“Öz dilini bilməyən, öz dilini sevməyən adam öz tarixini yaxşı bilə bilməz.”Ulu Öndər Heydər Əliyev Dil millətin simasını səciyyələndirən amillərdən biri, onun milli sərvətidir. Avqustun 1-i      Azərbaycan əlifbası və Azərbaycan dili günü kimi qeyd edilir. Bu əlamətdar gün Ümummilli Lider Heydər Əliyevin 2001-ci il 9 avqust tarixli Fərmanına əsasən təsis edilib. Ulu Öndər həmin Fərmanı latın qrafikalı Azərbaycan əlifbasına keçidin ölkədə 2001-ci ilin avqustunda bütövlükdə təmin edildiyini və yeni əlifbadan istifadənin müstəqil      Azərbaycanın ictimai-siyasi həyatında, yazı mədəniyyətinin tarixində mühüm hadisə olduğunu nəzərə alaraq imzalayıb. Dil fərdə, cəmiyyətə, sosial inteqrasiyaya, təhsil və inkişafa təsir gücünə görə bəşəriyyət üçün həyati əhəmiyyət kəsb edən dəyərlərdəndir. Qloballaşma prosesinin təsiri ilə mürəkkəb dövr yaşayan "ana dili" və ya "doğma dil" anlayışı bu gün qorunmağa və möhkəmlənməyə böyük ehtiyac duyur. Əsrlərin süzgəcindən süzülüb gələn ana dilimiz Xəlil Rza Ulutürkün şeirində özünün parlaq nümunəsini tapır: Kim qorumur öz dilini İtsin mənim gözümdən qoy ilim-ilim. O sahili bu sahilə birləşdirən polad körpüm qılıncımdır, Günəşimdir,mənim dilim! Anamız bizə bu dildə lay-lay çalıb illər ötsədə bu dil bizim yadımızdan çıxmaz.  Azərbaycan dili bu gün ən inkşaf etmiş dillərdən biridir. Azərbaycan dili zəngin dildir. Bu dildən laylaların, bayatıların ətri gəlir. Dil təkcə ünsiyyət vasitəsi deyil, həm də xalqın tarixi, ədəbiyyatı, mədəniyyətidir. Hansı ölkədə yaşamasından asılı olmayaraq, hər bir azərbaycanlı   öz ana dilini, dinini, milli adət və ənənələrini unutmamalı, onları təbliğ etməlidir. Ümummilli Liderimiz Heydər Əliyevin dediyi kimi: “Dil ədəbiyyatla, mədəniyyətlə, mənəviyyatla bağlıdır. Bunlarsız isə vətənpərvərlik formulu yoxdur”.  Azərbaycan dilinin elektron məkanda da daha geniş istifadəsinin təmin edilməsi ilə bağlı tədbirlərin reallaşdırılması müstəsna əhəmiyyətə malikdir. Ümummilli Lider Heydər Əliyevin layiqli davamçısı Prezident cənab İlham Əliyevin 17 iyul 2018-ci il tarixli   “Azərbaycan dilinin elektron məkanda daha geniş istifadəsinin təmin edilməsi ilə bağlı bir sıra tədbirlər haqqında” Sərəncamı da Azərbaycan dilinin inkişafı və tətbiqi dairəsinin daha da genişləndirilməsi baxımından xüsusi əhəmiyyət kəsb edir.  Nə qədər ki, biz varıq, o taylı bu taylı Azərbaycan var, bu dil yaşayacaq və inkşaf edəcək. 

Ellada  İbadova 

Suraxanı rayonu , 285 nömrəli  tam orta məktəbin tarix müəllimi