Lakin bu il də Ramazan ayının başlanması ilə bağlı ikitirəlik yaranıb. Türkiyə, o cümlədən əksər ərəb ölkələrində Ramazan ayı bu gündən – 16 maydan başlayır. Azərbaycan isə İranla paralel hərəkət edir. Nəticədə Azərbaycandakı inanclı insanların bir qismi bu gündən oruc tutmağa başlayıb, digər qismi isə sabahdan bu prosesə start verəcək.

Milli Məclisin İctimai birliklər və dini qurumlar komitəsinin üzvü, inanclı deputat Fazil Mustafa Modern.azsaytına danışarkən deyib ki, insan hürdür, istədiyi seçimi edə, öz idarəsi çərçivəsində qərar qəbul edə bilər. Fazil Mustafanın özü də Qafqaz Müsəlmanları İdarəsinin təqviminin əleyhinə olaraq, orucu bu gündən tutmağa başlayıb:

"Azərbaycan əslində təqlidçi mövqedədir”

F.Mustafa qeyd edib ki, insana daha ciddi elmi və düşüncə imkanları verən verilişləri, kitabları əsasən Türkiyə mənbələrindən oxuyub araşdırır:

"Bu baxımdan referans kimi həmin ölkəni götürürük. Amma dediyim kimi, bu, insanların sərbəst hüququdur. Kim istəyir QMİ-nin xəttini izləyib, onun anlayışı ilə yanaşsın, kim də istəyər başqa ölkələrdə olan dini anlayışda məsələyə baxsın. Burda heç bir qəbahət yoxdur. Çünki Azərbaycanın bu məsələdə özünəməxsus yanaşması yoxdur. Bu istiqamətdə Azərbaycan əslində təqlidçi mövqedədir. Bu o deməkdir ki, İranda nəyi etdilərsə, məsələn, İranda hansısa dini nüfuz sahibi nə etdisə, bizdə də onu təkrar etmək məcburiyyəti var. Lakin azad din anlayışına sahib olan insanlar üçün bunların heç biri keçərli deyil”.

"Onlar çox şeyləri açıq şəkildə söyləməkdən çəkinəcəklər”

Deputat Şamaxı Astrofizika Rəsədxanasının bu istiqamətdə olan rəyindən də söz açıb:

"Ayın görünüb- görünməməsi ilə əlaqəli Rəsədxana başqa cür rəy verə bilməz. Çünki sonradan onlar bununla bağlı problem yaşaya bilərlər. Yəni ən azı işdən çıxma qorxusu ilə çox şeyləri açıq şəkildə söyləməkdən çəkinəcəklər. Türkiyədə əksər insanlar bu məsələdə aktiv rol alırlar, yüz dəfə ölçüb-biçir, hansı variantın daha doğru olduğunu seçirlər. Şəxsən mən o variantı izləyirəm. Amma sabah oruc tutacaq, yaxud heç tutmayacaq insanların hamısının normal ay keçirməsini təmənna edirəm. Çünki heç kim başqalarının işinə qarışa ya da, ittiham edə bilməz”.