Bu gün bütün dünya, o cümlədən Avropa Birliyinə daxil olan ölkələr Azərbaycanın yaratdığı yeni regional reallıqları qəbul edir və Cənubi Qafqazda öz təşəbbüslərini məhz bu reallıqlar əsasında formalaşdırmağa meyllənirlər. Azərbaycan-Ermənistan münasibətlərinin mövcud durumu da bütün Avropa ictimaiyyəti üçün kifayət qədər böyük maraq doğurur. Azərbaycan Respublikasının Prezidenti cənab İlham Əliyevin dekabrın 14-də Brüsseldə İspaniyanın “El Pais” qəzetinə verdiyi müsahibənin mövzusu da əsasən məhz marağın doğurduğu suallar ətrafında formalaşmışdır. Qeyd etmək lazımdır ki, bu müsahibə post-müharibə dövründə regionda gedən proseslər, Azərbaycan-Ermənistan münasibətlərinin nizamlanması, tərəflərin imzaladıqları üçtərəfli bəyanatlardan irəli gələn öhdəlikləri hansı səviyyədə yerinə yetirmələri və digər bu kimi vacib məsələlər barədə məlumatların Avropa və dünya ictimaiyyətinə çatdırılması baxımından böyük siyasi əhəmiyyət kəsb edir. 
Dövlətimizin başçısı əvvəlki müsahibələrində olduğu kimi, “El Pais” qəzetinin müxbirinin respublikamızın haqlı mövqeyi ilə bağlı sualları da təmkinlə, uzaqgörənliklə, siyasi peşəkarlıqla əsaslandırır, məsələnin mahiyyətini səbrlə izah edir, zəruri sənədlərə və tarixi faktlara istinadən öz mövqeyini, habelə dediklərinin doğruluğunu, ədalətə söykəndiyini sübuta yetirir.
Ümumiyyətlə, Prezident İlham Əliyevin informasiyaya dair strategiyası şəffaflıq, obyektivlik, sistemlilik, operativlik kimi prinsiplərə əsaslanır, milli maraqların müdafiəsi, ölkə həqiqətlərinin müasir üslubda dünya ictimaiyyətinə çatdırılması, cəmiyyətin hərtərəfli məlumatlandırılması, ictimai rəyə hörmət kimi mühüm amillər üzərində qurulur.
Prezident İlham Əliyev adı çəkilən müsahibənin əvvəlində müxbirin Ermənistanla hazırkı vəziyyət barədə sualına cavabında müharibədən ötən bir ildən çox bir müddət ərzində Rusiya sülhməramlı qüvvələrinin məsuliyyət daşıdığı ərazinin Ermənistan-Azərbaycan sərhədi ilə müqayisədə daha çox sabit olduğunu bildirib. Dövlətimizin başçısı sərhəddə törədilən təxribatların, toqquşmaların səbəbini isə haqlı olaraq Ermənistanın qisas almaq cəhdlərindən vaz keçməməsi ilə əlaqələndirib. İkinci Qarabağ müharibəsində məğlubiyyət onlar üçün çox ağrılı oldu. Bu məğlubiyyət demək olar ki, onların otuz ildir davam edən “yenilməz ordusu”, “gücü”, “əsgər və komandirlərinin cəsarəti” haqqında müharibə təbliğatını və ideoloji zəminini darmadağın etdi. 44 gün davam edən müharibə zamanı Ermənistan ordusu tamamilə məhv edildi və onlar ötən il noyabrın 10-da kapitulyasiya aktına imza atmaq məcburiyyətində qalaraq bizim 44 günlük müharibədə geri almadığımız əraziləri geri qaytarmağa razılıq bildirdilər. Buna görə də Ermənistan cəmiyyətində, siyasi spektrində revanşizm əlamətləri görünür. Buna görə də Rusiya sülhməramlılarının xidmət etdiyi ərazidə buna imkanın olmadığını dərk edərək onlar dövlət sərhədində hərbi təxribatlar törətməyə cəhd göstərirlər.
Dövlətimizin başçısı müsahibədə vurğulayıb ki, Ermənistanın son vaxtlar törətdiyi təxribatlar həm də məlum ərazidə dövlət sərhədinin təyin olunmaması ilə bağlı idi. Belə ki, ötən əsrin 90-cı illərinin əvvəlində hər iki ölkənin müstəqilliyinin bərpasından dərhal sonra Azərbaycanın həmin hissəsi Ermənistanın işğalına məruz qaldı. Buna görə həm fiziki, həm də siyasi olaraq sərhədlərin demarkasiya və delimitasiyası reallaşmadı. Beləliklə, keçən ilin noyabrında İkinci Qarabağ müharibəsi başa çatanda həmin yerlərin uca dağlarla əhatələnməsi və qarlı olması orada möhkəmlənməyə imkan vermədi. Bu ilin may ayında isə qar əriməyə başlayanda Azərbaycan Ordusu dövlət sərhədinə tərəf hərəkət etdi və mövcud sərhədin haradan keçməsi ilə bağlı müəyyən anlayışa əsasən, dövlət sərhədində mövqe tutdu. Bundan sonra Ermənistan Azərbaycanın hər hansı bir səbəb olmadan ərazisinə müdaxilə etməsi ilə bağlı iddialar irəli sürməyə başladı. Beləliklə, Azərbaycan Ordusu öz ərazimiz sayılan hissədə dayandı.
Prezident İlham Əliyev müsahibədə, həmçinin Qarabağ müharibəsinin bitməsindən dərhal sonra Ermənistana sərhədlərin demarkasiyası üzərində işləməyə başlamağın, delimitasiya üzrə birgə işçi qrupu yaratmağın və ərazidə bütün mübahisələri masa üzərində aydınlaşdırmağın təklif edildiyini, lakin bu ölkənin vurğulanan məsələlərə laqeyd münasibət bəslədiyini diqqətə çatdırıb. Prezident İlham Əliyev daha sonra deyib: “Müharibə bitəndən sonra bir ildən çox müddətdə Ermənistan tərəfindən dövlət sərhədində hərbi təxribatlar törətmək üçün bir neçə cəhd edilib. Onların hamısı uğursuz oldu. Bütün bu səylər nəticəsində onlar öz hərbi mövqelərini itirdi və Azərbaycan dövlət sərhədində mövqelərini gücləndirdi. Eyni hal keçən ay baş verdi. O zaman onlar bilərəkdən Azərbaycan Ordusuna qarşı qəsdən təxribat törətdilər və bu, bir neçə gün davam etdi. İlk günlər ərzində atəş açılmırdı, çünki Azərbaycan əsgərləri həmin ərazinin onlara aid olmadığını və getməli olduqlarını onlara başa saldı və onlar da getdilər. Lakin bizə qarşı artilleriya hücumlarına başladılar. Bizdə bir neçə nəfər həlak oldu və yaralandı. İndi vəziyyət sabitdir. Biz özümüz heç nə planlaşdırmamışdıq, əks halda, biz dayanmazdıq... Ermənistanın istənilən yerdə bizi dayandırmaq üçün hərbi bacarığı yoxdur. Bizim belə planlarımız yoxdur və buna görə də biz dayandıq”.
Tarixi qələbəmizdən sonra dövlətimizin başçısının müsahibədə vurğuladığı kimi, Azərbaycan daim sabitliyin, proqnozlaşdırmanın tərəfində dayandığını bəyan edib, Ermənistan tərəfindən istənilən revanşizm cəhdləri riskinin sıfır səviyyədə olmasını istəyib. Buna görə ölkəmiz ötən müddətdə işğalçının bütün manevrlərini, yenidən qruplaşmalarını və Azərbaycana təhlükəli ola biləcək hərbi potensial yaratmaq üçün bütün cəhdlərini çox yaxından izləyib. Bunun baş verdiyi təqdirdə isə, təhlükənin dərhal aradan qaldırılacağını xüsusi vurğulayıb.

Pirverdi Cəfərov,
Salyan rayon Yenikənd kənd inzibati ərazi dairəsi üzrə nümayəndə