“Tez-tez media nümayəndələri reklam qıtlığından şikayət edir, bəziləri hətta reklam bazarının açılmasının zəruri olduğunu deyir. Doğrusu "reklam bazarının açılması" dedikdə nəyin nəzərdə tutulduğu şəxsən mənə aydın deyil”.
Sozcu.info xəbər verir ki, bunu marketinq üzrə mütəxəssis Samir İsmayılov deyib. O, bildirib ki, Statistika Komitəsinin hesabatına görə ötən il media 11, 8 mln. AZN gəlir əldə edib. Onun da 10, 5 mln.AZN TV-lərin payına düşüb:
“Hazırda ölkədə ən azı 700 online və 30-a yaxın qəzetin fəaliyyət göstərdiyini nəzərə alsaq, medianın sırf reklamla yaşamasının mümkünsüz olduğu üzə çıxır. Hətta veb saytların sayının 2-3 dəfə azaldığı və reklam bazarını de-fakto 2 dəfə çox təsəvvür etdiyimiz halda belə, online və çap mediasının reklam gəlirləri hesabına yaşaması mümkünsüz görünür. Bizdə ianə etmək ənənəsi də yoxdur.
Bəs reklam bazarı heç də zəif olmayan Qərbdə, media sırf reklam hesabınamı yaşayır? 
Son vaxtlar Bloomberg, Reuters, FT, Quartz, NT, Economist və s.kimi media qurumlarının saytlarına sərbəst giriş praktiki olaraq mümkün deyil. Adları çəkilən qurumların saytlarından maksimum ayda 2-3 məlumat oxumaq mümkündür. Onlar öz xəbərlərini FB səhifələrində yerləşdirir, linki açıb xəbəri oxumaq istəyənə, "abunə ol" deyir. Həftəlik abunə haqqı $2-dan başlayır. Beləliklə belə nüfuzlu qurumlardan məlumatı yalnız pulla almaq olur.
Rusiya mediasına gəlincə, Dojd TV və 2-3 media istisna olmaqla, qalanları açıqdır. Bunlar bizim internet məkanına pulsuz daxil olur, təbliğatını aparır, dezolar paylaşır və həm də ölkədə ingilis dilinə olan təlabatı azaldır.
İnformasiyaya çəkilən xərc və ona böyük təlabat varsa, Azərbaycanda o, niyə pulsuz olsun? 
Hazırda Turan, Trend, APA kimi agentliklər öz informsiyalarını 20-40% məhdudlaşdıraraq abunəçiliyi tətbiq edir. Dolayısı ilə adları çəkilən bu qurumlar reklam (PR) gəlirlərindən əlavə abonentlikdən də, gəlir əldə edirlər. Digər media qurumları niyə bunu tətbiq etməsin? Bununla yanaşı müəlliflik hüququ haqqında qanunvericliyin tətbiqi və həmkar həmrəyliyi eksklyuziv xəbər hazırlayan media qurumlarını indiki çətin maliyyə durumdan çıxarar və daha müstəqil olmağa imkan verər”.