Milli Məclisin payız sessiyasının sonuncu plenar iclası keçirilib. Spiker Sahibə Qafarova sessiyanı bağlı elan etdikdən sonra Azərbaycan Respublikasının Dövlət Himni səsləndirilib. Beləliklə, deputatlar qış tətilinə yollanıblar. 

Qeyd edək ki, yanvarın 1-dən Milli Məclis tətilə çıxır. Milli Məclisin Daxili Nizamnaməsinə əsasən, səlahiyyəti dövründə Milli Məclis ildə iki dəfə - iyul ayının 15-dən avqust ayının 30-dək və yanvar ayının 1-dən 15-dək tətilə buraxılır.

Azərbaycan Respublikası Konstitusiyasına uyğun olaraq Milli Məclis hər il yaz və payız sessiyalarına toplaşır. Yaz sessiyası fevralın 1-də başlanır və mayın 31-dək davam edir. Payız sessiyası sentyabrın 30-da başlanır və dekabrın 30-dək davam edir.

Fevralın 1-i və sentyabrın 30-u istirahət, səsvermə, iş günü hesab edilməyən bayram gününə düşərsə, sessiya bu gündən sonra gələn birinci iş günü öz işinə başlayır. 2026-cı il fevralın 1-i bazar gününə düşdüyündən plenar iclas fevralın 2-də keçiriləcək.