Azərbaycan Milli Elmlər Akademiyasının prezidenti Ramiz Mehdiyevin qurucularından olduğu avtoritar rejimə qarşı demək olar ki təkbaşına dirəniş göstərməsi, əks-hücuma keçməsi cəmiyyətdə maraqla, hətta bir qədər rəğbətlə izlənilir. Ramiz Mehdiyevin cəsarətli siyasətçi olduğunu düşünənlər də var. Müzakirə mövzularından biri də Ramiz Mehdiyevin cəsarətin nədən və haradan qaynaqlanmasıdır.   
Ancaq Azərbaycan Kommunist Partiyasının 30-31 may 1988-ci il tarixli Plenumunda Ramiz Mehdiyevin tutduğu mövqe ilə tanış olanlar Ramiz Mehdiyevin cəsarətli olmadığını bilirlər. Mən həmin Plenumda baş verənləri “Novoye Vremya” qəzetinin 3-5 avqust 2013-cü il tarixli, (№ 138 (2775) sayında dərc olunmuş “Так какая идеология привлекательней : коммунистическая или "Новоазербайджанская?” başlıqlı məqalədən öyrənmişdim. Yeri gəlmişkən 9 il əvvəl, Ramiz Mehdiyevin Prezident Administrasiyanın rəhbəri olduğu vaxt bu məqaləni dərc edən “Novoye Vremya” qəzetinin kollektivi də göstərdiyi cəsarətə görə hörmətə layiqdir. Hüququn daha çox işlək olduğu 1988-ci ildə Əbdülrəhman Vəzirovun qarşısında cəsarət nümayiş etdirə bilməyən Ramiz Mehdiyevin indi bütöv bir “ordu”ya qarşı döyüşməsi səbəbsiz deyil. Qənaətimcə bunun iki səbəbi var. 
Ramiz Mehdiyev hüququn üstünlüyünün olmadığı cəmiyyətdə informasiyanın güc demək olduğunu bilir və buna görə də narahatlıq keçirmir. Son 30 illik siyasi proseslərin əsas aktyorlarından olan Ramiz Mehdiyevin iki-üç ən məlumatlı şəxsdən biri olduğu şübhəsizdir. Bu məlumatlar onu qoruyan zirehdir. Ona görə də Ramiz Mehdiyev geniş miqyaslı hücumlar qarşısında geri çəkilmir. Malik olduğu məlumatlar onu qorumaqla yanaşı, rəqiblərini sıradan çıxaracaq təsir gücünə də malikdir. 
Ramiz Mehdiyevin 1988-ci ildən fərqli olaraq cəsarət nümayiş etdirməsinin əsas səbəbi isə qənaətimcə postsovet məkanında dəyişiklik küləyinin əsməyə başlamasını hiss etməsidir. Əgər postsovet məkanında ən avtoritar lider hesab olunan Türkmənistan prezidenti, Arkadağ titullu Qurbanqulu Berdiməhəmmədov 15 illik prezidentlikdən sonra “yorulduğunu” bəhanə edərək və “gənclərə yol açmaq” üçün qəfilətən hakimiyyəti oğluna ötürməyə çalışırsa, deməli küləklər əsməyə başlayıb. Buna görə də Ramiz Mehdiyev nəyinki geri çəkilmir, hətta hakimiyyəti ifşa etməyi də özünə rəva bilir. Külək güclənincə bu günkü ifşalar Ramiz Mehdiyevə divident də gətirə bilər.
Xəqani Cəfərli,
Politoloq
Sozcu.info