Tibb elmləri namizədi, ürək-damar cərrahı, Tibb Universitetinin nəzdindəki müalicə klinikasının kardiologiya şöbəsinin müdiri Cavid Həmişəyevin qətlində təqsirli bilinən 1994-cü il təvəllüdlü Koroğlu Məmmədov, 1989-cu il təvəllüdlü Yasin Ərəbov və 1992-ci il təvəllüdlü Türkan Bağırlı Ali Məhkəməyə müraciət ediblər.

Virtualaz.org saytının əldə etdiyi məlumata görə, təqsirləndirilən şəxslər kassasiya şikayəti ilə Ali Məhkəməyə müraciət edərək barələrində olan hökmün dəyişdirilməsini və cəzalarının yüngülləşdirilməsini istəyiblər.

Onların şikayətinə noyabrın 4-də hakim Hafiz Nəsibovun sədrliyi ilə baxılacaq.

Qeyd edək ki, Bakı Ağır Cinayətlər Məhkəməsinin hökmü ilə Koroğlu Məmmədov 15 il, Yasin Ərəbov 15 il, Türkan Bağırlı 14 il müddətinə azadlıqdan məhrum edilib. Hökmdən narazı qalan təqsirləndirilən şəxslər apelyasiya şikayəti veriblər. Lakin məhkəmə onların şikayətlərini təmin etməyib.

Hadisə 25 may, 2013-cü ildə baş verib. İttihama görə, tibb elmləri namizədi, ürək-damar cərrahı, 1977-ci il təvəllüdlü Cavid Həmişəyev Nərimanov rayonu, H.Əliyev küçəsi, ev 92, mənzil 8-də öldürülüb.

Cavid Həmişəyev kirayə qaldığı evə yüngül həyat tərzi sürən Türkan Bağırlı ilə gəlib. Daha sonra isə iki nəfər evə gəlib və qətl hadisəsi baş verib. Mərhuma məxsus 90 NU 363 dövlət nömrə nişanlı, “Mercedes MLK” markalı avtomobilin də yerində olmadığı müəyyənləşib. Avtomobil daxili işlər və prokurorluq orqanları əməkdaşları tərəfindən “20 yanvar” dairəsində saxlanılıb. Avtomobildə olan şəxslər - Türkan Bağırlı, Yasin Ərəbov və Koroğlu Məmmədov tutulub. Onların cinayəti tamah məqsədilə törətdikləri məlum olub. Avtomobilə baxış zamanı isə mərhumun şəxsi əşyaları, sənədləri, Koroğlu Məmmədovun cinayəti törədəndə geyindiyi paltarlar, ümumilikdə 670 manat pul götürülüb.

Qətldə istifadə olunan iki ədəd bıçaq isə Buzovna qəsəbəsindəki zibillik ərazisindən aşkarlanaraq maddi sübut kimi götürülüb.