Martın 1-də Suraxanı rayonu, Hövsan qəsəbəsi, Donuzkökəltmə sovxozu adlandırılan yaşayış sahəsində Azərbaycanın ərazi bütövlüyü uğrunda döyüşlərdə şəhidlik zirvəsinə ucalan qəhrəman Vətən oğullarının xatirəsinin əbədiləşdirilməsi məqsədilə Suraxanı Rayon İcra Hakimiyyəti tərəfindən inşa edilmiş, ölkəmizin hər bir regionundan olan şəhidlərin fotoları əks etdirilmiş abidə-bulaq kompleksinin açılış mərasimi keçirilmişdir.

Sozcu.info xəbər verir ki, açılış mərasimində Suraxanı Rayon İcra Hakimiyyətinin başçısı Əziz Əzizov, Rayon Prokuroru Rəşid Mahmudov, Dövlət Təhlükəsizlik Xidmətinin Suraxanı rayon İdarəsinin rəisi Rauf Məmmədov, YAP Suraxanı rayon təşkilatının sədri Vüqar Seyidov, Səfərbərlik və Hərbi Xidmətə Çağırış üzrə Dövlət Xidmətinin Bakı şəhəri Suraxanı rayon İdarəsinin rəisi Kənan Nağıyev, RİHB-nin müavinləri, şöbə müdirləri, Şəhid ailələri, qazilər iştirak etmişlər.

Suraxanı Rayon İcra Hakimiyyətinin başçısı Əziz Əzizov çıxış edərək bildirmişdir ki, Şəhidlik adı ölüm deyil, Vətən, Torpaq, böyük amallar uğrunda candan keçmək, özünü şüurlu şəkildə qurban vermək deməkdir. Vətən oğullarımızın mərdliyi və mətinliyi 44 günlük müharibədə özünü daha bariz şəkildə göstərdi. RİH başçısı qeyd etmişdir ki, Müzəffər Ali Baş Komandan Cənab İlham Əliyevin rəhbərliyi altında qazandığımız tarixi qələbə sayəsində vaxtı ilə işğal altında olan, düşmən tərəfindən viran edilən torpaqlarımızda bu gün həyat yenidən canlanır, həmin ərazilərə öz yurd-yuvasından didərgin düşmüş məcburi köçkünlərimizin qayıtması üçün hərtərəfli şərait yaradılır. 

Şəhid analarına və onların doğmalarına dərin hüznlə bir daha başsağlığı verərək səbr diləyən RİH başçısı Əziz Əzizov və tədbir iştirakçıları abidə-bulaq kompleksini ziyarət edərək üzərinə gül dəstələri düzmüş, bütün şəhidlərimizə Allahdan rəhmət diləmişlər.
Həmçinin, tədbirdə E.Səfərov adına 118 №li tam orta məktəbin şagirdlərin ifasında vətənpərvərlik mövzusunda şeirlər səsləndirilmişdir.
Sozcu.info