Bələdiyyələr, vətəndaşların gündəlik problemlərinin həllində və yerli icmaların inkişafında mühüm rol oynayan strukturlardır. Lakin bəzi hallarda onların fəaliyyətində çatışmazlıqlar müşahidə olunur ki, bu da ictimaiyyət arasında narazılığa səbəb olur. Çox zaman bələdiyyələrdə şəffaflığın olmaması və qərarların qapalı şəkildə qəbul edilməsi ictimai inamsızlığa səbəb olur. Məsələn, büdcə xərclərinin təyinatı barədə məlumatın açıq şəkildə paylaşılmaması vətəndaşların haqlı suallarına yol açır. Şəffaflığı artırmaq üçün onlayn platformalarda bələdiyyə qərarları, büdcə hesabatları və layihələr barədə mütəmadi məlumat paylaşılmalıdır.

Bəzi yerlərdə yolların vəziyyəti, kanalizasiya sistemlərinin köhnəliyi və ya tamamilə olmaması böyük narahatlıq doğurur. Əsasən kənd yerlərində bu problemlər daha çox hiss olunur. Bələdiyyələrin vətəndaşlarla daim ünsiyyət saxlamaması onların ehtiyaclarını düzgün müəyyənləşdirməkdə çətinlik yaradır. Əlaqənin olmaması həmçinin yerli icmaların qərar qəbul prosesində iştirakını məhdudlaşdırır. Mütəmadi olaraq ictimai müzakirələr, sorğular və forumlar təşkil edilməli, vətəndaşların təklifləri dinlənilməlidir.

Bələdiyyələrin effektiv fəaliyyət göstərməsi üçün onların üzərində ictimai nəzarət gücləndirilməli, vətəndaşların iştirakı təmin edilməli və problemlərə kompleks yanaşma tətbiq edilməlidir. Yalnız bu halda bələdiyyələr xalqın etimadını qazanaraq daha uğurlu nəticələr əldə edə bilər.

Quba rayonu bələdiyyə sədri Humay Məmmədova vətəndaşlar tərəfindən ciddi tənqidlərə məruz qalır. Vətəndaşların bildirdiyinə görə, o, öz vəzifə borcunu layiqincə yerinə yetirmir, vətəndaşların problemləri ilə maraqlanmır və mütəmadi olaraq heç bir görüş keçirmir. Bələdiyyənin əsas vəzifəsi əhali ilə əlaqədə olmaq, onların problemlərini dinləmək və həll yolları təklif etməkdir. Lakin görünən odur ki, Quba bələdiyyəsinin bu missiyası gözardı edilir.

Sakinlər arasında yayılan məlumatlara görə, Humay Məmmədova bələdiyyə büdcəsindən öz şəxsi məqsədləri üçün istifadə edib, hətta bu hesabla “Həcc ziyarəti”-nə gedib. Əgər bu iddialar həqiqəti əks etdirirsə, bu, bələdiyyə rəhbərinin öz səlahiyyətlərini sui-istifadə etməsi anlamına gəlir və hüquqi məsuliyyət tələb edir.

Rayonun ümumi mənzərəsinə baxanda isə şəhərin təmizlik problemi bir daha göz önündədir. Zibilin vaxtında daşınmaması, ərazinin baxımsız qalması, abadlıq işlərinin görülməməsi vətəndaşların gündəlik həyatına mənfi təsir edir. Bütün bunlar, təəssüf ki, bələdiyyə rəhbərinin məsuliyyətsizliyini göstərir.

Vətəndaşların fikrincə, Humay Məmmədovanın bu vəzifədə qalmasına yüksək vəzifəli şəxslər tərəfindən dəstək göstərilir. Bu da əhali arasında ədalətsizliyin və narazılığın artmasına səbəb olur. Qarşıdan gələn bələdiyyə seçkiləri isə insanların səslərini ifadə etmək üçün əhəmiyyətli fürsət olacaq.

Quba sakinləri öz bələdiyyə sədrindən yalnız səlahiyyətlərini düzgün icra etməsini deyil, həm də şəffaflıq və dürüstlük tələb edir. Beləliklə, onların gələcəkdə daha məsuliyyətli və fəaliyyətləri ilə özünü təsdiq edə bilən rəhbər seçmək istəyini anlamamaq mümkün deyil. Bu vəziyyətdə, aidiyyəti qurumlar və vətəndaş cəmiyyəti bu problemlərə laqeyd qalmamalı, təcili tədbirlər görməlidir. Çünki xalqın səsi və hüquqları hər şeydən üstündür. Bu məsələlərə aydınlıq gətirmək üçün Humay Məmmədova ilə əlaqə saxlamaq mümkün olmadığı üçün suallarımızı sayt vasitəsilə verməyə məcbur qaldıq.

Bələdiyyə olaraq vətəndaşlarla sonuncu dəfə nə zaman görüş keçirmisiniz?

Niyə vətəndaşlar problemlərini birbaşa sizə çatdıra bilmir?

Şəhərin təmizlik və zibil yığımı problemi ilə bağlı nə kimi tədbirlər görmüsünüz?

Quba sakinlərinin qaldırdığı problemlərin həlli üçün hansı konkret addımlar atılıb?

Bələdiyyə büdcəsi necə və hansı istiqamətlərdə xərclənir?

Bələdiyyə olaraq son bir ildə hansı layihələr həyata keçirilib?

Quba şəhərində abadlıq işlərinin dayandırılmasının səbəbi nədir?

Yeni parklar, yollar və ictimai obyektlərin tikilməsi üçün hansı planlar mövcuddur?

Bələdiyyə büdcəsinin xərclənməsi barədə ictimaiyyətə nə üçün hesabat verilmir?

Büdcənin şəffaf idarə olunması üçün hansı mexanizmlər mövcuddur?

Yeni seçkilərdə iştirak etməyi planlaşdırırsınızsa, əvvəlki dövr ərzində hansı uğurlarınızı göstərə bilərsiniz?

Vətəndaşların sizin yenidən seçilməyinizi istəməməsinin səbəbləri ilə bağlı fikriniz nədir?

Vətəndaşların iddialarına görə fəaliyyətsizliyiniz və problemlərlə maraqlanmamağınız doğrudurmu?

Həcc ziyarətinizin bələdiyyə büdcəsi hesabına həyata keçirilməsi iddiası doğrudurmu?

Belə iddialar varsa, bunlara cavabınız nədir?    

Afət Məmmədova

P.S. Qarşı tərəfin mövqeyini dərc etməyə hazırıq.

Sozcu.info