Bildiyimiz kimi, ölkə Prezidenti cənab İlham Əliyev yanvarın 30-da Gəncə şəhərinə səfəri çərçivəsində AZƏRTAC-a verdiyi müsahibəsində qeyd etmişdir ki, 18 il ərzində o, 18 dəfə Gəncə şəhərində rəsmi səfərdə olub. Gəncə Azərbaycanın ikinci şəhəridir və bu şəhərə həmişə yüksək səviyyədə diqqət olmuşdur. Gəncə şəhərində bir çox layihələr icra edilmiş və bu layihələrin icrası davam edir.
Azərbaycanın tarix və mədəniyyətində özünəməxsus yeri olan Gəncə şəhəri də keçmişi ilə əfsanələşən, zaman-zaman yadellilərin basqın və talanlarına qarşı mətanətlə dayanan, qəhrəmanlıq salnaməmizə adını yazan yurd yerlərimizdəndir.
«Kitabi-Dədə Qorqud»da adı keçən Gəncə ümumən türk xalqlarının inkişafında, təşəkkülündə və dövlət quruculuğunda müstəsna rol oynamış, ticarət, sənətkarlıq, mədəniyyət beşiyi olmuşdur.
Gəncə bu gün Azərbaycanın sənaye, elm, təhsil, mədəniyyət mərkəzlərindən biridir. Tarixi, adət-ənənələri, sənətkarları ilə tanınan, Azərbaycanın dünyaya çıxan əsas yollarından birinin üzərində yerləşən Gəncə ölkəmiz üçün strateji əhəmiyyətə malikdir.
Bu gün ölkənin hər yerində həyata keçirilən sürətli quruculuq-abadlıq işləri, sosial-iqtisadi proqramlar bu bölgəmizin də inkişafına böyük zəmin yaradıb. Gəncə ildən-ilə gözəlləşir və müasirləşir. Bütün bu yeniliklər Gəncənin tarixi özəlliyini kölgədə qoymur, əksinə, tarixilik və müasirlik bütün görülən işlərdə vəhdət təşkil edir. Dövlət başçısının xeyir-duası ilə təməli qoyulmuş Fikrət Əmirov adına Gəncə Dövlət Filarmoniyasının möhtəşəm binası buna bariz nümunədir. Yeddi mərtəbədən və 4 zaldan ibarət filarmoniya ümumilikdə 3 minədək tamaşaçı qəbul edə biləcəkdir. 
Bu gün Gəncədə Dövlət Dram Teatrı, Kukla Teatrı, 5 musiqi məktəbi, incəsənət məktəbi, 5 muzey, 3 mədəniyyət evi, 6 klub, musiqi evi, kitabxanalar, rəsm qalereyası fəaliyyət göstərir. Şəhərin müasir memarlığına rəng qatan Heydər Əliyev Mərkəzi isə öz möhtəşəm memarlığı ilə diqqəti daha çox çəkir. 
Prezident İlham Əliyev şəhərə səfərlərinin birində demişdir: “Gəncənin mədəni həyatı zəngindir. Həmişə belə olubdur. Bu, əlbəttə ki, məni sevindirir, çünki Gəncə Azərbaycanın qədim şəhəridir, ikinci şəhəridir, Nizami yurdudur”.
2016-cı ildə Gəncə Avropa gənclərinin paytaxt şəhəri elan edilmişdir. Qədim və müasir Gəncə Avropa Gənclər Forumunun beynəlxalq layihəsi olan “Avropa Gənclər Paytaxtı 2016” seçimində 12 ölkənin şəhərlərini geridə qoyaraq MDB məkanında bu adı ilk qazanan şəhər olmuşdur. Xatırladaq ki, Gəncə 2012-ci ildə Azərbaycanın “Gənclər Paytaxtı” kimi çoxsaylı yerli və beynəlxalq tədbirlərə ev sahibliyi etmişdir. “Avropa Gənclər Paytaxtı 2016” tədbirləri isə daha genişmiqyaslı və zəngin olmuşdur. Bu istiqamətdə atılan bütün addımlar Gəncənin mədəni turizm imkanlarının tanıdılmasına da zəmindir. Məlum olduğu kimi, ölkəmizin turizm potensialının beynəlxalq aləmdə təbliği, turizmin müxtəlif növlərinin inkişaf etdirilməsi, müasir infrastrukturun yaradılması sahəsində məqsədyönlü tədbirlər həyata keçirilir. Turizm sektorunun iqtisadiyyatın prioritet sahəsi kimi inkişaf etdirilməsi dövlətimizin qarşısında duran ən vacib məsələlərdən biridir. Prezident İlham Əliyevin turizm potensiallı bölgələrə etdiyi səfərlər zamanı, demək olar ki, hər dəfə yeni hotellər, istirahət və əyləncə məkanları və s. istifadəyə verilir. Bütün bunlar regionlarda turizmin inkişafına stimul verirsə, digər tərəfdən əhalinin məşğulluğunun artırılmasına əlavə imkan yardır. Bu baxımdan Gəncəbasar bölgəsinin turizm inkişaf planının hazırlanması xüsusi önəm kəsb edir.
Mədəniyyət Nazirliyi tərəfindən milli-mənəvi dəyərlərin qorunması, mədəni irsin öyrənilməsi və təbliği istiqamətində yeni turizm marşrutlarının yaradılması diqqət mərkəzindədir. Bu mənada “Aleksandr Düma Qafqazda” və “Şərab yolları” adlı turizm marşrutlarının layihəsi işlənib hazırlanmışdır. 
Gəncənin dini abidələri də turistlərin diqqətini cəlb edir. Prezident İlham Əliyevin “İmamzadə” tarixi-dini kompleksinin bərpası ilə əlaqədar imzaladığı sərəncamla burada yenidənqurma işləri xüsusi layihə əsasında həyata keçirilmişdir. Hazırda ziyarətə gələnlərin ibadəti və istirahəti üçün bütün şərait yaradılmışdır. Bu da dini turizmin inkişafı üçün yeni imkanlar açır.
Gəncənin respublikamızın ən mühüm nəqliyyat qovşağı olması da bu prosesdə önəmli yerə sahibdir. Bu mənada TRASEKA layihəsi əsasında Avropadan Asiyaya gedən yolların buradan keçməsi turizm axınının intensivliyinə müsbət təsir edən amil kimi qiymətləndirilməlidir. Gəncənin turizm potensialından səmərəli istifadə etmək üçün son dövrlərdə əhəmiyyətli addımlar atılıb. Dahi Nizami Gəncəvinin məqbərəsinin yenidən qurulması da bu işlərin tərkib hissəsidir. Kompleks və ətrafı qədim ornamentlər əsasında yenidən qurulub ki, bu da şəhərə üz tutan yerli və xarici turistlərdə Gəncə barədə unudulmaz təəssüratlar yaradır. 
Gəncənin əsas infrastruktur layihələrinin böyük əksəriyyəti öz həllini tapmışdır. Elektrik enerjisi ilə təchizat tam həll olunmuşdur. Gəncədə 10 yarımstansiya həm yenidən tikilmiş, həm də əsaslı təmir edilmişdir. Enerji istehsalı gücü 220 meqavat olan bu yarımstansiyalar şəhərin tələbatını tam ödəyir. Eyni zamanda, şəhərin artan tələbatı, o cümlədən sənaye potensialı da nəzərə alınacaqdır.
Qazlaşdırma layihəsi tam icra edilmiş, içməli su layihəsinin icrası davam etdirilir. Təqribən 800 milyon manat dəyərində olan bu layihənin icrası nəticəsində Gəncə şəhərinin içməli su və kanalizasiya problemləri birdəfəlik həll olunacaqdır. 
Gəncəyə gedən yollar tam müasirləşdirilib. Həm Bakı-Gəncə avtomobil yolunun, həm də Gəncə-Qazax-Gürcüstan sərhədi yolunun çəkilişi başa çatmış, eyni zamanda, Gəncədən Göygöl, Daşkəsən şəhərlərinə gedən yollarda da əsaslı təmir işləri aparılmışdır.
Şərq-Qərb nəqliyyat dəhlizinin bir parçası olan Bakıdan Gəncəyə dəmir yolu xətti də tam modernləşdirilmişdir. İndi xəttə sürətli və komfortlu qatarlar da buraxılıb. Gəncə Beynəlxalq Hava Limanı uzun illər bundan əvvəl cənab Prezidentin təşəbbüsü ilə yenidən qurulmuşdur.
Gəncə bu gün, sözün əsl mənasında, özünün intibah dövrünü yaşayır. Şəhərin sosial-iqtisadi və mədəni həyatı dinamik surətdə inkişaf edir, qədimliklə müasirliyin vəhdət təşkil etdiyi bu unikal məkan şöhrətini bütün dünyaya yayır. Bir sözlə, Gəncə bu gün də tarixləşir, müasirləşir və əbədiliyini qazanır.

Arzu Daşpoladova,
Salyan şəhər 7 saylı məktəb-liseyin direktoru