Hazırda ən çox müzakirə edilən mövzularından biri də qəbul imtahanlarıdır. Qəbul imtahanlarının ləğvi və fənnlərin sayının azadılması ilə bağlı sosial şəbəkələrdə müxtəlif fikirlər irəli sürülür.
Mütəxəssislər hesab edirlər ki, abituriyentin seçdiyi ixtisas qrupunda o qədər də əhəmiyyəti olmayan fənnlər var. Şagird də sırf həmin fənnə görə aşağı nəticə göstərir və istədiyi ali məktəbə daxil ola bilmir. Hətta qəbul imtahanlarının ləğv olunmasını təklif edənlər də var.
Maraqlıdır, qəbul imtahanında fənnlər azaldıla bilərmi?
Qəbul imtahanı ləğv olunacağı tqədirdə abituriyentlərin bilik səviyyəsi necə müəyyənləşdiriləcək?
Təhsil eksperti Ramal Şəmşədli Yenisabah.az-a qəbul imtahanlarının 2 fənn əsasında aparılmasının vacibliyindən danışıb:
“Bu bizim ümumi problemimizdir. Həmin məsələ gənclərimizin gələcək həyatında böyük rol oynayır. Məhz qəbul imtahanlarının 5 fənn üzrə aparılmasına görə gənclərimiz daha çox xarici ölkələrə üz tuturlar.
Gənclərin xaricə üz tutmalarının səbəbi həmin 5 fənn, uyğunsuz keçid balları və təhsil haqlarının həddindən artıq yüksək olmasıdır. Elə ailələr var ki, aztəminatlıdır, 5 fənndən uşağını hazırlığa qoya bilmir. Həmin uşaqlar niyə universitet oxuya bilməsinlər ki?.5 fənn aradan qaldırılmalıdır. Mühəndisə tarixlə, ədəbiyyatla zülm etmək olmaz. Bizim vətəndaşlıq borcumuzdur ki, tariximizi, ədəbiyyatımızı bilək. Bu başqa bir məsələdir”.
Ekspertin fikrincə, gənclərin xaricdə oxumasını istəməsələr belə onların burada oxuması üçün qarşılarına böyük baryerlər qururlar:
“Avropada, Almaniyanın özündə gəncləri sertifikatla ali təhsil müəssisələrinə qəbul edirlər. Elə şagird var ki, imtahanda riyaziyyatdan 25 suala düzgün cavab yazıb. Amma digər fənlərdən nəticə qənaətbəxş deyil.. Balı çox aşağıdır. O, burada ali məktəbə qəbul ola bilmir. Lakin həmin şagirdi göndərib, Türkiyənin ən yaxşısı universitetində yüksək ixtisasda oxudacağıq. Düşünək ki, bu imkanlar olmasaydı gəncin halı necə olardı. Mənim dediyim odur ki, qəbul attestatla olmasın. İmtahan prosesi keçirilsən, amma 2 fənnlə”.
Ramal Şəmşədlinin sözlərinə görə, 3 saatlıq imtahanın nəticəsi ilə abituriyenti savadsız adlandırmaq olmaz:
“Bir şagird əgər 11-ci sinfi bitirib, 3 fənndən imtahan verib attestat alıbsa, demək ki, bu adamın savadı var. 11 il əziyyət çəkib. 11 illik əziyyəti biz niyə 3 saatlıq imtahanın nəticəsinə görə müqayisə edək ki... İmtahan balı ilə uşağın savadını ölçmək düzgün deyil. O səbəbdən məktəblərdə psixoloji testlər olmalıdır ki, uşağın istedadı, bilik səviyyəsi üzə çıxsın..
Unutmayaq ki, onlar gələcəyimizin müəllimi, mühəndisi, cinayətkarı da ola bilər. Bunlar hamısı  öz əlimizdədir. Bu istiqamətdə geniş təbliğat apararaq, gənclərimizin hər birinin ali təhsil alması üçün imkanlar yaratmalıyıq”.