hazırlamağa başlanıldı və ilk olaraq Çin Xalq Respublikası özünün “Sinovac” peyvəndini təqdim etdi. “Sinovac” həm Çinin özündə, həm də bir çox dövlətlərdə uğurla sınaqdan keçirildi və peyvəndin effektivliyi 90%-dən yuxarı olduğu sübut olundu. Ümumiyyətlə isə, tibbi tədqiqatlara və protokollara görə effektivliyi 60%-dən çox olan vaksinlərin istifadəsinə icazə verilir. İndi isə dünyanın bir çox dövlətləri öz əhalisini “Sinovac” peyvəndi ilə vaksinasiya etdirir".

K.Əliyeva vətəndaşları peyvənd olunmağa çağırıb: “Xalqımızın sağlamlığı və ümumən bəşəriyyətin xilası naminə Azərbaycan xalqını vaksin olunmağa çağırıram. Bu vaksinin effektli olması ölkəmizdə də bir daha sübut olundu. Azərbaycan bununla yanaşı Rusiyada, eləcə də digər Avropa ölkələrində istehsal olunan yüksək effektivliyə malik başqa vaksinləri də ölkəyə gətirdi. Dövlətimiz öz vətəndaşlarının sağlamlığı naminə bütün effektiv vasitələrdən istifadə edir və ölkəmizdə kifayət qədər vaksin ehtiyatı var. Bu gün Azərbaycanda və bir çox dövlətlərdə vəziyyət, demək olar ki, normallaşmağa doğru gedir. Lakin bəzi ölkələrdə koronavirusun yeni ştammları meydana çıxır və normal həyata dönməyin, yeni mutasiyalardan  qorunmağın yeganə yolu Operativ Qərargah tərəfindən tətbiq edilən qaydalara riayət etmək və hər kəsin könüllü vaksinasiyaya cəlb olunmasıdır. ÜST-ün də tövsiyələrinə görə, bəşəriyyətin bu bəladan xilas olması üçün Yer kürəsinin bütün insanlarının bu virusa qarşı peyvənd olunması vacibdir".