Yoluxmaların və ölümlərin artmasına səbəb saxta COVİD pasportu alanlardır?

Hər kəs koronavirusa yoluxma sayında azalmalarn olacağını düşündüyü halda, xəstələnənlərin sayı günü-gündən daha da artır. Bu arada, Ümumdünya Səhiyyə Təşkilatının (ÜST) baş direktoru Tedros Adhanom Qebreyesus Qlobal Bakı Forumuna göndərdiyi videomüraciətində deyib ki, bundan sonra növbəti böhrana hazırlaşmalıyıq: “ÜST-in məqsədi bu il ərzində bütün dünya ölkələrində əhalinin ən azı 40 faizinin peyvənd olunmasıdır. Biz bundan sonra da növbəti böhrana hazırlaşmalıyıq. Bizim səhiyyə sistemlərimiz daha müvafiq olmalıdır. Ən zəngin və inkişaf etmiş dövlətlər belə bu xəstəlikdən qorunmayıb. Bu pandemiya bir daha göstərdi ki, sağlamlıqla bağlı olan məsələ həmişə diqqət mərkəzində olmalıdır. Biz səhiyyəyə, ilkin xidmətlərə ayrılan vəsaitləri artırmalıyıq. Biz qlobal çərçivədə xüsusi maliyyə çərçivəsi yaratmalıyıq”.
Ekspertlər isə hesab edirlər ki, virusa yoluxmaların və ölənlərin sayının artmasının səbəbi insanların buster, yəni üçüncü dozanı vurdurmaq istəməməsi ilə bağlıdır. Bu səbəbdən hesab edilir ki, 3-cü doza vaksinlər məcburi olmalıdır. Bəzi ekspertlər isə deyir ki, yenidən sərt karantin rejiminə gedilməlidir, yoxsa növbəti yüksək yoluxma sayı ilə üz-üzə qalacağıq. Necə ki, ayın əvvəlindən Rusiyada on günlük qapanmalara gedilib.  Yeri gəlmişkən, saxta COVİD pasportları ilə bağlı müxtəlif iddialar da səsləndirilir. Yoluxmaların çoxalmasına, ölümlərin artmasına səbəb kimi saxta pasport alanların yoluxaraq evdə müalicə alması göstərilir. Bu şəxslər vaksin olunmadıqlarının üzə çıxmaması üçün PCR testi verməkdən imtina edir. Bu isə ağırlaşmalarla, hətta ölümlə nəticələnir. Bu azmış kimi, həmin şəxslərin hətta digər insanları yoluxdurmasına da  səbəbkar olurlar.  

Nicat Əzimli 
Son günlərin epidemioloji vəziyyəti ilə bağlı tanınmış həkimlər “Yeni Müsavat”a fikirlərini bildiriblər.  Həkim-infeksionist Nicat Əzimli bizimlə söhbətdə bildirib ki, vaksinasiya heç bir halda icbari ola bilməz: “Nə qədər zərərsiz olsa belə, istənilən tibbi müdaxilədən istifadə hüququ şəxsin özündə olmalıdır. Lakin hər kəs bunu dərk etməlidir ki, vaksinasiyadan 6 ay əvvəl keçmiş şəxslər artıq vaksin olunmamış sayılır. Çünki COVİD-in vaksini də eynilə xəstəliyin özü kimi davamsız, yəni qısa müddətli immunitet yaradır. ”CoronaVac"da hətta 3 ay sonra bu immunitet itir. Buster dozanın məqsədi isə bu zəifləmiş və ya itmiş immuniteti yenidən gücləndirməkdir".
N.Əzimli qapanmalarla bağlı suala da cavab verib: “Rusiyada hazırda epidemik vəziyyət bizdən qat-qat pisdir. Azərbaycanda indi qapanmalara gediləcək durum yoxdur. O səbəbdən də sərt karantin rejiminin tətbiqini məqbul saymıram”.  Qeyd etmək yerinə düşər ki, ölkəmizdə “Buster” doza vaksinasiya olunanların sayı 28 880 nəfərdir. “Buster” doza vaksinasiya olunanların ümumi sayı isə 383 036 təşkil edir. Son sutkada koronavirus əleyhinə 45 561 vaksin vurulub. Nazirlər Kabineti yanında Operativ Qərargahdan verilən məlumata görə, bir gündə birinci mərhələ üzrə vaksinasiya olunanların sayı 6 263, ikinci mərhələ üzrə vaksinasiya olunanların sayı 10 418 nəfərdir. 

Könül İsmayılova 
Səhiyyə Nazirliyinin İctimai Səhiyyə və İslahatlar Mərkəzinin həkim mütəxəssisi Könül İsmayılova da mövzu ilə bağlı “Yeni Sozcu.info  şərh verib: “Azərbaycan Respublikasında COVİD-19 xəstəliyi əleyhinə 2021-2022-ci illər üçün Vaksinasiya Strategiyası”na əsasən, vaksinasiya könüllülük prinsipi əsasında həyata keçirildiyindən buster dozası da eyni prinsip əsasında tövsiyə xarakterlidir. Rusiyada qapanmaların baş vermə səbəbinə gəldikdə, onlarda orada peyvənd olunmuş əhalinin sayının faiz göstəricisi aşağıdır. Bizdə qadağaların tətbiq edilməsi qərarının qüvvəyə minməsi Nazirlər Kabineti yanında Operativ Qərargahın səlahiyyətləri çərçivəsindədir".
K.İsmayılova saxta COVİD pasportu ilə bağlı ünvanladığımız suala da cavab verib: “Evdə ağırlaşmaları yalnız saxta COVİD  pasportu alanların təşkil etdiyini söyləmək düzgün olmazdı. Bəzən gecikmiş müraciətlər, ümumiyyətlə, həkim məsləhəti olmadan aparılan müalicələr, eyni zamanda bəzən xəstəlikdən çox ehtiyatlanaraq lüzumsuz bir sıra  dərman preparatlarının istifadəsi də bu halların yaranmasının səbəbləri sırasındadır”.