MEHRİBAN ƏLİYEVA SİSTEMLİ İDARƏETMƏ TƏCRÜBƏSİNƏ MALİK BİR QADINDIR


O, bu təcrübəni gözəl münasibətləri olan Ümummilli lider Heydər Əliyev və daim yanında olduğu Prezident İlham Əliyevdən əxz edib…
       Qadın istər cəmiyyətdə, istərsə də ailədə aparıcı və hərəkətverici qüvvədir. Bu güc çox vaxt pərdə arxasında qalsa da, onun tarixi təsiri heç vaxt inkar edilməyib. Xüsusilə də türk qadınının istər ağlı, istərsə də ailəsinə bağlılığı, övladlarına sevgisi, həyat yoldaşına sadiqliyi hər zaman dillərə dastan olub. Belə bir qadın tək bir ailə çərçivəsində deyil, ulus, el, oba, cəmiyyət səviyyəsində də öz imkanlarını reallaşdırmaq iqtidarında idi. Onun ağlı ilə hesablaşar, sözünü uca tutar, məsləhətlərini dinləyərdilər. 
Zaman ötür, dövr dəyişir. Artıq at belində qılınc çalan deyil, ağlı, zəkası ilə daim həyat yoldaşına dəstək olan, onu daxili və xarici düşmənlərdən qoruya bilən, xeyirxah əməlləri ilə xalq arasında sevilən, hörmət olunan qadın siyasətçilər önə çıxır. Bu yöndən əminliklə Azərbaycanın Birinci xanımı Mehriban Əliyevanın ölkəmizin sosial, humanitar və iqtisadi siyasətindəki rolunu xüsusi vurğulamaq olar. Azərbaycan Respublikasının Prezidenti İlham Əliyevin dövlət başçısı kimi fəaliyyətinin ilk günlərində ölkənin birinci xanımı kimi tanınan Mehriban Əliyeva çox keçmədi ki, qayğıkeşliyi, həssas təbəqələrə xüsusi diqqəti, uzaqgörənliyi və xeyirxah əməlləri ilə xalqın sevimlisinə, güman yerinə çevrildi. Artıq insanlar birbaşa ona müraciət edir, bir ana kimi, həyat yoldaşı, gözəl və qayğıkeş qadın kimi dərdlərini onunla paylaşır, dəstək olmasını, yol göstərməsini, dərdlərinə əlac tapmasını gözləyirdilər. Və bu gözləntilərin özünü doğrultması Mehriban xanımı xeyirxah mələyə çevirdi. 
Mehriban xanım Əliyevanın rəhbərliyi altında Heydər Əliyev Fondu təhsillə, idmanla bağlı bir çox önəmli layihə və proqramlar həyata keçirir… Biganəliyi və laqeydliyi ən dəhşətli xüsusiyyət adlandıran Mehriban xanım Əliyeva hər zaman cəmiyyətin həssas təbəqələrinin problemlərini həll etməyə, həqiqətən mehriban bir ana nəvazişi ilə bu nəvazişə ehtiyacı olan uşaqları sevindirməyə çalışır. O, zəngin mədəniyyətimizi dünyada təbliğ etməklə yanaşı, müxtəlif istiqamətlərdə yeni layihələr də reallaşdırır. Təsadüfi deyil ki, xeyriyyəçi Hacı Zeynalabdin Tağıyevin heykəlinin açılışında çıxış edən Prezident İlham Əliyev öz çıxışında Heydər Əliyev Fondunun da günümüzdə xeyriyyəçilik missiyasını öz üzərinə götürdüyünü vurğulayır.      
 Mehriban Əliyevanın yüksək təşkilatçılıq bacarığının nəticəsində ölkəmizdə Gimnastika üzrə dünya kuboku yarışları, müxtəlif çempionat və turnirlər, Birinci Avropa Oyunları, IV İslam Həmrəyliyi Oyunları yüksək səviyyədə keçirildi. Dünyada sülhün və sabitliyin təmin edilməsi sahəsindəki önəmli fəaliyyəti, sivilizasiyalararası dialoq mühitinin formalaşdırılmasındakı xidməti, dünya mədəni irsinin qorunması yönündəki fəaliyyəti dünyanın nüfuzlu təşkilatlarının diqqətindən yayınmadı. Mehriban xanım Əliyeva 2004-cü ilin avqustunda Azərbaycan şifahi xalq ədəbiyyatı və milli musiqi irsinin qorunub saxlanılması və inkişaf etdirilməsində xidmətlərinə görə UNESCO-nun, 2006-cı ilin noyabrında isə humanitar sahədə genişmiqyaslı fəaliyyətinə, o cümlədən sivilizasiyalararası və mədəniyyətlərarası dialoqun inkişafına, İslam mədəni irsinin təbliğinə və qayğıya ehtiyacı olan uşaqların problemlərinin həllində göstərdiyi dəstəyə görə ISESCO-nun Xoşməramlı səfiri adına layiq görüldü...
Bütün bunlar Mehriban xanım Əliyevanın ölkənin Birinci vitse-prezidenti vəzifəsinə layiq olduğunu bir daha təsdiqləyirdi...
       Beləliklə, 2016-cı il sentyabrın 26-da Prezident İlham Əliyevin təşəbbüsü əsasında Konstitusiya islahatları ilə bağlı keçirilən referendumun nəticələrinə görə ölkədə Birinci vitse-prezidentlik institutu yaradıldı. Azərbaycanda da Birinci vitse-prezidentlik institutunun təsis olunması dövlət idarəçilik sisteminin təkmilləşdirilməsinə xidmət edən mühüm addım idi. Prezident İlham Əliyevin 2017-ci il 21 fevral tarixində imzaladığı Sərəncama əsasən Mehriban Arif qızı Əliyeva Azərbaycan Respublikasının Birinci vitse-prezidenti təyin olundu.
       Bu, o dövrdə ölkədə və dünyada baş verənləri nəzərə alaraq atılan ən düzgün addım idi. Təhlükəsizlik Şurasının iclasında Birinci vitse-prezidenti təqdim edən Prezident İlham Əliyev Mehriban xanımın ölkəmizin mədəni və ictimai-siyasi həyatındakı rolunu yüksək qiymətləndirdi. Azərbaycanın və Azərbaycan xalqının mənafeyini hər zaman yüksək tutan Mehriban xanım bundan sonra da xalqa xidmət edəcəyini xüsusi vurğuladı.  
       Vitse-prezident institutu dünyanın bir sıra ölkələrində, o cümlədən də ABŞ-da mövcuddur. Vitse-prezident prezidentdən sonra ikinci adamdır. Hazırda ABŞ-nın vitse-prezidenti 3 noyabr 2020-ci ildə ABŞ prezidenti ilə birgə seçilən, 20 yanvar 2021-ci ildən vəzifəsinin icrasına başlayan xanım Kamala Harrisdir...
         Bir sıra Latın Amerikası və  Afrika ölkələrində, Bolqarıstanda, İsveçrədə də vitse-prezident vəzifəsi var. Prezident bu və ya digər səbəbdən ölkədə olmadığı müddətdə, onun vəzifələrini vitse-prezident yerinə yetirir. SSRİ-də 1990-cı (U.İ.Yanayev), Rusiya Federasiyasında isə 1991-ci ildən (A.V.Rutskoy) vitse-prezident vəzifəsi yaradılmışdır. Lakin Rusiyadakı qarışıqlıq dövründə onlar həbs edilmiş, daha sonra bəraət qazanmışdılar. 21 sentyabr- 4 oktyabr konstitusiya böhranı zamanı bu vəzifə ləğv olunmuşdur. Bir çox respublikalar, məsələn, Qazaxıstan SSR, Özbəkistan SSR, Qırğızıstan SSR-də də bu vəzifə yaradılsa da, tezliklə aradan qaldırıldı. Əgər Rusiyada bunun səbəbi vitse-prezidentin vəzifələrinin qeyri-müəyyən olması idisə, bir çox xarici ölkələrdə əsas səbəb hakimiyyətin və ona yaxın qüvvələrin prezidentlə az qala eyni hüquqlara malik olan, onun ölümü və ya ölkəni idarə edə bilməməsi səbəbində vəzifələrini öz üzərinə götürməsidir. Dəfələrlə belə məqamlarda vitse-prezidentlərin hakimiyyəti ələ keçirtməsi cəhdləri olmuşdur... Bu baxımdan vitse-prezidentin Prezidentə çox yaxın adam olması dövlətdə sabitliyin, təhlükəsizliyin təmin edilməsi, etibarlılığı baxımından çox vacibdir...
        Mehriban Əliyeva sistemli idarəetmə təcrübəsinə malik bir qadındır. O, bu təcrübəni gözəl müasibətləri olan Ümummilli lider Heydər Əliyevdən və daim yanında olduğu Azərbaycan Respublikasının Prezidenti İlham Əliyevdən əxz etmişdir. Lakin “quyuda su olmasa, nə qədər su töksən də dolmaz” deyib babalarımız. Təbii ki, Mehriban xanımın doğulub tərbiyə aldığı ailənin, təhsilin də bu yöndə böyük rolu var. 
         Artıq ölkənin bir çox sahələrində Mehriban xanımın rolu görünürdü. Bu da Prezidentin daha qlobal məsələlərlə rahat məşğul olmasına imkan yaradırdı. Məhz bu illərdə Azərbaycan iqtisadi yöndən sürətlə irəliləməklə yanaşı, hərbi gücünü. qüdrətini də artırdı. Nəticə isə göz qabağındadır. II Qarabağ müharibəsindəki parlaq qələbəmiz Azərbaycanın beynəlxalq arenada hesablaşılası bir dövlət olduğunu göstərməklə yanaşı bölgədə yeni reallıqlara da yol açdı. Bu qələbədə Mehriban xanımın rolu danılmazdır. O ağır müharibə günlərində Ali Baş Komandanın yuxusuz gecələrini də, xarici və daxili hücumlara qarşı mübarizədə keçirdiyi gərgin günlərini də Mehriban xanım onunla bərabər yaşadı…
       Hər zaman həyat yoldaşının yanında olan Birinci vitse-prezident hazırkı dünyada ən etibarlı tərəfdaşdır.Xaqan və xatunu kimi ölkənin taleyində mühüm birgə addımlar, etibarlı tərəfdaşlıq, ağır müharibə və ondan sonrakı günlərdə, aylarda çiyin-çiyinə erməni işğalından azad olunan, minalardan tam təmizlənməmiş ərazilərə səfərləri, birgə məsləhətləşmələr, birgə bərpa-quruculuq işləri... bütün bunlar Mehriban xanımın həqiqətən Birinci vitse-prezident kimi yeri gələndə çox mühüm məsələlərə imza atacaq gücdə olduğunu göstərir.
 
GÜLLÜ YOLOĞLU
tarix elmləri doktoru, türkoloq


Oxşar Xəbərlər

Xəbər lenti


{sape_links}{sape_article}