Ermənistanda sosial-iqtisadi vəziyyətin və siyasi proseslərin gərgin olması orduya da təsirsiz ötüşməyib. Qeyri-döyüş şəraitində ölən erməni əsgərlərinin sayı artır və Ermənistan Müdafiə Nazirliyi vaxtaşırı bu hadisələrə dair məlumatlar yaymağa məcbur olur. 
“Azərbaycan ordusunun Ermənistana endirdiyi sarsıdıcı zərbədən sonra mənəvi-psixoloji səviyyədə Ermənistan ordusunda çaşqınlıq müşahidə olunur və bu,dərin sindrom halına çevrilib”.
Bunu Sozcu.info -ya açıqlamasında Sosial Tədqiqatlar Mərkəzinin baş məsləhətçisi, politoloq İlyas Hüseynov bildirib.
“Eyni zamanda, 44 günlük müharibə zamanı gördük ki, düşmən ordunun sıravi hərbi qulluqçuları ilə zabit heyəti arasında koordinasiya yoxdur. Bəzi hərbi qulluqçular zabitlərin verdiyi əmrlərə və tapşırıqlara riayət etmir və orduda özbaşınalıq geniş vüsət alıb”, - deyə İlyas Hüseynov sözünə davam edib.
“Müxtəlif korpus komandirləri və silahlı qüvvələrin bəzi birləşmələri arasında mərkəzi komandanlığa tabe olmama halları mövcuddur. Bunun ən böyük səbəbkarı 20 il ərzində “Qarabağ klanı”nın Ermənistanda hakimiyyətdə olmasıdır. Nikol Paşinyan çox çalışsa da, köhnə kadrları ordudan təmizləyə bilməyib. Elə buna görə Paşinyan  növbədənkənar parlament seçkilərindən sonra Baş Qərargahda onun istefasını tələb edən generalları bir-bir istefaya göndərir”, - deyə politoloq vurğulayıb.
İlyas Hüsyenov qeyd edib ki, Ermənistan ordusunda dərin psixoloji uçurumlar var:
“Komandanlıqda olan fikir ayrılığı, koordinasiyanın yoxluğu, nizamnaməyə uyğun olmayan davranış, cinsi istismar, əsgərlərin hərbi nizamnamədən kənar fəaliyyətə cəlb olunması prosesi baş verir və bunun nəticələri də göz qabağındadır. Artıq orduda baş verən intihar hallarını gizlətmək mümkün olmur və KİV-də bu faktlar dərc edilir”.
Politoloq onu da vurğulayıb ki, Ermənistanın nəyin ki, dövlət idarəçiliyində vahid nizamın yoxluğu silahlı qüvvələrə də sirayət edib:
“Nə qədər paradoksal olsa da, hazırda Ermənistan ordusunun yenilməz olması haqqında miflər qoşulur. Lakin 44 günlük müharibə dövründə Azərbaycan ordusu bu mifi darmadağın etdi və çox qısa müddətdə genişmiqyaslı ərazilər işğaldan azad olundu. Azərbaycan öz döyüş potensialını, mənəvi-psixoloji ruhunu və müasir standartlara cavab verən döyüş aparma sənətini, əməli-praktiki fəaliyyətdə döyüş teatrında göstərdi.
Fikricə, Ermənistan ordusunda uçurumlar genişlənəcəkr və intihar faktlarını hələ bundan sonra artacaq”.
Rafi Müslümov