Azərbaycan xalqı tarix boyu bir çox çətinliklər və ağır sınaqlarla üzləşmişdir, amma heç zaman öz iradəsindən dönməmişdir. Tarixin müxtəlif mərhələlərində üzləşdiyi sınaqlar xalqın yaddaşında dərindən iz buraxmışdır. Prezident cənab İlham Əliyevin III Şuşa Qlobal Media Forumundakı çıxışı bu baxımdan həm keçmişin dərslərini, həm bu günün reallıqlarını, həm də gələcək istiqamətləri özündə əks etdirir.

      1990-cı illərin əvvəllərində müstəqilliyini yenicə qazanmış Azərbaycan böyük faciələrlə üzləşmişdi. Qarabağın işğalı, bir milyondan artıq insanın qaçqın və məcburi köçkünə çevrilməsi, ölkənin iqtisadiyyatının dağılması xalqı ağır imtahan qarşısında qoymuşdu. Həmin dövrdə Ümummilli Lider Heydər Əliyev hakimiyyətə gəlmiş, ölkədə sabitliyi təmin etmiş və əsaslı dövlət quruculuğuna başlamışdı.

      Azərbaycan xalqı 30 il ərzində torpaqlarının sülh yolu ilə azad ediləcəyinə ümid etmişdi. Lakin beynəlxalq vasitəçilərin qeyri-səmimi yanaşması bu ümidləri zamanla zəiflətdi. Buna baxmayaraq, xalq öz qələbəsinə inandı. Prezident cənab  İlham Əliyev bu 30 ildə həm diplomatik, həm də hərbi sahədə ciddi hazırlıqlar gördü. Nəticədə 2020-ci ildə 44 günlük Vətən müharibəsi Azərbaycanın ərazi bütövlüyünü bərpa etməsi ilə başa çatdı. Bu, sadəcə bir hərbi zəfər deyil, həm də xalqın iradəsinin təntənəsi idi.

    Azad edilən ərazilərdə sürətli bərpa işləri həyata keçirilir. Prezidentin bildirdiyinə görə,  bu gün Qarabağ və Şərqi Zəngəzurda artıq onlarla infrastruktur layihəsi həyata keçirilib. Məktəblər, yollar, hava limanları, su elektrik stansiyaları istifadəyə verilib. Hər bir addım Azərbaycan xalqının doğma torpaqlara qayıdışı üçün şərait yaradır.

    COP29 kimi beynəlxalq tədbirlərin Bakıda keçirilməsi Azərbaycanın qlobal məsələlərdə fəallığının artdığını göstərir. İqlim dəyişikliklərinə qarşı mübarizədə, yaşıl enerji sahəsində, həmçinin regional logistik layihələrdə ölkəmiz önəmli rol oynamağa başlayıb. Prezident qeyd etmişdir ki, Azərbaycan yalnız təbii sərvətlərlə yox, həm də intellektual və texnoloji inkişafla irəliləməyə qərarlıdır. Süni intellekt, rəqəmsallaşma və alternativ enerji sahələrində konkret strategiyalar formalaşdırılıb.

     Eyni zamanda, nəqliyyat sahəsində böyük layihələr icra olunmaqdadır. Xəzər dənizində yerləşən beynəlxalq ticarət limanı, Bakı-Tbilisi-Qars dəmir yolu və planlaşdırılan Zəngəzur dəhlizi ölkəmizi regionun nəqliyyat mərkəzinə çevirməyə başlayıb. Bütün bu addımlar Azərbaycanın gələcək iqtisadi qüdrətinin təməlini formalaşdırır.

     Gələcək üçün Prezident cənab İlham Əliyev aydın mesaj verir: Azərbaycan daha güclü, daha müasir və dayanıqlı bir dövlətə çevriləcək. Yaşıl enerji sahəsində 2030-cu ilə qədər 6 giqavatlıq enerji istehsalı hədəflənir. Qlobal enerji transformasiyasında Azərbaycan körpü rolunu oynamaq istəyir – Qərblə Şərqi, inkişaf etmiş ölkələrlə inkişaf etməkdə olan ölkələri birləşdirən bir körpü.

     Bununla yanaşı, Azərbaycan beynəlxalq hüquqa əsaslanan xarici siyasət yürütməyə davam edəcək. Prezidentin sözlərinə görə, “heç vaxt təslim olmamaq” prinsipi gələcək nəsillərə ötürülməli bir dəyərdir. Biz artıq sübut etmişik ki, xalq və dövlət bir olduqda ən çətin məqsədlərə belə çatmaq mümkündür.

     Ən vacib məsələlərdən biri də regional sülh və əməkdaşlıqdır. Prezident qeyd etmişdir ki, əgər Ermənistan da konstruktiv yanaşarsa, Cənubi Qafqazda sabitlik və əməkdaşlıq mühiti yaradıla bilər. Lakin bunun üçün ilk növbədə qarşı tərəfdən səmimiyyət və real addımlar tələb olunur.

     Azərbaycan tarixində ilk dəfədir ki, gələcəyinə bu qədər ümidlə və güvənlə baxır. Keçmişdə yaşanan acılar, indiki gündəki uğurlar və gələcək üçün qurulan planlar bir bütöv strategiyanın hissələridir. Prezident cənab İlham Əliyevin liderliyi ilə Azərbaycan bu strategiyanı mərhələli şəkildə həyata keçirməkdədir.

     Biz keçmişimizdən güc aldıq, bu günümüzü möhkəmləndirdik və gələcəyimizi planlaşdırırıq. Bu yol asan olmayıb və olmayacaq. Lakin iradə, birlik və inamla Azərbaycan daha parlaq sabahlara doğru irəliləyəcək.

      Fərəh Hüseynova 

      Suraxanı rayonu, 141 nömrəli  tam orta məktəbin direktoru 

Sozcu.info