Bu gün Azərbaycan məktəblərində ən böyük problem şagirdlərin intellektual deyil, psixoloji cəhətdən hazırlıqsız olmasıdır. Bu amil şagirdlərin intellektual fərd kimi yetişməməsinə də öz təsirini göstərir.
Daha çox basqı və danlaq altında olan yeniyetmələr nəticədə, orta təhsilini bitirdikdən sonra cəmiyyətə tam şəkildə yararlı ola bilmirlər.
Əslinə qalsa, məktəblərdə psixoloqlar var, lakin uşaqlarla ünsiyyətdə olmurlar. Əksər şagirdlər bəlkə də, oxuduqları  məktəblərində psixoloqların kimliyindən belə xəbərsizdirlər. Ötən dərs ilində məktəblərdə yaşanan müxtəlif xoşagəlməz hallar məktəb psixoloqu işinin əhəmiyyətini bir daha qabartdı.
Maraqlıdır, bu gün məktəblərdə psixoloqlar niyə normal fəaliyyət göstərə bilmirlər? Səbəb nədir?
Təhsil eksperti Ramal Şəmşədli Yenisabah.az-a məktəbdə psixoloqlara çox aşağı maaş verildiyini söyləyib:
“Burada problem əslində kadr çatışmazlığı deyil. Ən azı 20 məktəblə əlaqə saxladım hamısında həmin ştatın boş olmadığı deyildi.
Daha sonra bir neçə məktəbin psixoloqları ilə görüşdüm. Onlara sual verdim ki, sizin fəaliyyətiniz nədən ibarətdir? Niyə bir uşağı tanımaqda düzgün bir nəticə ortaya qoya bilmirsiniz? Mənə cavab olaraq dedilər ki, “bizdə maaş çox aşağıdır. Ən azı müəllimlər qədər normal maaş verilsə düzgün işləyə bilərik”.
Bir tərəfdən onlara haqq qazandırmaq olar. 250-300 manatlıq maaş alırlar. O maaşla nə psixoloq ola bilərlər ki... Və yaxud bir psixoloq uiversitetdə psixologiya fakültəsini oxuyursa, bilsə ki, məkəbdə işləyib ayda 300 manat maaş alacaq, sizcə o təhsilinə necə yanaşar? Maaş bir nömrəli problemdir. Maaş yüksək olmalıdır və ştata qəbul olan şəxslər xüsusi imtahandan keçməlidirlər. Həqiqətən psixologiya sahəsində tələbələr və şagirdlərlə işləməyi bacaran kadrlar olmalıdır ki, onlar uşaqları əldə edə bilsinlər”.
Ekspert məktəb psixoloqlarının şagirdlər üzərində tətbiq etdirəcək metodlarının olmadığını deyib:
“Bir neçə psixoloqla həmsöhbət olanda gördüm ki, onların məktəbə bağlı ortaya atılan ideyası yoxdur. Görüşdə təklif etdim ki, gedib məktəblərin direktorları ilə danışsınlar. Bir test var. O testi ümumi məktəb üzrə, müəyyən aralıqlı siniflər arasında tətbiq etsinlər. Bununla uşaqların psixoloji vəziyyətini ortaya qoymuş olarıq.
Problem ondan qaynaqlanır ki, biz uşaqları tanıya bilmirik. Psixloqun da vəzifəsi odur ki, uşağı tanımalı, onun psixoloji vəziyyətini bilməlidir. Müəllimlər də ona uyğun davranmalıdır”.
R.Şəmşədli psixoloqların uşaqlarla ünsiyyətdə olmaması səbəbindən intihar hallarının artdığını qeyd edib: “Ötən il və daha  öncəki illərdə bal toplaya bilməyən gənclərimiz intihara cəhd etdilər. 17 yaşlı uşaqlarımız 100 bal topladılarına görə, artıq həyatdan soyuyurlar. Valideyn də bir az üzərinə düşərsə, bu uşaq intihara meyl edəcək. Onlar anlamırlar ki, bu son deyil. Başqa çıxış yolları var.
Bununla yanaşı bizim ölkəmizdə hələ də psixoloq anlayışı formalaşmayıb. Elə bilirlər ki, psixoloqa dəlilər gedir. Başa düşməlidirlər ki, psixoloqa dəlilər getmir. Psixoloq yanına problem olmaması üçün gedilir.
Bunun üçün məktəblərdə diqqət yetirilməlidir. İlk növbədə maaşları yüksək olmalıdır. Maaşı yüksək olarsa, yaxşı kadrlar yetişəcək”.