20 Noyabr  Ağdam şəhəri Günü kimi qeyd olunur. Bu gün, qəhrəmanlıq, faciə və nəhayət, Qələbənin bir araya gəldiyi möhtəşəm bir tarixdən bəhs edir. Təhsil işçiləri kimi, biz bu günü şagirdlərimizə öyrədirik, çünki Ağdamın taleyi bütün Azərbaycan xalqının mübarizə ruhunun və milli mənliyinin güzgüsüdür. Bu torpaqlar 30 illik işğalın və erməni vandalizminin ən kəskin şahidi olub, lakin Prezident cənab İlham Əliyevin yorulmaz siyasəti və Vətən müharibəsində döyüşən Azərbaycanın igid oğullarının şücaəti sayəsində bu gün dirçəlişin ən böyük simvoluna çevrilməkdədir.

Ağdamın işğalı, Azərbaycanın müasir tarixinin ən ağrılı səhifələrindən biridir. Rayon uğrunda 42 gün davam edən qanlı döyüşlər 1993-cü il 23 iyul tarixində Ağdamın 73 faizinin işğalı ilə nəticələndi. Rayonun 1094 kvadrat kilometr sahəsinin 882 kvadrat kilometri, rayon mərkəzi ilə birlikdə 90 kəndi düşmən nəzarətinə keçdi. Bu işğal nəticəsində 6 mindən artıq soydaşımız şəhid oldu, minlərlə insan yaralandı, 128 min insan isə məcburi köçkün həyatı yaşamağa məcbur edildi.

Ermənistan qüvvələrinin Ağdamda həyata keçirdiyi vəhşiliklər, XX əsrin ən qəddar vandalizm aktları kimi tarixə həkk olunub. Ağdam şəhəri, dağıdılaraq haqlı olaraq "Qafqazın Xirosiması" adlandırılmışdır. Onlar sadəcə evləri, infrastrukturu deyil, milli yaddaşımızı, mədəniyyətimizi hədəf almışdılar. İşğal dövründə 74 məktəb, 271 mədəniyyət evi, 99 klub, eləcə də bütün dünyada yeganə olan Çörək muzeyi talan və məhv edilmişdir.

Lakin Prezident cənab İlham Əliyevin rəhbərliyi ilə həyata keçirilən böyük siyasət, məhz qəhrəmanlıq epopeyasının son akkordudur. Qırx dörd günlük Vətən müharibəsi zamanı əsgər və zabitlərimizin, döyüşən Vətən övladlarımızın göstərdiyi fədakarlıq, bu torpaqların azadlığı üçün verilmiş ən böyük and idi. Onlar, Ağdamın 42 günlük döyüşündə şəhid olan 6 mindən artıq soydaşımızın intiqamını almaq üçün silaha sarıldılar. Məhz onların şücaəti sayəsində, Ağdam rayonu 2020-ci il noyabrın 20-də döyüşsüz, siyasi-hərbi məharət nəticəsində Azərbaycana təhvil verildi. Bu qələbə, igid Vətən övladlarının güclü iradəsinin və Prezident cənab İlham Əliyevin sərkərdəlik istedadının vəhdətidir.

Ulu Öndər Heydər Əliyev hələ müstəqilliyin ilk illərində Ağdamın mənəvi dəyərini hər zaman yüksək tutmuş, ağdamlıların cəsarətini və qəhrəmanlığını dəfələrlə qeyd etmişdir. Onun qurduğu güclü dövlətçilik təməli və nizami ordu quruculuğu siyasəti 2020-ci il Zəfərinin təməli oldu.

Birinci vitse-prezident Mehriban Əliyevanın fəaliyyətində mədəni irsin qorunması və bərpası xüsusi yer tutur. Onun bilavasitə Heydər Əliyev Fondu vasitəsilə muğam sənətinin təbliği sahəsindəki işləri, Azərbaycan mədəniyyətinin beynəlxalq səviyyədə tanınmasında həlledici rol oynamışdır. Ağdam Muğam Mərkəzinin açılışında iştirakı, Qarabağ mədəniyyətinin dirçəlişinə verilən yüksək dövlət səviyyəli dəstəyin nümunəsidir. Biz təhsil işçiləri olaraq, gələcək nəsillərə Ağdamın həm faciəli, həm də qəhrəmanlıq dolu tarixini öyrətməklə, onlarda Vətənə və dövlətə sədaqət hissini daha da gücləndiririk.

Bu böyük siyasətin layiqli davamçısı, Prezident cənab İlham Əliyev Ağdamın azad edilməsindən dərhal sonra bərpa işlərini şəxsi nəzarətinə götürdü. “Ağdam şəhərinin 2040-cı ilədək inkişafına dair Baş planı”nın təsdiq edilməsi, Qarabağda təsdiqlənən ilk Baş Plan olaraq, Ağdama verilən önəmi göstərir. Baş Plan əsasında, Ağdam azad edilmiş ərazilərin ən böyük, Azərbaycanın isə dördüncü böyük şəhərinə çevrilməyi hədəfləyir və burada 100 min nəfər əhalinin yaşaması nəzərdə tutulur. Artıq Kəngərli, Xıdırlı, Sarıcalı kəndlərinin birinci mərhələlərinin açılışı olmuş, 2025-ci ilin oktyabr ayına qədər isə 825 ailənin, yəni 3318 nəfərin öz doğma yurdlarına köçürülməsi – Böyük Qayıdışın əməli addımlarıdır.

Gülnaz Allahverdiyeva

Suraxanı rayonu P.İsmayılov adına 278 nömrəli tam orta məktəbin təlim tərbiyə işləri üzrə direktor müavini 

Sozcu.info