“Bəşəriyyət koronavirusun müxtəlif növləri ilə mübarizəsini davam etdirir, virusun bir növü yoxa çıxmağa yaxın olarkən yenisi peyda olur və mübarizə dayandığı yerdən davam edir. Virusla mübarizə davam edərkən virusun necə peyda olduğu müzakirələri də azalmır”.
Sozcu.info xəbər verir ki, bunu “Atlas” Araşdırmalar Mərkəzinin rəhbəri Elxan Şahinoğlu deyib. 
Politoloq qeyd edib ki, ABŞ kəşfiyyatı koronavirusun yaranması haqqında məlumatı olan çinli alimlər və həkimlər içərisindən xəfiyyə axtarışına çıxıb:
“Amerika kəşfiyyatı ilkin məqamda virusun yayıldığı Çinin Uhan şəhərindəki laboratoriyanın genetik məlumat bazasını ələ keçirib. Ancaq baza məlumatlarının şifrələrinin açılmasına ehtiyac var. Bunu isə ancaq həmin laboratoriyada çalışan çinli alim və həkimlər yerinə yetirə bilərlər.
ABŞ kəşfiyyatı Çindən istədiyi məlumatları əldə etməkdə israrlıdır. Yaxın keçmişdə Amerikaya qaçan çinli alim və həkimlər qeydə alınmış və onlar virusun yaranması və yayılması barədə ABŞ kəşfiyyatına müfəssəl məlumatlar vermişdilər. Görünür, Amerika kəşfiyyatı üçün bu kifayət deyil ki, daha çox məlumata ehtiyac duyur.
ABŞ Konqresinin Nümayəndələr Palatasının Respublikaçı Partiyasının üzvləri avqustun 2-də hesabat yayıblar. Həmin hesabata görə, virusun Uhan laboratoriyasından yayıldığı qənaətinə gəlinib. Bu hesabat açıq mənbələrdən toplanan məlumatlar əsasında hazırlanıb. Hesabat müəllifləri ABŞ prezidentini Uhanda çalışan alimlərə qarşı sanksiya tətbiqinə çağırırdılar”.
Elxan Şahinoğlu diqqətə çatdırıb ki, Dünya Səhiyyə Təşkilatının nümayəndə heyəti araşdırma aparmaq məqsədilə Uhan laboratoriyasında bir dəfə olduğu halda, ikinci səfərə də ehtiyac duyduğunu açıqlayıb:
“Birinci səfərə icazə verən Pekin təşkilat nümayəndələrinin Uhan labroratoriyasında ikinci tədqiqatına “yox” deyib. Bu da yeni şübhələrə yol açıb.
Bu arada, ABŞ-ın keçmiş prezidenti Donald Tramp “Fox News” televiziya kanalına müsahibəsində virusun Uhan laboratoriyasından yayıldığına şübhə etmədiyini bildirib. Tramp ona görə də virusu “Çin virusu” olaraq adlandırdığını vurğulayıb. Tramp müsahibəsində sosial şəbəkələrdən də şikayət edib: “Sosial şəbəkələr virusun laboratiyada hazırlandığı xəbərlərini yayan insanları blok edib. Mən yenə də o fikirdəyəm ki, koronavirus laboratoriyada peyda olub və indi bir çoxları mənim qənaətimi bölüşür”.
Co Baydenin prezident kampaniyası zamanı əsas vədi virusa qarşı mübarizəni gücləndirəcəyi idi. Həqiqətən, Bayden prezidentliyinin ilk aylarında virusa qarşı vaksinasiyanı genişləndirib və müsbət nəticələr əldə edilib. Ancaq virusun yeni növləri peyda olduqca Amerikada vəziyyət yenidən pisləşib. Misal üçün bir qisim mütəxəssisinin hesablamalarına görə, Amerikada virusa yoluxanların gündəlik sayı 300 minə çatacaq. İndiki rəqəmlər 70 mindir”.
Ekspert hesab edir ki, virusun Amerikada geniş yayılmasını şərtləndirən digər səbəb qadağaların və məhdudiyyətlərin ortadan qaldırılmasıdır:
“Buna görə də Ağ Ev sahibi ştatların qubernatorlarına tapşırıq verib: “Əhalinin tamamı vaksinasiya olunmalıdır!” Co Bayden hələ ki vaksinasiyanın məcburi şəkildə tətbiqinə qərar verməyib. Ancaq Amerikada vəziyyət yenidən mürəkkəbləşərsə, vaksinasiyanın məcburi xarakter daşımasının alternativi olmayacaq”.