İkinci Qarabağ müharibəsində məğlubiyyət Ermənistan ordusu üçün çox ağır oldu. Məğlubiyyət onların otuz ildir davam edən “yenilməz ordu” haqqında müharibə təbliğatını və ideoloji zəminini darmadağın etdi. 44 gün davam edən müharibə zamanı Ermənistan ordusu tamamilə məhv edildi. Ötən il noyabrın 10-da kapitulyasiya aktına imza atmaq məcburiyyətində qalaraq Azərbaycanın 44 günlük müharibədə geri almadığı əraziləri qaytarmağa razılıq bildirdilər. 

Azərbaycanın İkinci Qarabağ müharibəsində qazandığı tarixi Qələbə regionda yeni reallıq yaratmışdır. Tarixi Zəfər Ali Baş Komandan İlham Əliyevin rəhbərliyi ilə Ordumuzun böyük qəhrəmanlığını, Azərbaycan xalqının iradəsini, vətənpərvərliyini, böyüklüyünü bütün dünyaya çatdırmış oldu. Prezident İlham Əliyev fəaliyyətinin bütün mərhələlərində hər zaman barışın, əmin-amanlığın tərəfində olmuşdur. Hətta Ermənistan 30 ilə yaxın bir zaman ərzində torpaqlarımızı işğal altında saxlayanda da dövlətimizin başçısı bu haqsızlığı, ədalətsizliyi müharibə, döyüş yolu ilə deyil, sülh danışıqları vasitəsilə aradan qaldırmağa çalışmışdır. 

Dövlətimizin başçısı müharibədən əvvəl olduğu kimi, savaşdan ötən bir il ərzində də sülh və regionun inkişafı naminə daim Ermənistanla danışıqların aparılması zəruriliyini diqqətə çatdırmışdır. Hətta Azərbaycan artıq bir neçə dəfə açıq şəkildə Ermənistanla dialoqa başlamağa hazır olduğunu da bildirmişdir. Belə bir məqsəd isə təbii ki, müharibə bitməsindən, münaqişənin artıq öz həllini tapmasından irəli gəlmişdir. Ancaq Ermənistan yenə də, necə deyərlər, haqq yoluna gəlməkdən boyun qaçırmışdır. Əlbəttə, Vətən müharibəsindən sonra ölkəmizin ərazi bütövlüyünün bərpa edilməsi, sülh danışıqlarına tərəfdar olması Azərbaycanın sülhpərvər xarakterindən irəli gəlməklə bərabər, həm də Cənubi Qafqazı sabit və təhlükəsiz regiona çevirmək istəyi ilə bağlı olmuşdur. Regionda sülhün bərqərar olması zəruriliyi Azərbaycanın rəsmi mövqeyini əks etdirir. 
Sülh müqaviləsi mütləq reallaşdırılmalıdır. Şübhəsiz ki, burada sərhədlərin delimitasiyası və demarkasiyası üzərində işlərin aparılmasının gerçəkləşdirilməsi də mühüm önəm daşıyır. Ermənistanın bu istiqamətdə tez bir zamanda fəaliyyətə başlaması, sülh sazişi üzərində danışıqlara qoşulması bu ölkəni həm üzləşdiyi daxili siyasi və iqtisadi böhrandan xilas edə, həm də regionda sülhün inkişafına mühüm töhfə verə bilər. Təəssüf ki, Ermənistanın indiki siyasi isteblişmentinin bəzi dairələrində revanşizm tendensiyalarının mövcudluğu bu əmin-amanlıq missiyasının reallaşmasına imkan vermir. Təbii ki, belə hal işğalçı ölkənin sadə insanlarının rifahının, sosial şəraitinin getdikcə pisləşməsi ilə nəticələnir. 
Ermənistanın Azərbaycanla sülh sazişini imzalamağa hazır olmaması, təxribatlar törətməsi, Rusiya sülhməramlılarının müvəqqəti yerləşdirildiyi Azərbaycan ərazisindəki qanunsuz erməni silahlı dəstələrinin atəş açması rəsmi İrəvanın regionda sabitliyi yenidən pozmağa cəhdi kimi də dəyərləndirlə bilər. Azərbaycan sülhün və əminamanlğın tərəfdarıdır. Ona görə də Azərbaycan rəsmi İrəvanın manevrlərini, yenidən qruplaşmalarını və təhlükəli ola biləcək hərbi potensial yaratmaq üçün cəhdlərini izləyir. Baş verə biləcək təhlükələri dərhal aradan qaldıracaqdır. Müharibədən sonra Ermənistan tərəfdə yenidən revanşist qüvvələrin baş qaldırması bir daha təsdiqləyir ki, ermənilər hələ bu müharibədən nəticə çıxarmayıblar. İqtisadi çöküş yaşayan, müharibənin fəsadlarını aradan qaldıra bilməyən bu ölkənin absurd fikirləri həqiqətən gülünc doğurur. 
Bu gün Azərbaycan bütün istiqamətlər üzrə inkişafını davam etdirən, hərbi qüdrətini daha da gücləndirən qabaqcıl ölkələrdən biridir. Bu baxımdan ermənilərin revanşist fikirləri sadəcə xəyal olaraq qalacaqdır. Ermənistan təkcə döyüş meydanında deyil, bütün istiqamətlərdə məğlub oldu. Ermənistanın yeganə çıxış yolu Azərbaycanın sülh çağırışlarına müsbət cavab verməkdir. Azərbaycan hər zaman bəyan edib ki, regionda sülhün və inkişafın bərqərar olunması üçün danışıqlara, Ermənistanla dialoqa başlamağa hazırdır. Yalnız dialoqa başlamaq deyil, həm də Azərbaycanla Ermənistan arasında gələcəkdə sülh müqaviləsi üzərində işləmək nəzərdə tutulmuşdur.


Siranə Zeynalova,
Salyan şəhər 4 saylı tam orta məktəbin müəllimi